ព័ត៌មានផ្សេងៗទៀត
ទំនាក់ទំនងរវាងអ្នកផលិតនិងអ្នកទិញគឺជាចំណុចសំខាន់
ចេញផ្សាយ ២២ មករា ២០១៨ 4064
ឯកឩត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ទាក់ទិន ទៅនឹងការនាំចេញអង្ករចេញ តាមអ្វីដែលរដ្ឋាភិបាល ចង់បាននាឆ្នាំ២០១៥ខាងមុខនោះថា ដើម្បីសម្រេចនូវគោលដៅនេះ គឺការផ្សារភ្ជាប់ រវាងអ្នកលផលិតសហគមន៍ និងអ្នកទិញ អ្នកនាំចេញជាប្រការសំខាន់មិនអាចខ្វះបាន។
ថ្លែងនៅក្នុងឱកាសបិទសន្និបាតកសិករ លើកទី២ទូទាំងប្រទេស កាលពីរសៀលថ្ងៃទី២២ ខែកុម្ភៈនេះ ឯកឧត្តមរដ្ឋមន្ត្រី បានបញ្ជាក់ថា ការប្រមូលផ្តុំផលិតកម្មស្រូវ ក៏ជាចំណុចគ្រឹះមួយសំខាន់ផងដែរ ពោលគឺសំដៅសម្រួលដល់ការផ្គត់ផ្គង់ និងប្រមូលទិញ ជាលក្ខណៈទ្រង់ទ្រាយធំ តាមរយៈសហគមន៍កសិកម្ម ឬសហករណ៍កសិកម្ម ។
ប្រសិនបើផលិតផលស្រូវនៅរាយប៉ាយ គ្រប់ទីកន្លែង និងមិនចម្រុះ ទៅដោយប្រភេទពូជច្រើនមុខនោះ បរិមាណ និងគុណភាពអង្ករ ពិតជាមិនអាចឆ្លើយតបបាន ទៅនឹងសេចក្តីត្រូវការឡើយ។ ដូច្នេះទាមទារឲ្យមានការប្រមូលផ្តុំផលិតកម្មស្រូវជាចាំបាច់ ហើយសហគមន៍កសិកម្ម គឺជាមូលដ្ឋានផលិតកម្ម និងផ្គត់ផ្គង់ស្រូវដ៏សំខាន់ នាពេលអនាគត។
ឯកឧត្តមបន្តទៀតថា ក្នុងន័យនេះក្រសួងកសិកម្ម នឹងត្រូវតម្រង់ទិស នៃការអន្តរាគមន៍ ទៅរកការពង្រឹងសមត្ថភាព របស់សហគមន៍កសិកម្ម ដើម្បីផលិត ក្នុងទ្រង់ទ្រាយធំនាពេលខាងមុខ។ ដូច្នេះការផ្សារភ្ជាប់រវាងក្រុមអ្នកផលិត ឬសហគមន៍កសិកម្ម និងអ្នកម្រមូលទិញដែលជាម្ចាស់រោងម៉ាស៊ីនកិនស្រូវ ក្រុមហ៊ុនប្រមូលទិញ អ្នកនាំចេញតាយន្តការផលិតកម្មកសិកម្ម តាមកិច្ចសន្យា ដែលរាជរដ្ឋាភិបាលទើបអនុម័ត លើអនុក្រឹត្យនេះ កាលពីថ្ងៃទី១១ខែកុម្ភៈ ឆ្នាំ២០១១ កន្លងមកថ្មីៗនេះ គឺជាចំណុចយុទ្ធសាស្ត្រដ៏សំខាន់ផងដែរ ក្នុងការសម្រេចបានទិសដៅគោលនយោបាយនេះ។
តាមរយៈនៃការលើករបស់ឯកឧត្តមរដ្ឋមន្ត្រី គឺរាជរដ្ឋាភិបាលបានដាក់ឲ្យអនុវត្ត នូវឯកសារគោលនយោបាយ ស្តីពីការជំរុញផលិតកម្មស្រូវ និងការនាំចេញអង្ករ ដែលជាត្រីវិស័យចង្អុលផ្លូវមួយ ដ៏សំខាន់ដើម្បីណែនាំតម្រង់ទិស ឲ្យភាគីពាក់ព័ន្ធ ក្នុងផលិតកម្ម និងអាជីវកម្មស្រូវ អង្ករ នេះអនុវត្តសំដៅជំរុញផលិតកម្មស្រូវ និងការនាំចេញអង្ករ ឲ្យមានសន្ទុះលឿនទៅមុខ ស្របតាមនិន្នាការ រីកចម្រើននៃទីផ្សារសកល។ សូចនាករដែលកំណត់ក្នុងទិសដៅ នៃគោលនយោបាយនេះ គឺឡើងយ៉ាងណាឲ្យកម្ពុជា មានផលិតផលស្រូវ ដែលផលិតលើសប្រមាណជាង៤លានតោន និងមានលទ្ធភាពនាំចេញអង្ករ ជាផ្លូវការយ៉ាងតិច១លានតោន នៅឆ្នាំ២០១៥ដែលនេះទាមទារ ឲ្យគ្រប់ក្រសួងស្ថាប័នជំនាញពាក់ព័ន្ធ ត្រូវតែចាត់វិធានការសមស្រប និងបន្ទាន់។
