ឯកឧត្ដមរដ្ឋលេខាធិការ តូច ប៊ុនហួរ អញ្ជើញដឹកនាំកិច្ចប្រជុំវាយតម្លៃ និងអនុម័តបញ្ចេញប្រភេទពូជក្លូនកៅស៊ូថ្មី ចំនួន០១ របស់វិទ្យាស្ថានស្រាវជ្រាវកៅស៊ូកម្ពុជា

ចេញ​ផ្សាយ​ ៦ តុលា ២០២៥ 985

នៅព្រឹកថ្ងៃទី៦ ខែតុលា ឆ្នាំ២០២៥ ឯកឧត្ដម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការបញ្ចេញពូជដំណាំ បានអញ្ជើញដឹកនាំកិច្ចប្រជុំវាយតម្លៃបញ្ចេញនូវប្រភេទពូជក្លូនកៅស៊ូ ចំនួន០១ ក្លូន (G3) របស់វិទ្យាស្ថានស្រាវជ្រាវកៅស៊ូកម្ពុជា។ កិច្ចប្រជុំនេះ មានការចូលរួមពី ឯកឧត្តម លោក លោកស្រី ជាសមាជិក សមាជិកានៃគណៈកម្មាធិការ និងក្រុមការងារស្រាវជ្រាវពូជកៅស៊ូ។
ឯកឧត្តមរដ្ឋលេខាធិការ បានគូសបញ្ជាក់ថា វិទ្យាស្ថានស្រាវជ្រាវកៅស៊ូកម្ពុជាបានចាប់ផ្តើមដំណើរការស្រាវជ្រាវក្លូនកៅស៊ូតាំងពីឆ្នាំ ២០១១ មកម្ល៉េះ ក្នុងគោលបំណងបង្កើតក្លូនកៅស៊ូកម្ពុជា ដែលមានសក្តានុពលខ្ពស់ អាចបន្សាំនឹងបម្រែបម្រួលអាកាសធាតុ ផ្តល់ទិន្នផលខ្ពស់ មានការលូតលាស់ល្អ និងសមស្របតាមលក្ខខណ្ឌក្សេត្របរិស្ថាននៅប្រទេសកម្ពុជា។
យោងតាមទិន្នន័យ និងរបាយការណ៍វាយតម្លៃលម្អិតរបស់វិទ្យាស្ថានស្រាវជ្រាវកៅស៊ូកម្ពុជា គណៈកម្មាធិការបញ្ចេញពូជដំណាំបានឯកភាពទាំងស្រុងក្នុងការអនុញ្ញាតឱ្យបញ្ចេញនូវប្រភេទក្លូនកៅស៊ូថ្មីនេះ ដើម្បីប្រើប្រាស់ និងចែកចាយជាផ្លូវការ៕