ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញជួបសំណេះសំណាលជាមួយអង្គភាពសារព័ត៌មាន ស៊ី.អ៊ី.អិន (CEN) ពីកិច្ចសុំសហការផ្សព្វផ្សាយលើកកម្ពស់ និងបញ្ជ្រាបព័ត៌មានទាក់ទងនឹងវិស័យកសិកម្ម
ចេញផ្សាយ ០៦ ធ្នូ ២០២៤ 843
នៅព្រឹកថ្ងៃទី០៦ ខែធ្នូ ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឱ្យថ្នាក់ដឹកនាំអង្គភាពសារព័ត៌មាន ស៊ី.អ៊ី.អិន និងសហការី ជួបសំណេះសំណាល ពិភាក្សាការងារសុំកិច្ចសហការ ចូលរួមលើកកម្ពស់ និងបញ្ជ្រាបព័ត៌មានទាក់ទងនឹងវិស័យកសិកម្មឱ្យសាធារណជនគ្រប់ស្រទាប់វណ្ណៈកាន់តែជ្រាបច្បាស់ និងទូលំទូលាយបន្ថែមទៀត។ កិច្ចប្រជុំប្រព្រឹត្តទៅនៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ក្នុងជំនួបនោះ លោកជំទាវ អ៊ឹម រចនា បានថ្លែងស្វាគមន៍ លោក អាន ច័ន្ទថ្លា នាយកប្រតិបត្តិព័ត៌មាន ស៊ី.អ៊ី.អិន និងសហការី ដែលបានស្នើសុំជួបថ្នាក់ដឹកនាំក្រសួងកសិកម្មដើម្បីណែនាំអំពីសារព័ត៌មាន CEN ដែលបង្កើតឡើងនៅឆ្នាំ២០០៨ ផលិតព័ត៌មានចម្រុះ មានផលិតជាអត្ថបទ និងវីដេអូ រួមជាមួយព័ត៌មានអង្កេតស៊ីជម្រៅ ជាដើម។
ចំពោះសំណើពីសារព័ត៌មាន CEN ដែលមានបំណងធ្វើជាដៃគូផ្សព្វផ្សាយអំពីវិស័យកសិកម្ម លោកជំទាវ អ៊ឹម រចនា បានសម្ដែងការស្វាគមន៍ ដោយលើកឡើងថា ក្រសួងកសិកម្មតែងតែបើកទូលាយសហការជាមួយស្ថាប័នសារព័ត៌មានគ្រប់អង្គភាព ដែលផ្សព្វផ្សាយនូវព័ត៌មានប្រកបដោយវិជ្ជាជីវៈ ដើម្បីរួមគ្នាផ្សព្វផ្សាយអំពីវិស័យកសិកម្មឱ្យបានកាន់តែទូលំទូលាយ បន្សាបព័ត៌មានមិនពិត និងមិនប្រកាន់និន្នាការឡើយ។
លោកជំទាវសង្កត់ធ្ងន់ថា ក្រសួងកសិកម្ម រុក្ខាប្រមាញ់ និងនេសាទ ចាត់ទុកវិស័យសារព័ត៌មានជាអំណាចទី៤ ការផ្សព្វផ្សាយព័ត៌មានពិតទាក់ទងវិស័យកសិកម្ម នឹងជួយលើកស្ទួយវិស័យកសិកម្ម ផ្តល់ផលប្រយោជន៍ដល់កសិករ និងធ្វើឱ្យជីវភាពប្រជាកសិករកាន់តែរីកចម្រើនបន្ថែមទៀត ស្របតាមគោលនយោបាយរបស់ក្រសួង គឺ «មានហូប មានប្រើ មានបាន និងមានរហូត»៕