ឯកឧត្តមរដ្ឋមន្ត្រី បានបញ្ជាក់ថា ដើម្បីឆ្លើយតបបាន នូវទិសដៅគោលនយោបាយ ដែលបានដាក់ឲ្យអនុវត្តនេះ ការបង្កើនផលិតភាព ពិសេសប្រពលវប្បកម្មដំណាំស្រូវ គឺជាចំណុចគន្លឹះ ដែលនឹងត្រូវយកចិត្តទុកដាក់ ជាអាទិ៍ៈ ការបង្កើនសេវាកម្ម និងអន្តរាគមន៍នានា ដើម្បីជួយដល់ការបង្កើនផលិតផលស្រូវ តាមរយៈការផ្ទេរបច្ចេកទេសសមស្របកសិករ បង្កើនការស្រាវជ្រាវនិងអភិវឌ្ឍន៍ពូជស្រូវដែលស្របនឹងលក្ខណៈដី កត្តាអាកាសធាតុ និងពិសេសការសម្រិតសម្រាំងពូជស្រូវសំខាន់នីមួយៗ ស្របតាមតម្រូវការទីផ្សារដែលចង់បានជំរុញការប្រើប្រាស់ពូជស្រូវទាំងនោះ ឲ្យបានទូលំទូលាយដល់់ស្រទាប់កសិករ រួមជាមួយ និងការគ្រប់គ្រងនិងប្រើប្រាស់ដីប្រកបដោយប្រសិទ្ធភាពខ្ពស់។
គួររំលឹកថា កាលពីឆ្នាំកន្លងទៅសន្និបាតកសិករលើកទី១ បានទៅនៅថ្ងៃទី១១ខែកុម្ភៈឆ្នាំ២០១០ប្រកបដោយជោគជ័យដោយមានការពីកសិករចំនួន១៤៩រូប មកពី២៤ខេត្ត រាជធានីទូទាំងប្រទេស ដើម្បីធ្វើការប្រកួតប្រជែងដណ្តើមយកជ័យលាភី ចំនួន៥រូប ក្នុងមួយប្រធានបទលើប្រធានបទចំនួន។ ឆ្នាំនេះសន្និបាត មានកសិករចូលរួមចំនួន១៧៤រូប រួមទាំងសមាជិកសមាជិកាចូលរួម ក្នុងអង្គសន្និបាតលើកនេះ សរុបចំនួន២៦០នាក់។ សន្និបាតលើកនេះ គណៈកម្មការ បានរៀបចំប្រធានបទចំនួន៦ សម្រាប់ការប្រកួតប្រជែង ដណ្តើមយកជ័យលាភី ដោយគ្រាន់តែបន្ថែមប្រធានបទមួយទៀត គឺប្រព័ន្ធកសិកម្មចម្រុះ។ ដោយឡែកនៅក្នុងប្រធានបទការកែច្នៃផលិតផលកសិកម្ម ក៏មានបន្ថែមអំពីការកែច្នៃផលិតផលផងដែរ។
លើកនេះដែរ មានវត្តមានរបស់បងប្អូនកិសិករឆ្នើមចំនួន៣០រូប ដែលបានចូលរួមធ្វើការប្រកួតប្រជែង ដើម្បីទទួលបានជ័យលាភី លើប្រធានបទទាំង៦។ ឯកឧត្តមរដ្ឋមន្ត្រី បានថ្លែងទៀតថា ផលិតភាពកសិកម្ម របស់យើងបាន និងកំពុងបន្តកើនឡើងជាលំដាប់ តាមរយៈការបង្កើនទិន្នផលស្រូវ និងការបង្កើនផ្ទៃដីដាំស្រូវ ហើយនិងការពង្រីកប្រព័ន្ធស្រោចស្រព។
របាយការណ៍បូកសរុបលទ្ធផល បញ្ចប់បណ្តោះអាសន្នការងារបង្កបង្កើនផលឆ្នាំ២០១០-២០១១ បានបង្ហាញឲ្យឃើញថា ការប៉ាន់ស្មានតុល្យភាពស្បៀង សម្រាប់ឆ្នាំ២០១០នេះសល់ គិតជាអង្ករចំនួនប្រមាណជាង២,៤២លានតោន ហើយបើគិតជាស្រូវចំនួនប្រមាណជាង៣,៧៨លានតោន លើសឆ្នាំមុនប្រមាណ ០,៥១លានតោន (ឆ្នាំមុនសល់អង្ករប្រមាណ ២,០៩លានតោន)។ រីឯល្បឿនផលិតកម្មស្រូវប្រាំង មកដល់ពេលនេះ គឺអនុវត្តបានជិត៤០ម៉ឺន ហិចតាត្រូវជា១១៧ភាគរយ។ ចំពោះការដាំដុះដំណាំរួមផ្សំ និងដំណាំឧស្សាហកម្ម គឺមានលក្ខណៈល្អប្រសើរជាងឆ្នាំមុនដោយសារតម្រូវការ និងតម្លៃនៅលើទីផ្សារមានការកើនឡើងដូចជា ផលិតផលកៅស៊ូ ដំឡូងមី ស្វាយចន្ទី ពោតក្រហម សណ្តែកសៀងជាដើម ។
