ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា ទទួលជួបពិភាក្សាការងារជាមួយសារព័ត៌មានអេអ៊ឹមអេស AMS អំពីកិច្ចសហការផ្សព្វផ្សាយកម្មវិធីគោលនយោបាយអាទិភាពសហគមន៍កសិកម្មទំនើប
ចេញផ្សាយ ២៦ កញ្ញា ២០២៤ 3007
នៅថ្ងៃទី២៥ ខែកញ្ញា ឆ្នាំ២០២៤ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយសារព័ត៌មានអេអ៊ឹមអេស AMS អំពីកិច្ចសហការផ្សព្វផ្សាយកម្មវិធីគោលនយោបាយអាទិភាពសហគមន៍កសិកម្មទំនើប។ ជំនួបនេះធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ។
បន្ទាប់ពីបានស្ដាប់បទបង្ហាញយ៉ាងលម្អិត លោកជំទាវ អ៊ឹម រចនា បានសម្ដែងការស្វាគមន៍ និងអរគុណចំពោះសារព័ត៌មាន AMS ដែលចាប់អារម្មណ៍អំពីកម្មវិធីគោលនយោបាយសហគមន៍កសិកម្មទំនើប និងបានរៀបចំយុទ្ធនាការផ្សព្វផ្សាយកម្មវិធីគោលនយោបាយអាទិភាពរបស់រាជរដ្ឋាភិបាលនេះ ឱ្យបានទូលំទូលាយ។
បើតាមលោកជំទាវ អ៊ឹម រចនា ការចូលរួមរបស់សារព័ត៌មានក្នុងការផ្សព្វផ្សាយព័ត៌មានពិត និងមានខ្លឹមសារគ្រប់ជ្រុងជ្រោយអំពីវិស័យកសិកម្ម មានសារៈសំខាន់ណាស់សម្រាប់សាធារណជន និងក្រសួងកសិកម្ម រុក្ខាប្រមាញ់ និងនេសាទ និយាយដោយឡែក ព្រមទាំងរាជរដ្ឋាភិបាល និយាយជារួម ស្វែងយល់និងចាប់យកឱកាស ក៏ដូចជាកំណត់ពីបញ្ហាប្រឈមនានា បានទាន់ពេលវេលាដើម្បីដោះស្រាយ។
លោកជំទាវ ក៏បានផ្ដល់អនុសាសន៍មួយចំនួនដល់សារព័ត៌មាន AMS ដើម្បីយកទៅពិចារណា និងត្រៀមខ្លួនរួចជាស្រេចដើម្បីផ្ដល់កិច្ចសហការ ដោយតម្កល់ផលប្រយោជន៍ប្រជាជន និងប្រជាជាតិជាធំ៕
