ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យ ឯកឧត្តម Hidehisa Horinouchi ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារស្តីពីកិច្ចសហប្រតិបត្តិការរវាងព្រះរាជាណាចក្រកម្ពុជា និងប្រទេសជប៉ុន លើវិស័យជលផល

ចេញ​ផ្សាយ​ ២ វិច្ឆិកា ២០១៨ 3582

បន្ទាប់ពីជំនួបរវាងឯកឧត្តមរដ្ឋមន្ត្រី និងសាកលវិទ្យាល័យណាហ្គូយ៉ាត្រូវបានបញ្ចប់ នារសៀលម៉ោង ១៦:០០ ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យ ឯកឧត្តម Hidehisa Horinouchi ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារស្តីពីកិច្ចសហប្រតិបត្តិការរវាងព្រះរាជាណាចក្រកម្ពុជា និងប្រទេសជប៉ុន លើវិស័យជលផល។

ជាកិច្ចស្វាគមន៍ក្នុងនាមឲ្យរាជរដ្ឋាភិបាលកម្ពុជា និងឯកឧត្តមរដ្ឋមន្ត្រីផ្ទាល់ សូមថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលជប៉ុន ដែលបានដើរតួនាទីជាតួអង្គយ៉ាងសំខាន់ក្នុងការស្តារ និងអភិវឌ្ឍន៍ប្រទេសកម្ពុជា លើគ្រប់វិស័យ ជាពិសេសវិស័យកសិកម្ម។ ឯកឧត្តមរដ្ឋមន្ត្រីជឿជាក់ថា កិច្ចសហប្រតិបត្តិការយ៉ាងស៊ីជម្រៅរវាងប្រទេសទាំងពីរ នឹងបន្តប្រកបដោយចីរភាព។

នាក្នុងឱកាសនេះ ឯកឧត្តម ឯកអគ្គរាជទូតសូមធ្វើការកោតសរសើរ និងវាយតម្លៃខ្ពស់ចំពោះការអភិវឌ្ឍន៍នៃប្រទេសកម្ពុជាក្រោមការដឹកនាំដ៏ឈ្លាសវៃរបស់រាជរដ្ឋាភិបាល។ ចំពោះជំនួបនាថ្ងៃនេះ ឯកឧត្តម ឯកអគ្គរាជទូតបានជម្រាបថាគឺដើម្បីពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យជលផល រួមជាមួយការអញ្ជើញឯកឧត្តមរដ្ឋមន្ត្រីទៅធ្វើទស្សនកិច្ចផ្លូវការ និងជូលរួមកិច្ចប្រជុំនៅប្រទេសជប៉ុន ក្នុងខែមេសា ឆ្នាំ២០១៩ ខាងមុខ។

លទ្ធផលដែលទទួលបានពីជំនួបនាថ្ងៃនេះ គឺភាគីទាំងពីរបានឯកភាពគ្នាលើការបន្តការងារ ពង្រឹងនិងពង្រីកកិច្ចសហប្រតិបត្តិការលើវិស័យជលផល ធ្វើយ៉ាងណារួមគ្នាអភិវឌ្ឍន៍វិស័យនេះឲ្យកាន់តែរីកចម្រើន និងមាននិរន្តរភាព។