ព័ត៌មានផ្សេងៗទៀត
ការធ្វើសវនកម្មផ្ទៃក្នុងឆ្នាំ២០១៩ នៅនាយកដ្ឋានសហប្រតិបត្តិការអន្តរជាតិ
ចេញផ្សាយ ១ វិច្ឆិកា ២០១៩ 14250
នាយកដ្ឋានសហប្រតិបត្តិការអន្តរជាតិ៖ ចាប់ពីថ្ងៃចន្ទ ៨ រោច ខែអស្សុជ ដល់ថ្ងៃពុធ ៣កើត ខែកក្ដិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១-៣០ ខែតុលា ឆ្នាំ២០១៩ ប្រតិភូសវនកម្មនៃនាយកដ្ឋានសវនកម្មផ្ទៃក្នុង ដឹកនាំដោយលោក ផេង សុភ័ក្រ អនុប្រធាននាយកដ្ឋានសវនកម្មផ្ទៃក្នុង បានចុះធ្វើសវនកម្ម តាមផែនការសវនកម្មផ្ទៃក្នុងឆ្នាំ២០១៩ នៅនាយកដ្ឋានសហប្រតិបត្តិការអន្តរជាតិ។
ថ្ងៃចន្ទ ៨រោច ខែអស្សុជ ឆ្នាំកុរ ឯកស័ក ពុទ្ធសករាជ ពីរពាន់ប្រាំរយហុកសិបបី ត្រូវនឹងថ្ងៃទីម្ភៃមួយ ខែតុលា ឆ្នាំពីរពាន់ដប់ប្រាំបួន វេលាម៉ោងប្រាំបួនព្រឹក ប្រតិភូសវនកម្មផ្ទៃក្នុង នៃក្រសួងកសិកម្ម រុក្ខាប្រមាញ់ និងនេសាទ ដឹកនាំដោយលោក ផេង សុភ័ក្រ ជាប្រធានប្រតិភូសវនកម្មផ្ទៃក្នុងបានជួបប្រជុំជាមួយថ្នាក់ដឹកនាំនាយកដ្ឋានសហប្រតិបត្តិការអន្តរជាតិ ដែលមានលោក ព្រំ សុមានី ប្រធាននាយកដ្ឋានសហប្រតិបត្តិការអន្តរជាតិ ដើម្បីពិភាក្សាលើការអនុវត្តការងារសវនកម្មផ្ទៃក្នុង តាមលិខិតបញ្ជាបេសកកម្មលេខ១០៦០៧/៣៧៥ កសក.សផក ចុះថ្ងៃព្រហស្សតិ៍ ១២កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១០ ខែតុលា ឆ្នាំ២០១៩ ដែលមានសមាសភាពចូលរួមដូចខាងក្រោម៖
ក.សមាសភាពប្រតិភូសវនកម្មផ្ទៃក្នុង
១. លោក ផេង សុភ័ក្រ ប្រធានប្រតិភូសវនកម្មផ្ទៃក្នុង
២. លោក ស៊ុន សុខហេង អនុប្រធានប្រតិភូសវនកម្មផ្ទៃក្នុង
៣. លោក វ៉ឹង ឈាងហេង សមាជិក
៤. លោក ហម ផល្លា សមាជិក
៥. កញ្ញា ស្រ៊ុន សុមាវត្តី សមាជិកា
៦. កញ្ញា គង់ លក្ខិណា សមាជិកា
ខ.សមាសភាពនាយកដ្ឋានសហប្រតិបត្តិការអន្តរជាតិ
១. លោក ព្រំ សុមានី ប្រធាននាយកដ្ឋានសហប្រតិបត្តិការអន្តរជាតិ
២. លោក ជៀម ឈាងលីម អនុប្រធាននាយកដ្ឋានសហប្រតិបត្តិការអន្តរជាតិ
៣. លោក ងួន ហួត ប្រធានការិយាល័យរដ្ឋបាល និងបុគ្គលិក
៤. លោក នៅ កុម្ភៈ ប្រធានការិយាល័យអាស៊ានកសិកម្ម
៥. លោកស្រី ភុំ វណ្ណរ៉ា អនុប្រធានការិយាល័យការងារអង្កការអន្តរជាតិ
