ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម អញ្ជើញចូលរួមកិច្ចប្រជុំថ្នាក់រដ្ឋមន្រ្តី នៃសន្និសីទ អង្គការស្បៀង និងកសិកម្ម (FAO) ប្រចាំតំបន់អាស៊ី និងប៉ាស៊ីហ្វិកលើកទី៣៧ (37th APRC)

ចេញ​ផ្សាយ​ ២១ កុម្ភៈ ២០២៤ 3490

នៅថ្ងៃទី១៩ ដល់ថ្ងៃទី២២ ខែកុម្ភៈ ឆ្នាំ២០២៤ នេះ ដោយបានទទួលនូវការអនុញ្ញាតដ៏ខ្ពង់ខ្ពស់ពីសំណាក់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម  រុក្ខាប្រមាញ់  និងនេសាទ ឯកឧត្ដម ប្រាក់ ដាវីដ រដ្ឋលេខាធិការក្រសួងកសិកម្ម បានអញ្ជើញដឹកនាំសហការី រួមទាំងតំណាងអង្គការស្បៀង និងកសិកម្ម (FAO)ប្រចាំកម្ពុជា ចូលរួមកិច្ចប្រជុំថ្នាក់រដ្ឋមន្រ្តី នៃសន្និសីទអង្គការស្បៀងនិងកសិកម្ម(FAO) ប្រចាំតំបន់អាស៊ី និងប៉ាស៊ីហ្វិកលើកទី៣៧ (37th APRC) នៅទីក្រុងកូឡំបូ ប្រទេសស្រីលង្កា។

ពិធីបើកកិច្ចប្រជុំថ្នាក់រដ្ឋមន្រ្តីនេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ពីសំណាក់ប្រធានាធិបតីស្រីលង្កា និងដឹកនាំការប្រជុំពិភាក្សាដោយរដ្ឋមន្រ្តីក្រសួងកសិកម្មស្រីលង្កា ខណៈកិច្ចប្រជុំប្រព្រឹត្តទៅរយៈពេល៤ថ្ងៃ ពោលគឺចាប់ពីថ្ងៃ១៩ ដល់ថ្ងៃទី២២ ខែកុម្ភៈ ឆ្នាំ២០២៤។

គោលបំណងនៃកិច្ចប្រជុំថ្នាក់រដ្ឋមន្រ្តី គឺដើម្បីពិនិត្យពិភាក្សាទៅលើការពន្លឿនសម្រេចឲ្យបាននូវគោលដៅអភិវឌ្ឍន៍ប្រកបដោយចីរភាព តាមរយៈការធ្វើទំនើបកម្ម និងឌីជីថលវូបនីកម្មសម្រាប់វារីវប្បករ និងកសិករចិញ្ចឹមសត្វ។ អង្គប្រជុំក៏បានពិនិត្យពិភាក្សាអំពីស្ថានភាពសន្តិសុខស្បៀងនិងអាហារូបត្ថម្ភនៅក្នុងតំបន់ ដោយផ្ដោតជាសំខាន់លើវិបត្តិដែលកើតមានកន្លងមក និងសកម្មភាពដែលនឹងត្រូវអនុវត្តនាពេលអនាគត។

អង្គប្រជុំក៏បានពិភាក្សាផងដែរលើការកសាងភាពធន់ នៅក្នុងការធ្វើបរិវត្តកម្មប្រព័ន្ធស្បៀង ការវិនិយោគ និងការផ្ដល់ហិរញ្ញប្បទានក្នុងការធ្វើទំនើបកម្ម និងការកាត់បន្ថយភាពក្រីក្រនៅក្នុងប្រជាជាតិសមាជិក ដោយផ្ដោតការយកចិត្តទុកដាក់លើការសន្សំសំចៃស្បៀងអាហារ ទឹក និងការកាត់បន្ថយការបាត់បង់និងការខ្ជះខ្ជាយស្បៀងអាហារ។ ទន្ទឹមនឹងនេះដែរ អង្គប្រជុំក៏បានផ្ដល់វេទិកាដល់​ប្រទេសសមាជិកចូលរួមដើម្បីធ្វើបទអន្តរាគមន៍អំពីកិច្ចការងារអាទិភាពរបស់ប្រទេសនីមួយៗ និងតម្រូវការនៅក្នុងតំបន់។

សូមបញ្ជាក់ថា កិច្ចប្រជុំនេះក៏មានការអញ្ជើញចូលរួមពីអគ្គនាយកអង្គការស្បៀង និងកសិកម្ម ជំនួយការអគ្គនាយក និងជាតំណាងអង្គការ FAO ប្រចាំតំបន់អាស៊ីនិងប៉ាស៊ីហ្វិក និងរដ្ឋមន្រ្តី អនុរដ្ឋមន្រ្តីនៃប្រជាជាតិសមាជិកចំនួន៤៦ ព្រមទាំងប្រទេសមួយចំនួនទៀតចូលរួមតាមប្រព័ន្ធអនឡាញពីចម្ងាយ៕