ព័ត៌មានផ្សេងៗទៀត
រួមគ្នាអប់រំផ្សព្វផ្សាយដល់និស្សិតកសិកម្មដើម្បីបង្ការការប្រើប្រាស់គ្រឿងញៀន និងការឆ្លងមេរោគអេដស៍
ចេញផ្សាយ ៣ មេសា ២០២៦ 3454
នៅថ្ងៃទី៣ ខែមេសា ឆ្នាំ២០២៦ ក្រុមការងារប្រយុទ្ធប្រឆាំងនឹងគ្រឿងញៀន និងគណៈកម្មាធិការប្រយុទ្ធនឹងជំងឺអេដស៍ប្រចាំក្រសួងកសិកម្ម រុក្ខាប្រមាញ់ និងនេសាទ បានរួមសហការគ្នាជាមួយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍ ដើម្បីរៀបចំវគ្គអប់រំផ្សព្វផ្សាយដល់យុវនិស្សិតកសិកម្មនៃវិទ្យាស្ថានជាតិកសិកម្មព្រែកលៀបចំនួន ២០០នាក់ សំដៅបង្ការទប់ស្កាត់ការប្រើប្រាស់គ្រឿងញៀន និងការឆ្លងជំងឺអេដស៍។
កម្មវិធីនេះមានការអញ្ជើញចូលរួមដោយ ឯកឧត្តមរដ្ឋលេខាធិការ គង់ ច័ន្ទវាសនា, ឯកឧត្តមនាយឧត្តមសេនីយ៍ អគ្គលេខាធិការ មាស វិរិទ្ធ, ឯកឧត្តមបណ្ឌិត អគ្គលេខាធិការ ឈឹម ឃិនដារ៉េត ព្រមទាំងថ្នាក់ដឹកនាំក្រុមការងារក្រសួង គណ:គ្រប់គ្រងវិទ្យាស្ថាន គ្រូឧទ្ទេស និងថ្នាក់ដឹកនាំនៃអគ្គលេខាធិការដ្ឋាននៃអាជ្ញាធរជាតិទាំងពីរ។
ទន្ទឹមនឹងការថ្លែងអំណរគុណចំពោះថ្នាក់ដឹកនាំអគ្គលេខាធិការដ្ឋានអាជ្ញាធរទាំងពីរ និងការកោតសរសើរដល់គណ:គ្រប់គ្រងសាលាចំពោះការចូលរួមសហការរៀបចំកម្មវិធីនេះ និងការជួយផ្សព្វផ្សាយកន្លងមកដល់និស្សិត ឯកឧត្តមរដ្ឋលេខាធិការ គង់ ច័ន្ទវាសនា បានផ្តាំផ្ញើ និងលើកទឹកចិត្តបន្ថែមដល់និស្សិតទាំងអស់ ឱ្យបដិសេធគ្រឿងញៀន និងបង្ការខ្លួនពីការឆ្លងមេរោគអេដស៍ ស្របតាមទិសស្លោក "កូនល្អ មិត្តល្អ និស្សិតល្អ ពលរដ្ឋល្អ និងអនាគតទំពាំងស្នងឫស្សីល្អរបស់កម្ពុជា"។
មុននឹងបញ្ចប់កម្មវិធីអប់រំផ្សព្វផ្សាយនេះ ក្រុមនិស្សិតចំនួន ៣ក្រុម បានឡើងប្រកួតប្រជែងវោហារកោសល្យ ដោយចែករំលែកចំណេះដឹងល្អៗដែលបានស្វែងយល់ពាក់ព័ន្ធនឹងប្រធានបទគ្រឿងញៀន និងតួនាទីរបស់យុវជនក្នុងការចូលរួមប្រយុទ្ធប្រឆាំងគ្រឿងញៀនក្នុងសង្គម ដល់មិត្តភក្តិនិស្សិតដែលចូលរួមផងដែរ៕
