ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារគម្រោងកែលម្អសន្តិសុខទឹកកម្ពុជា (CaWSIP) ចុះសិក្សាទីតាំង និងពិនិត្យស្ថានភាពរបស់ប្រជាកសិករនៅក្នុងសហគមន៍កសិកម្មក្រោមវិសាលភាពគម្រោង

ចេញ​ផ្សាយ​ ៧ សីហា ២០២៥ 961

នៅថ្ងៃទី៦ ខែសីហា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CaWSIP-MAFF បានអញ្ជើញដឹកនាំក្រុមការងារថ្នាក់ជាតិចុះពិនិត្យសិក្សាពីទីតាំង និងស្ថានភាពរបស់ប្រជាកសិករនៅក្នុងសហគមន៍កសិកម្មសណ្តាន់សាមគ្គី និងសហគមន៍កសិកម្ម          ចំណាលើរីកចម្រើន ស្ថិតនៅស្រុកស្ទោង សម្រាប់អនុវត្តសមាសភាពទី៣ នៃគម្រោងកែលម្អសន្តិសុខទឹកកម្ពុជា (CaWSIP) ក្នុងតំបន់វិសាលភាពអនុវត្តគម្រោង ទំនប់៣០កញ្ញា ក្នុងខេត្តកំពង់ធំ ដោយមានការចូលរួមពី មន្ត្រីអនុវត្តគម្រោង CaWSIP-MAFF នៃក្រសួងកសិកម្មខេត្ដកំពង់ធំ អាជ្ញាធរ-ស្រុក-ឃុំ មន្ត្រីកសិកម្មឃុំ  តំណាងសហគមន៍កសិកម្ម និងកសិករចំនួន៥៦នាក់។

ក្នុងជំនួបពិភាក្សា ឯកឧត្តមរដ្ឋលេខាធិការ បានគូសបញ្ជាក់ថា  ដំណើរចុះត្រួតពិនិត្យនេះ ពិតជាមានសារ:សំខាន់ ក្នុងការកំណត់សក្កានុពលវិស័យកសិកម្ម និងបញ្ហាប្រឈម ក្នុងតំបន់អនុវត្ដគម្រោង ហើយដំណើរអនុវត្តគម្រោងទៅបានដោយរលូន ក៏ទាមទារការចូលរួមជាចាំបាច់ពីរដ្ឋបាលឃុំ-ស្រុក លើការជួយសម្របសម្រួលគាំទ្រដល់សហគមន៍កសិកម្មដែលនឹងទទួលបានការគាំទ្រហេដ្ឋារចនាសម្ព័ន្ធពីគម្រោងផងដែរ។ បន្ថែមពីនេះ ឯកឧត្ដម បានណែនាំសហគមន៍ ធ្វើយ៉ាងណា ត្រូវរៀបចំផែនការផលិតកម្ម ផែនការផ្គត់ផ្គង់ទីផ្សារ ដើម្បីជំរុញដំណើរការផលិតកម្មប្រកបដោយនិរន្តរភាព។       

ឆ្លៀតក្នុងឱកាសនេះ ឯកឧត្តមរដ្ឋលេខាធិការ និងក្រុមការងារគម្រោង បានចុះពិនិត្យស្ថានភាពទីតាំងផលិតកម្ម  របស់សហគមន៍កសិកម្មសណ្តាន់សាមគ្គី  និងសហគមន៍កសិកម្មចំណាលើរីកចម្រើន  តាមទីតាំងផលិតកម្មរបស់សហគមន៍ និងបានបន្ដចុះជួបពិភាក្សាជាមួយប្រធានគ្រប់គ្រងផ្សារវិនិយោគដោយក្រុមហ៊ុនជប៉ុននៅទីរួមស្រុកស្ទោង ខេត្តកំពង់ធំ។ ជាលទ្ធផល ប្រធានគ្រប់គ្រងទីផ្សារបានគាំទ្រ និងសហការ ជាមួយគម្រោង តាមរយៈការទទួលយកផលិតផលបន្លែរបស់សហគមន៍កសិកម្មដែលផលិតបាន មកដាក់លក់នៅផ្សារ ទាំងបោះដុំ និងលក់រាយ៕