ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម អញ្ជើញចូលរួមបិទវគ្គបណ្តុះបណ្តាលមន្ត្រីកសិកម្មឃុំ នៅតំបន់សមុទ្រនៃខេត្តតាកែវ

ចេញ​ផ្សាយ​ ៦ មេសា ២០២៤ 2862

នៅថ្ងៃទី០៥ ខែមេសា ឆ្នាំ២០២៤ ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  បានអញ្ជើញចូលរួមបិទកម្មវិធីវគ្គបណ្តុះបណ្តាលមន្ត្រីកសិកម្មឃុំ នៅតំបន់សមុទ្រនៃខេត្តតាកែវ នៅសណ្ឋាគារដូនកែវ ក្រុងតាកែវ ខេត្តតាកែវ។

ក្នុងពិធីបិទវគ្គបណ្តុះបណ្តាល ឯកឧត្តម ខាត់ សុធី បានថ្លែងកោតសសើរទៅលើការបណ្តុះបណ្តាលរបស់នាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងនាយកដ្ឋានដំណាំស្រូវ ទាំងខ្លឹមសារ ការពន្យល់ណែនាំពីគ្រូឧទ្ទេស និងការចូលរួមយ៉ាងផុសផុលពីសិក្ខាកាម ដែលធ្វើឲ្យវគ្គបណ្តុះបណ្តាលនេះដំណើរការរលូន ទទួលបានលទ្ធផលប្រកបដោយផ្លែផ្កា។

ទន្ទឹមនឹងនេះ ឯកឧត្តម ក៏បានក្រើនរំឭកទៅដល់មន្ត្រីកសិកម្មឃុំ/សង្កាត់ អំពីសារៈសំខាន់ និងភាពចាំបាច់នៃតួនាទីរបស់ពួកគាត់ចំពោះសហគមន៍ដែលគាត់កំពុងអនុវត្តការងារ។ មន្ត្រីកសិកម្មឃុំ/សង្កាត់ ត្រូវដឹកនាំ សម្របសម្រួល មានភាពបត់បែន ចេះបង្កើនភាពស្និទ្ធស្នាល ជាមួយកសិករ ក្តាប់បញ្ហាឲ្យបានច្បាស់លាស់ ដើម្បីជួយដល់ប្រជាកសិករប្រកបដោយប្រសិទ្ធភាព និងប្រសិទ្ធផលខ្ពស់។

បន្ថែមពីនេះ ឯកឧត្តមបានថ្លែងអរគុណចំពោះអង្គការ GIZ-MUSEFO ដែលគាំទ្រមូលនិធិតាមរយ:អង្គការ ហេឡែន ខែល័រ ក្នុងការបើកវគ្គបណ្តុះបណ្តាលនូវជំនាញសម្របសម្រួល ការណ្តុះបណ្តាលទៅលើនីតិវិធីផ្សព្វផ្សាយ សិក្សាពីដំណាំស្រូវ និងការធ្វើកសិកម្ម ដោយគិតគូរដល់អាហារូបត្ថម្ភដល់មន្ត្រីកសិកម្មឃុំ នាពេលនេះ ដើម្បីឲ្យមន្ត្រីទាំងអស់មានជំនាញ និងសមត្ថភាពធ្វើការជាមួយកសិករ និងយកចំណេះដឹងនេះទៅបំរើផលប្រយោជន៍ជូនកសិករ ឲ្យងាកមកគិតលើប្រព័ន្ធកសិកម្មទំនើប ការផលិតពូជសុទ្ធក្នុងស្រុក កាត់បន្ថយថ្លៃដើមផលិត គិតពីបរិស្ថាន កាត់បន្ថយការប្រើជីគីមី ដើម្បីលើកស្ទួយជីវភាពនិងសុខភាពរបស់ពួកគាត់ជាដើម៕