ឯកឧត្តមរដ្ឋមន្ត្រី វេង សាខុន បានដឹកនាំគណៈប្រតិភូចូលរួមកិច្ចប្រជុំភាពជាដៃគូជាមួយមជ្ឈមណ្ឌលសិក្សាស្រាវជ្រាវពូជស្រូវហាយប្រិដ ខេត្តហ៊ូណាន (Hunan Hybrid Rice Research Center) នៅទីស្តីការមជ្ឈមណ្ឌល ខេត្តហ៊ូណាន

ចេញ​ផ្សាយ​ ១៧ ឧសភា ២០១៨ 2580

នាវេលាម៉ោង ៩:៣០ ថ្ងៃដដែលនេះ ឯកឧត្តមរដ្ឋមន្ត្រីបានដឹកនាំគណៈប្រតិភូចូលរួមកិច្ចប្រជុំភាពជាដៃគូជាមួយមជ្ឈមណ្ឌលសិក្សាស្រាវជ្រាវពូជស្រូវហាយប្រិដ ខេត្តហ៊ូណាន (Hunan Hybrid Rice Research Center) នៅទីស្តីការមជ្ឈមណ្ឌល ខេត្តហ៊ូណាន សាធារណរដ្ឋប្រជាមានិតចិន។

កិច្ចប្រជុំត្រូវបានចាប់ផ្តើមដោយមានការស្វាគមន៍យ៉ាងកក់ក្តៅពីសំណាក់លោកសាស្ត្រាចារ្យ Yuan Longping ស្ថាបនិកពូជស្រូវហាយប្រិដ បានឲ្យដឹងពីគោលបំណងចម្បងតំបូងរបស់រដ្ឋាភិបាលចិនក្នុងការបង្កើតពូជស្រូវហាយប្រិដ គឺដើម្បីធានាដល់ស្ថិរភាពស្បៀងអាហារក្នុងប្រទេស។ បច្ចុប្បន្ន នៅប្រទេសចិនមានផ្ទៃដីដាំដុះពូជស្រូវហាយប្រិដជាង ១១លានហត ដោយទទួលក្នុងមធ្យមប្រមាណជា ៦,៤ តោនក្នុង ១ហត។ លោកសាស្ត្រាចារ្យបានបញ្ជាក់ផងដែរថា សម្រាប់ឆ្នាំ ២០១៥-២០២០ មជ្ឈមណ្ឌលបានដាក់ចេញនូវគោលដៅសម្រេចឲ្យបានទិន្នផល ១៥តោនក្នុង១ហត។ ទន្ទឹមនឹងនេះ ដោយប្រទេសកម្ពុជាមានសក្តានុពលខ្ពស់ និងធនធានធម្មជាតិល្អប្រពៃ លោកសាស្ត្រាចារ្យរំពឹងថាទិន្នផលនិងអាចឈានបានរហូតដល់ ៨-១២តោនក្នុង១ហតផងដែរ។ ដូច្នេះលោកសាស្ត្រាចារ្យសន្យានឹងផ្តល់មន្ត្រីជំនាញ និងបច្ចេកវិទ្យាទំនើបមកកម្ពុជា ហើយសង្ឃឹមរាជរដ្ឋាភិបាលកម្ពុជានឹងជួយសហការ និង

ជម្រុញការដាំដុះពូជស្រូវហាយប្រិដឲ្យបាន ៣០-៤០ម៉ឺនហតដើម្បីធានាដល់សន្តិសុខ និងស្ថិរភាពស្បៀងអាហារពិភពលោក ជាពិសេសជំរុញការនាំចេញអង្ករពីកម្ពុជាឲ្យទទួលកម្រិតខ្ពស់ នៅក្នុងតំបន់អាស៊ីនាពេលខាងមុខ។

ជាការឆ្លើយតប ឯកឧត្តមរដ្ឋមន្ត្រីបានសម្តែងនូវសេចក្តីសោមនស្សរីករាយ និងថ្លែងអំណរគុណដល់ការទទួលស្វាគមន៍ដល់គណៈប្រតិភូយ៉ាងកក់ក្តៅពីភាគីមិត្តចិនរយៈពេលបំពេញទស្សនកិច្ច ២ថ្ងៃកន្លងមកនេះ។ ឯកឧត្តមរដ្ឋមន្ត្រីបានជម្រាបជូនភាគីចិនអំពីវឌ្ឍនភាពនៃកំណើនវិស័យកសិកម្ម ដែលបានចូលរួមយ៉ាងសកម្មក្នុងការលើកស្ទួយកំណើនសេដ្ឋកិច្ចជាតិ ៧% អស់រយៈពេលច្រើនឆ្នាំកន្លងមកនេះ ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល។ ក្នុងនាមឲ្យក្រសួង ឯកឧត្តមរដ្ឋមន្ត្រីក៏បានបង្ហាញនូវឆន្ទៈសហការរួមគ្នា ខិតខំប្រឹងប្រែងសិក្សាស្រាវជ្រាវ ផលិត និងអនុវត្តពូជស្រូវហាយ

ប្រិដដែលមានសក្តានុពលខ្ពស់ ទាំងគុណភាព រស់ជាតិសុវត្ថិភាព ប្រសិទ្ធភាព ទិន្នផលខ្ពស់ និងជាពិសេសឆ្លើយ

តបទៅនិងសេចក្តីត្រូវការពីទីផ្សារ ដើម្បីអភិវឌ្ឍវិស័យកសិកម្មឲ្យកាន់តែរីកចម្រើនគួរជាទីមោទនៈ។

ជំនួបពិភាក្សាត្រូវបានបញ្ចប់នៅវេលាម៉ោង ១២:៣០ រសៀលក្នុងបរិយាកាសយោគយល់ ស្និទ្ធស្នាល និងសាមគ្គីភាពបំផុត។