៦. កញ្ញា ក្រឹងសែន ស្រីដូច អនុប្រធានការិយាល័យកសិ-ពាណិជ្ជកម្មពិភពលោក
៧. លោក សោម បូរិន មន្ត្រីការិយាល័យកសិ-ពាណិជ្ជកម្មពិភពលោក
៨. កញ្ញា អន នាងពិសី មន្ត្រីការិយាល័យសហប្រតិបត្តិការទ្វេភាគី និងពហុភាគី
៩. លោក ហ៊ឹម សុឃួច មន្ត្រីការិយាល័យអាស៊ានកសិកម្ម
ជាកិច្ចចាប់ផ្តើមលោក ព្រំ សុមានី ប្រធាននាយកដ្ឋានសហប្រតិបត្តិការអន្តរជាតិបានមានមតិស្វាគមន៍ចំពោះវត្តមានរបស់ប្រតិភូសវនកម្មផ្ទៃក្នុងដែលបាន មកធ្វើសវនកម្មលើដំណើរការគ្រប់គ្រង និងប្រតិបត្តិការ ក៏ដូចជាការសិក្សាស្វែងយល់ពីសកម្មភាពរបស់នាយកដ្ឋាន រកចំណុចខ្វះខាត ដើម្បីកែលម្អក្នុងគោលបំណងបំពេញបន្ថែមគុណតម្លៃក្នុងការអនុវត្តការងារឱ្យកាន់តែល្អប្រសើរឡើង។ បន្ទាប់មកលោកអនុប្រធាននាយកដ្ឋានបានរៀបរាប់ពីសកម្មភាពសំខាន់ៗដែលនាយកដ្ឋានបាននឹងកំពុងអនុវត្តជូនដល់ប្រតិភូបានស្វែងយល់ និងបានជូននាទីទៅលោកប្រធានប្រតិភូសវនកម្មផ្ទៃក្នុងមានមតិបន្ត។
លោក ផេង សុភ័ក្រ ប្រធានប្រតិភូសវនកម្មផ្ទៃក្នុងសូមថ្លែងអំណរគុណយ៉ាងជ្រាលជ្រៅចំពោះការរៀបចំឱ្យមានកិច្ចប្រជុំ ជាពិសេសវត្តមានចូលរួមរបស់លោក ព្រំ សុមានី ប្រធាននាយកដ្ឋានសហប្រតិបត្តិការអន្តរជាតិ និងសហការី។ គោលបំណងសវនកម្មរួមគឺវាយតម្លៃ និងធ្វើឲ្យប្រសើរឡើងនូវប្រសិទ្ធភាពនៃដំណើរការគ្រប់គ្រងហានិភ័យ ដំណើរការត្រួតពិនិត្យ និងដំណើរការអភិបាលកិច្ច ក្នុងវិសាលភាពគ្របដណ្តប់សកម្មភាពគ្រប់គ្រង និងប្រតិបត្តិការទាំងឡាយ។ ជាទូទៅការងារសវនកម្មបានផ្តោតទៅលើការបញ្ជាក់ថាប្រព័ន្ធគ្រប់គ្រងផ្ទៃក្នុងផ្តល់នូវការធានាសមហេតុផលមួយសំដៅសម្រេចបាននូវគោលបំណងដូចខាងក្រោម៖
- គោលបំណងប្រតិបតិ្តការ : ការសម្រេចបានប្រកបដោយប្រសិទ្ធភាពនៃគោលបំណងធុរកិច្ច
- គោលបំណងព័ត៌មាន : ភាពជឿទុកចិត្ត និងភាពពេញលេញ នៃព័ត៌មានផ្នែកហិរញ្ញវត្ថុ ដែលប្រើប្រាស់ដោយថ្នាក់ដឹកនាំ និង
- គោលបំណងអនុលោមភាព : អនុលោមជាមួយច្បាប់ បទប្បញ្ញត្តិ គោលការណ៍ នីតិវិធីជាធរមាន។
ហានិភ័យគន្លឹះអាចរាប់បញ្ចូលនូវ៖
- ហានិភ័យប្រតិបតិ្តការ : ជាហានិភ័យលើការបាត់បង់ ដែលជាលទ្ធផលបរាជ័យនៃដំណើរការមនុស្ស និងប្រព័ន្ធ ឬហេតុការណ៍ពីខាងក្រៅ
