ឯកឧត្តមរដ្ឋលេខាធិការ ហ៊ាន វណ្ណហន អញ្ជើញចូលរួមជាគណៈអធិបតីក្នុងសិក្ខាសាលាស្តីពី ការសន្ទនាគោលនយោបាយសម្រាប់ការបង្កើតកម្មវិធីទទួលស្គាល់មន្ទីរពិសោធន៍នៃភាគីទីបី ក្នុងក្របខណ្ឌវិធានការភូតគាមអនាម័យស្តង់ដារអន្តរជាតិលេខ៤៥ នៅខេត្ដសៀមរាប

ចេញ​ផ្សាយ​ ១៨ កញ្ញា ២០២៥ 684

នៅព្រឹកថ្ងៃទី១៨ ខែកញ្ញា ឆ្នាំ២០២៥ ឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាគណៈអធិបតីក្នុងសិក្ខាសាលាស្តីពី ការសន្ទនាគោលនយោបាយសម្រាប់ការបង្កើតកម្មវិធីទទួលស្គាល់មន្ទីរពិសោធន៍នៃភាគីទីបី ក្នុងក្របខណ្ឌវិធានការភូតគាមអនាម័យស្តង់ដារអន្តរជាតិលេខ៤៥ ក្រោមគម្រោង STDF ស្ដីពី "ការពង្រឹងការអនុលោមភាពតាមភូតគាមអនាម័យ ដើម្បីជំរុញកិច្ចពាណិជ្ជកម្មគ្រាប់ពូជនៅអាស៊ីប៉ាស៊ីហ្វីក" (STDF/PG/755) ដែលរៀបចំដោយ សមាគមអាស៊ីប៉ាស៊ីហ្វិកនៃស្ថាប័នស្រាវជ្រាវកសិកម្ម (APAARI) នៅក្រុងសៀមរាប។ 
APAARI បានសហការជាមួយ សម្ព័ន្ធគ្រាប់ពូជអាស៊ី និង ប៉ាស៊ីហ្វិក (APSA), Croplife អាស៊ី, សហព័ន្ធគ្រាប់ពូជអន្តរជាតិ (ISF) និងសមាគមពាណិជ្ជកម្មគ្រាប់ពូជអាមេរិក (ASTA) ក្នុងនាមប្រទេសបង់ក្លាដែស កម្ពុជា ឡាវ នេប៉ាល់ ហ្វីលីពីន ថៃ និងវៀតណាម បានអនុវត្តន៍គម្រោង ការពង្រឹងការអនុលោមភាពតាមវិធានភូតគាមអនាម័យដើម្បីជំរុញពាណិជ្ជកម្មគ្រាប់ពូជនៅអាស៊ីប៉ាស៊ីហ្វិក (STDF/PG/755) ចាប់ពីឆ្នាំ២០២២ ដែលត្រូវបានបញ្ជូនទៅThe Standards and Trade Developement Facility (STDF)។ 
ថ្លែងក្នុងអង្គសិក្ខាសាលា ឯកឧត្ដម បានកោតសរសើរដល់ APAARI ដែលបានរៀបចំសិក្ខាសាលានេះឡើង និងចំពោះ STDF លើការគាំទ្រគម្រោង ការពង្រឹងការអនុលោមភាពតាមវិធានភូតគាមអនាម័យដើម្បីជំរុញពាណិជ្ជកម្មគ្រាប់ពូជនៅអាស៊ីប៉ាស៊ីហ្វិក" (STDF/PG/755) ក្នុងភាពជាដៃគូឯកជនក្នុងការជំរុញពាណិជ្ជកម្មគ្រាប់ពូជនៅក្នុងតំបន់អាស៊ីប៉ាស៊ីហ្វិក និងទទួលស្គាល់ APSA, CropLife Asia, ISF, ASTA និងដៃគូប្រទេសដែលរួមគ្នាប្តេជ្ញាចិត្ត ក្នុងការអនុវត្ដគម្រោងនេះ។ 
ឯកឧត្តមបន្ថែមថា គម្រោងនេះមានសារៈសំខាន់ណាស់សម្រាប់កសិកម្មកម្ពុជា ពីព្រោះគ្រាប់ពូជ គឺជាចំណុចចាប់ផ្តើមនៃផលិតកម្ម ហើយការធានាគុណភាព និងសុវត្ថិភាពរបស់វាមានសារៈសំខាន់សម្រាប់សន្តិសុខស្បៀង និងពាណិជ្ជកម្ម ដែលជាឱកាសកម្ពុជាពង្រឹងប្រព័ន្ធភូតគាមអនាម័យ កសាងសមត្ថភាពក្រុមបច្ចេកទេស និងសិក្សាពីប្រទេសជិតខាង តាមរយៈកិច្ចសហប្រតិបត្តិការ។ ការទទួលស្គាល់មន្ទីរពិសោធន៍ភាគីទីបីនឹងក្លាយជាជំហានដ៏សំខាន់មួយឆ្ពោះទៅមុខ និងជួយបង្កើនទំនុកចិត្តលើដំណើរការចេញវិញ្ញាបនប័ត្រគ្រាប់ពូជ សម្រួលដល់ការធ្វើពាណិជ្ជកម្មគ្រាប់ពូជដោយរលូន និងបើកឱកាសថ្មីៗសម្រាប់កសិករ និងវិស័យឯកជន។
ជាចុងបញ្ចប់ ឯកឧត្តម បានថ្លែងអំណរគុណដល់ដៃគូរទាំងអស់ដែលបានជួយដល់ប្រទេសកម្ពុជា ក្នុងនាមជាប្រទេសទទួលផល និងស្នើដល់អ្នកចូលរួមទាំងអស់ប្តេជ្ញាធ្វើការរួមគ្នា ដើម្បីធានាថាលទ្ធផលនៃសិក្ខាសាលានេះ នាំទៅរកផលជាវិជ្ជមាន និងយូរអង្វែងសម្រាប់កសិករ ឧស្សាហកម្មគ្រាប់ពូជ និងតំបន់៕