ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងាចុះពិនិត្យការប្រមូលផលស្រូវ នៅខេត្តសៀមរាប
ចេញផ្សាយ ២ កញ្ញា ២០២៥ 153
នៅថ្ងៃទី១ ខែកញ្ញា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារចុះពិនិត្យការប្រមូលផលស្រូវរបស់បងប្អូនប្រជាពលរដ្ឋ ស្ថិតក្នុងឃុំសំបួរ ស្រុកក្រឡាញ់ ខេត្តសៀមរាប ដោយមានការចូលរួមពី ឯកឧត្តមអ្នកឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប និងសហការី លោក មឿ សុភី អភិបាលរងនៃគណៈអភិបាលស្រុកក្រឡាញ់ មន្ត្រីកសិកម្មឃុំ និងអាជ្ញាធរមូលដ្ឋានពាក់ព័ន្ធ។
ក្នុងឱកាសនោះ ឯកឧត្តមរដ្ឋលេខាធិការ បានជម្រាបជូនបងប្អូនប្រជាកសិករថា តម្លៃស្រូវលើទីផ្សារអន្តរជាតិមានការធ្លាក់ចុះ កត្តានេះធ្វើឱ្យប៉ះពាល់តម្លៃស្រូវនៅកម្ពុជាផងដែរ។ ជាមួយគ្នានេះឯកឧត្តម ក៏បានបង្ហាញអំពីយន្តការរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការយកចិត្តទុកដាក់ ជួយដោះស្រាយ និងជួយសម្របសម្រួលតម្លៃស្រូវជូនបងប្អូនប្រជាកសិករក្នុងតម្លៃសមរម្យ។
ឯកឧត្តមរដ្ឋលេខាធិការ បានណែនាំឱ្យបងប្អូនប្រជាកសិករអនុវត្តកសិកម្មតាមកិច្ចសន្យា ដោយរៀបចំចងក្រងជាសហគមន៍កសិកម្មទំនើប ដើម្បីធានាទីផ្សារ និងតម្លៃទុកមុន ព្រមទាំងចំណាយថ្លៃដើមតិច។
ចុងបញ្ចប់ ឯកឧត្តមរដ្ឋលេខាធិការ បានណែនាំឱ្យមន្ត្រីំជំនាញ ជាពិសេសមន្ត្រីកសិកម្មឃុំ បន្តជួយផ្សព្វផ្សាយបច្ចេកទេសកសិកម្ម និងសារៈប្រយោជន៍អំពីសហគមន៍កសិកម្មទំនើប ព្រមទាំងជួយដោះស្រាយបញ្ហានានាជូនដល់ប្រជាកសិករឱ្យបានទាន់ពេលវេលា និងមានប្រសិទ្ធភាព៕
