ព័ត៌មានផ្សេងៗទៀត
ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារជំនាញចុះពិនិត្យស្ថានភាពទឹកជំនន់ នៅខេត្ដរតនគិរី
ចេញផ្សាយ ២៧ កញ្ញា ២០២៥ 795
នៅថ្ងៃទី២៧ ខែកញ្ញា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដែលអមដំណើរដោយ លោក ង៉ែត ធារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តរតនគិរី និងមន្រ្ដីជំនាញពាក់ព័ន្ធ បានចុះពិនិត្យស្ថានភាពភាពទឹកជំនន់នៅក្នុងស្រុកកូនមុំ ខេត្តរតនគិរី ។
នាដំណើរចុះពិនិត្យនោះ ឯកឧត្ដមរដ្ឋលេខាធិការ រួមជាមួយក្រុមការងារបានជួបសំណះសំណាលសាកសួរព័ត៌មាន អំពីផលប៉ះពាល់ដំណាំកសិកម្ម ជាមួយនិងអាជ្ញាធរ នៅក្នុងឃុំស្រែអង្គ្រង ស្រុកកូនមុំ និងបានចុះពិនិត្យស្ថានភាពទឹកជំនន់នៅតាមភូមិសាស្រ្ដជន់លិចផ្ទាល់។
ឯកឧត្ដមរដ្ឋលេខាធិការ បានគូសបញ្ជាក់ថា គិតមកដល់ពេលនេះ ស្ថានភាពទឹកជំនន់បានលិចលង់ដំណាំរួមផ្សំមានដូចជា៖ ពោតស បន្លែ និងដំណាំទ្រទ្រង់សេដ្ឋកិច្ចមាន ដំឡូងមី សណ្តែក ស្វាយចន្ទី និងស្រូវ ហើយប្រសិនបើទឹកជំនន់នៅលិចបន្ដរយ:ពេលយូរ នោះនឹងបង្កផលប៉ះពាល់ដំណាំ និងសេដ្ឋកិច្ចពលរដ្ឋ ដោយមន្រ្តីជំនាញនឹងពិនិត្យវាយតម្លៃពីផលប៉ះពាល់តាមដំណាក់កាល។
ទន្ទឹមនឹងនោះ ឯកឧត្ដមរដ្ឋលេខាធិការ បានបន្ថែមថា ស្ថានភាពទឹកទន្លេស្រែពក(ស្ថានីយវាស់កម្ពស់ទឹក ឃុំជ័យឧត្តមស្រុកលំផាត់)គិតត្រឹមម៉ោង ០៦:០០ ព្រឹក កម្ពស់ទឹក១៣,៣៨ម៉ែត្រ(ម្សិលមិញកម្ពស់ទឹក១៣,៦៧ម៉ែត្រ) ស្រក០,២៩ម៉ែត្រ កម្ពស់ទឹកប្រកាសអាសន្ន១២,៥០ម៉ែត្រ និងស្ថានភាពទឹកទន្លេសេសាន ស្រុកវើនសៃ(ស្ថានីយវាស់កម្ពស់ទឹក ឃុំកាចូនស្រុកវើនសៃ)គិតត្រឹមម៉ោង ០៦:០០ព្រឹក កម្ពស់ទឹក ៧,៧៥ម៉ែត្រ (ម្សិលមិញកម្ពស់ទឹក ៧,០០ម៉ែត្រ កើនឡើង ០,៧៥ម៉ែត្រ កម្ពស់ទឹកប្រកាសអាសន្នកម្ពស់ ៨,៥០ម៉ែត្រ។ ចំណែកស្ថានភាពទន្លេសេសានស្រុកតាវែង(ស្ថានីយវាស់កម្ពស់ទឹកទន្លេសេសានស្រុកតាវែង) គិតត្រឹមម៉ោង ០៦:០០ ព្រឹក កម្ពស់ទឹក៧,៩០ម៉ែត្រ(ម្សិលមិញកម្ពស់ទឹក៨,១០ម៉ែត្រ ស្រក ០,២០ម៉ែត្រ កម្ពស់ទឹកប្រកាសអាសន្ន៨,០០ម៉ែត្រ ។
ជាចុងបញ្ចប់នៃដំណើរបេសកកម្មចុះពិនិត្យនោះ ឯកឧត្ដមរដ្ឋលេខាធិការ បានណែនាំដល់ថ្នាក់ដឹកនាំមន្ទីរកសិកម្មខេត្ត និងមន្រ្តីជំនាញសហការជាមួយអាជ្ញាធរពាក់ព័ន្ធ ត្រូវបន្តការតាមដានដោយយកចិត្តទុកដាក់លើការងារនេះ ប្រកបដោយស្មារតីទទួលខុសត្រូវខ្ពស់ជូនពលរដ្ឋ៕
