ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ ទទួលជួបជាមួយស្ថាប័នសេដ្ឋកិច្ចនិងពាណិជ្ជកម្ម នៃស្ថានទូតសហរដ្ឋអាមេរិកប្រចាំនៅកម្ពុជា
ចេញផ្សាយ ១២ សីហា ២០២៥ 401
នារសៀលថ្ងៃទី១២ ខែសីហា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា បានទទួលជួបជាមួយស្ថាប័នសេដ្ឋកិច្ចនិងពាណិជ្ជកម្ម នៃស្ថានទូតសហរដ្ឋអាមេរិកប្រចាំនៅកម្ពុជា ក្នុងជំនួបសម្តែងការគួរសម និងពិភាក្សាការងារលើវិស័យកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នាឱកាសនៃជំនួប ឯកឧត្តមរដ្ឋលេខាធិការ បានគូសបញ្ជាក់ថា កម្ពុជាមានកសិផលជាច្រេីនរួមមាន៖ ស្រូវអង្ករ ស្វាយចន្ទី ដំឡូងមី ម្រេច ដែលមានគុណភាពខ្ពស់ជាឱកាសសម្រាប់វិនិយោគក្នុងការកែច្នៃ វេចខ្ចប់ និងនាំចេញទៅកាន់ទីផ្សារអន្តរជាតិ ជាមួយនឹងការបង្កេីតស្លាកយីហោ និងធ្វើទីផ្សារល្អ ជាជាងការនាំចេញវត្ថុធាតុដេីម។
ទន្ទឹមនឹងនេះ ឯកឧត្តមរដ្ឋលេខាធិការ លើកទឹកចិត្តគណៈប្រតិភូសហរដ្ឋអាមេរិកផ្សារភ្ជាប់ការកសាងសហគមន៍កសិកម្មទំនើប ជួយកាត់បន្ថយថ្លៃដើមផលិត ធានាតម្លៃនិងទីផ្សារតាមការចុះកិច្ចសន្យាទិញលក់ទុកមុន ធានាបានទាំងគុណភាពនិងបរិមាណ។ បន្ថែមពីនេះ គណៈប្រតិភូសហរដ្ឋអាមេរិក អាចពិនិត្យលទ្ធភាពក្នុងការស្វែងរកគ្រឹះស្ថានហិរញ្ញវត្ថុក្រៅប្រទេស ដែលអាចផ្តល់កម្ចីការប្រាក់ទាប សំដៅជួយអភិវឌ្ឍន៍សហគមន៍ និងលើកកម្ពស់ជីវភាពប្រជាកសិករ។
ជាថ្មីម្តងទៀត ឯកឧត្តមរដ្ឋលេខាធិការ បានជម្រាបជូនពីការរៀបចំកម្មវិធី(CAFE25) ដែលជាកម្មវិធីអភិវឌ្ឍន៍វិស័យកសិកម្ម និងបានអញ្ជើញគណៈប្រតិភូសហរដ្ឋអាមេរិក ដើម្បីចូលរួមសំដៅលេីកកម្ពស់វិស័យកសិកម្មផ្សារភ្ជាប់ការវិនិយោគទៅនឹងពាណិជ្ជកម្ម និងបង្កេីនការនាំចេញទៅកាន់ទីផ្សារអន្តរជាតិ៕