- ហានិភ័យហិរញ្ញវត្ថុ : ជាលទ្ធភាពដែលព័ត៌មានផ្នែកហិរញ្ញវត្ថុត្រូវបានរៀបចំឡើងមិនត្រឹមត្រូវ ធ្វើឲ្យការសម្រេចចិត្តរបស់ថ្នាក់ដឹកនាំពុំសមស្រប និង
- ហានិភ័យអនុលោមភាព : ជាលទ្ធភាពដែលសកម្មភាពមិនអនុលោមតាមច្បាប់ និងបទប្បញ្ញតិ្ត។ លោកបានបន្ថែមទៀតថា ការធ្វើសវនកម្មពេលនេះដើម្បីត្រួតពិនិត្យលើការអនុវត្តសកម្មភាពនាយកដ្ឋានដែលវាជាផ្នែកមួយនៃការអនុវត្តផែនការសវនកម្មផ្ទៃក្នុងឆ្នាំ២០១៩ របស់នាយកដ្ឋានសវនកម្មផ្ទៃក្នុង ដែលទទួលបានការឯកភាពជាគោលការណ៍ពី ឯកឧត្តមរដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ តាមលិខិតបញ្ជាបេសកកម្មលេខ ១០៦០៧/៣៧៥ កសក.សផក ចុះថ្ងៃព្រហស្សតិ៍ ១២កើត ខែអស្សុជ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១០ ខែតុលា ឆ្នាំ២០១៩ ដំណើរការសំខាន់ៗ ដែលមានហានិភ័យដូចជាប្រព័ន្ធត្រួតពិនិត្យផ្ទៃក្នុង ការគ្រប់គ្រងហិរញ្ញវត្ថុ ការគ្រប់គ្រងទ្រព្យសម្បត្តិ្តរដ្ឋ របាយការណ៍វឌ្ឍនភាព ព្រមទាំងធ្វើការសិក្សាស្រាវជ្រាវលើសកម្មភាពថវិកានាយកដ្ឋាន ដែលបានអនុវត្តក្នុងគោលបំណងធ្វើឱ្យកាន់តែប្រសើរឡើងនូវដំណើរការគ្រប់គ្រងហានិភ័យ ការត្រួតពិនិត្យផ្ទៃក្នុង និងអភិបាលកិច្ចល្អ។ ដូច្នេះ ក្រុមការងារសវនកម្មស្នើសុំលោកប្រធាននាយកដ្ឋាន មេត្តាផ្តល់ទីកន្លែងសម្រាប់ក្រុមការងារធ្វើការ ចាត់តាំងមន្រ្តីពាក់ព័ន្ធចូលរួមសហការ និងផ្តល់ឯកសារមួយចំនួន ដើម្បីបម្រើដល់ការងារសវនកម្មដូចមានសំណើជូនភ្ជាប់។
លោកប្រធាននាយកដ្ឋានសហប្រតិបត្តិការអន្តរជាតិ បានឯកភាពតាមសំណើរបស់លោកប្រធានប្រតិភូសវនកម្មផ្ទៃក្នុង និងបានចាត់តាំងឱ្យមន្រ្តីសហការ និងផ្តល់ឯកសារនានាដែលពាក់ព័ន្ធការងារសវនកម្មផ្ទៃក្នុងតាមសំណើរបស់ប្រតិភូសវនកម្មផ្ទៃក្នុង។
ជាចុងក្រោយលោក ផេង សុភ័ក្រ ប្រធានប្រតិភូសវនកម្មផ្ទៃក្នុង បានសំដែងនូវការអរគុណចំពោះស្មារតីទទួលខុសត្រូវ និងបានចូលរួមសហការយ៉ាងល្អប្រសើរ។ កិច្ចប្រជុំរវាងថ្នាក់ដឹកនាំនាយកដ្ឋានសហប្រតិបត្តិការអន្តរជាតិ និងប្រតិភូសវនកម្មផ្ទៃក្នុងបានចប់សព្វគ្រប់ប្រកបដោយស្មារតីទទួលខុសត្រូវខ្ពស់។
