ឯកឧត្តមរដ្ឋមន្ត្រី ឌិត ទីណា ចូលរួមប្រជុំពិភាក្សាលើការងារសកម្មភាពជនពិការប្រចាំក្រសួងកសិកម្ម រុក្ខាប្រមាញ់ និងនេសាទ

ចេញ​ផ្សាយ​ ១៣ មេសា ២០២៣ 2727

នៅរសៀលថ្ងៃទី១២ ខែមេសា ឆ្នាំ២០២៣ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមប្រជុំពិភាក្សាលើការងារសកម្មភាពជនពិការប្រចាំក្រសួងកសិកម្ម រុក្ខាប្រមាញ់ និងនេសាទ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

ក្នុងកិច្ចប្រជុំនេះ ឯកឧត្តមរដ្ឋមន្ត្រី បានណែនាំឱ្យក្រុមប្រឹក្សាសកម្មភាពជនពិការនៃក្រសួងកសិកម្ម រុក្ខាប្រមាញ់ និងនេសាទ ធ្វើការពិនិត្យស្ថានភាពពិការជាក់ស្តែង និងមានដំណោះស្រាយជាក់ស្តែងឆ្លើយតបនឹងតម្រូវរបស់ជនមានពិការភាពទទួលយកដោយភាពពេញចិត្ត។ ជាមួយគ្នានេះដែរ ក្រសួងត្រូវបន្តយកចិត្តទុកដាក់លើការងារសកម្មភាពជនពិការ ហើយត្រូវពិនិត្យលទ្ធភាពការងារនេះត្រឹមកម្រិតក្រសួងឱ្យមានប្រសិទ្ធភាព។ ចំពោះការសាងសង់អគារថ្មី ក៏ត្រូវគិតគូពីជនមានពិការភាពផងដែរ។

ទាក់ទងនឹងការងារជនមានពិការភាពនេះ ឯកឧត្តមរដ្ឋមន្ត្រី បានណែនាំដល់ក្រុមការងារត្រូវប្រញាប់រាយការណ៍ប្រសិនបើមានករណីពិការភាពថ្មី និងត្រូវមានដំណោះស្រាយសមស្របជាក់ស្តែង។ រីឯបញ្ហាថវិកា ក្រុមការងារអាចបញ្ជ្រាបថវិកាសម្រាប់ការងារជនពិការនេះចូលក្នុងថវិកាកម្មវិធី ហើយអាចយកថ្ងៃទិវាជនពិការ ៣ ធ្នូ ជាឱកាសសម្រាប់សប្បុរសជនចូលរួមផ្ដល់មូលនិធិសម្រាប់ការងារដែលពាក់ព័ន្ធនឹងជនមានពិការភាពបាន។ ទន្ទឹមនឹងនេះដែរ ក្រុមការងារត្រូវពិនិត្យលទ្ធភាពប្រជុំតាម Zoom ដើម្បីសម្រួលដល់ការចំណាយ និងបង្កភាពងាយស្រួលផងដែរ។ មួយវិញទៀត សម្រាប់ការប្រជុំបូកសរុបការងារជនពិការឆ្នាំ២០២៣ អាចពិនិត្យលទ្ធភាពជួបផ្ទាល់ជាមួយពួកគាត់ ដើម្បីស្តាប់ពីស្ថានភាព និងតម្រូវការរបស់ពួកគាត់ ព្រមទាំងរកដំណោះស្រាយជាមួយគ្នា៕