ព័ត៌មានផ្សេងៗទៀត
ឯកឧត្តមរដ្ឋមន្រ្តី វេង សាខុន អមដំណេីរដោយឯកឧត្តមប្រតិភូរាជរដ្ឋាភិបាលកម្ពុជាទទួល បន្ទុកជាអគ្គនាយកនៃអគ្គនាយកដ្ឋានកសិកម្ម និងសហការី បានបន្តចុះជួបសំណេះសំណាលជាមួយបណ្តុំកសិករសំរោងស្នោមានជ័យ ស្ថិតនៅក្នុងភូមិសំរោងស្នោ ឃុំសំរោងក្នុង ស្រុកឯកភ្នំ ខេត្តបាត់ដំបង
ចេញផ្សាយ ១១ មករា ២០២២ 5382
នៅរសៀលថ្ងៃដដែលឯកឧត្តមរដ្ឋមន្រ្តី អមដំណេីរដោយឯកឧត្តម ងិនឆាយ និងសហការី បានបន្តចុះជួបសំណេះសំណាលជាមួយបណ្តុំកសិករសំរោងស្នោមានជ័យ ស្ថិតនៅក្នុងភូមិសំរោងស្នោ ឃុំសំរោងក្នុង ស្រុកឯកភ្នំ ខេត្តបាត់ដំបង។
ក្នុងការជួបសំណេះសំណាលជាមួយលោកប្រធានបណ្តុំ បានបញ្ជាក់ឲ្យដឹងថា នៅពេលបច្ចុប្បន្ននេះ កសិករជាសមាជិកចំនួន៥០ គ្រួសារ និងមានផ្ទៃដីដាំដុះចំនួនប្រមាណ ១០ ហិកតា ដែលកំពុងធ្វើការដាំដុះផ្កាខាត់ណា ស្ពៃក្តោប ត្រសក់ និងសាឡាត់ ភាគច្រើន ដែលផ្ទៃដីដាំដុះភាគច្រើន បានមកពីកែប្រែដីធ្វើស្រែ ដែលក្នុងមួយគ្រួសារមានផ្ទៃដីប្រមាណពី ២០០០ ទៅ ៥០០០ ការ៉េ។
លោកប្រធានបណ្តុំបានបញ្ជាក់ឲ្យដឹងទៀតថា ដោយទទួលបានបណ្តុះបណ្តាលពីមន្រ្តីជំនាញរបស់មន្ទីរកសិកម្ម រុក្ខាប្រមាញ់ និងនេសាទ នៅក្នុងឆ្នាំ២០២០ តាមរយៈគម្រោងកម្មវិធីផ្សព្វផ្សាយបច្ចេកទេសកសិកម្មថ្មីដែលធន់នឹងការប្រែប្រួលអាកាសធាតុ (ASPIRE) កន្លងមក បណ្តុំកសិកម្មនេះបានធ្វើការដាំដុះបន្លែ ដោយកាត់បន្ថយការប្រេីប្រាស់ថ្នាំពុលកសិកម្ម និងជីគីមី ដោយងាកមកអនុវត្តតាមគោលការណ៍កសិកម្មល្អ GAP ហើយទទួលបានការគាំទ្រពីទីផ្សារ ជាមួយនឹងតម្លៃល្អប្រសើរ ដែលសមាជិកបណ្តុំ ភាគច្រើនទទួលបានប្រាក់ចំណូលជាមធ្យមប្រមាណជា ១០ លានរៀល ក្នុងមួយឆ្នាំ ក្រោយពីកាត់ការចំណាយ។
