ព័ត៌មានផ្សេងៗទៀត
ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម អញ្ជើញដឹកនាំមន្ត្រីជំនាញចុះពិនិត្យ វាយតម្លៃលទ្ធផលនៃការចុះផ្សព្វផ្សាយ អន្តរាគមន៍លើការកម្ចាត់ដង្កូវហ្វូង នៅខេត្តឧត្តរមានជ័យ
ចេញផ្សាយ ២៨ មិថុនា ២០២៤ 2225
នៅថ្ងៃទី២៨ ខែមិថុនា ឆ្នាំ២០២៤ ឯកឧត្តម សៀក ឡេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារជំនាញបច្ចេកទេសពីអគ្គនាយកដ្ឋានកសិកម្ម អគ្គនាយកដ្ឋានសុខភាពសត្វ និងផលិតកម្មសត្វ មន្ទីរកសិកម្ម រុក្ខាប្រមាញ់ និងនេសាទខេត្តឧត្តរមានជ័យ អាជ្ញាធរមូលដ្ឋាន ចុះពិនិត្យវាយតម្លៃលទ្ធផលនៃការចុះផ្សព្វផ្សាយ អន្ដរាគមន៍ទាំងវិធានធម្មជាតិ និងបាញ់ថ្នាំលើដង្កូវហ្វូងនៅភូមិកំណប់ ក្រុងសំរោង ខេត្តឧត្តរមានជ័យ ។
គួរបញ្ជាក់ថា កន្លងមកនេះនៅក្នុងខេត្តឧត្តរមានជ័យ មានស្រុកចំនួន៣ គឺស្រុកអន្លង់វែង ស្រុកត្រពាំងប្រាសាទ និងក្រុងសំរោងដែលបានទទួលរងផលប៉ះពាល់ដោយដង្កូវហ្វូងលើផ្ទៃដីសរុបចំនួន ៨១៤ហិកតា ក្នុងនោះស្រូវចំនួន ១៥៤ហិកតា ដំឡូងមី ៦៥៨ហិកតា និងពោត ២ហិកតា។ ប៉ុន្តែដោយមានការចុះផ្សព្វផ្សាយ អន្តរាគមន៍ទាន់ពេលវេលា និងមានប្រសិទ្ធភាពពីគ្រប់ភាគីពាក់ព័ន្ធ និងមានភ្លៀងធ្លាក់ជាប្រចាំប៉ុន្មានថ្ងៃជាប់ៗគ្នាផង វត្តមានដង្កូវហ្វូងនៅក្នុងស្រុកទាំង៣ មានការថមថយ និងស្ទើរបាត់ទាំងស្រុង ហើយដំណាំរបស់ប្រជាកសិករមាន ស្រូវ ដំឡូងមី និងពោត បានវិលមករកស្ថានភាពធម្មតាវិញ មិនប៉ះពាល់ដល់ការលូតលាស់នោះទេ។
ក្នុងឱកាសនៃការចុះត្រួតពិនិត្យនោះ ឯកឧត្តម សៀក ឡេង បានវាយតម្លៃខ្ពស់ចំពោះលទ្ធផលដ៏ល្អប្រសើរនេះ ដែលបានស្តែងចេញពីកិច្ចខិតខំប្រឹងប្រែង និងសហការយ៉ាងសកម្ម រវាងមន្ត្រីបច្ចេកទេសពីអគ្គនាយកដ្ឋានកសិកម្ម មន្ទីរកសិកម្មខេត្ត មន្ត្រីកសិកម្មឃុំ និងអាជ្ញាធរមូលដ្ឋានគ្រប់ជាន់ថ្នាក់ បានចុះជួយផ្សព្វផ្សាយ និងអន្តរាគមន៍ជួយដល់កសិករទាន់ពេលវេលា។ ទន្ទឹមនឹងនេះ ឯកឧត្តមក៏បានណែនាំដល់គ្រប់ភាគីពាក់ព័ន្ធបន្តយកចិត្តទុកដាក់តាមដានវត្តមានដង្កូវហ្វូងនេះ ហើយកសិករក៏ត្រូវសហការ និងរាយការណ៍ជាបន្ទាន់ទៅអាជ្ញាធរមូលដ្ឋាន មន្ត្រីកសិកម្មឃុំ មន្ទីរកសិកម្មខេត្ត ឬមកក្រសួងតាមរយៈលេខទូរសព្ទ ១២៨៩ ដោយឥតគិតថ្លៃ ប្រសិនមានបញ្ហាប្រឈមណាមួយត្រូវការ ការជួយអន្ដរាគមន៍៕
