ឯកឧត្តមអនុរដ្ឋលេខាធិការ សៀក ឡេង អញ្ជើញជួបតំណាងក្រុមហ៊ុន Branch of Guud (International) Pte Ltd (GUUD) ដែលមានឯកទេសក្នុងការរៀបចំអភិវឌ្ឍប្រព័ន្ធគ្រប់គ្រងទិន្នន័យ និងលំហូរការងារ

ចេញ​ផ្សាយ​ ៤ មីនា ២០២៥ 3169

នៅថ្ងៃទី៤ ខែមីនា ឆ្នាំ២០២៥ ឯកឧត្តម សៀក ឡេង អនុរដ្ឋលេខាធិការទទួលបន្ទុកការងារឌីជីថល នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញទទួលជួបតំណាងក្រុមហ៊ុន GUUD ដើម្បីស្តាប់បទបង្ហាញអំពីការរៀបចំអភិវឌ្ឍប្រព័ន្ធ/កម្មវិធីសម្រាប់គ្រប់គ្រងទិន្នន័យ លំហូរការងារ និងប្រព័ន្ធទិន្នន័យសម្រាប់ស្នើសុំចុះបញ្ជី លិខិតអនុញ្ញាត ឬវិញ្ញាបនបត្រផ្សេងៗ សម្រាប់សេវាសាធារណៈរបស់ក្រសួងតាមប្រព័ន្ធអេឡិចត្រូនិក។

បន្ទាប់ពីបានស្តាប់ការធ្វើបទបង្ហាញរួច ឯកឧត្តមអនុរដ្ឋលេខាធិការ បានថ្លែងអំណរគុណចំពោះតំណាងក្រុមហ៊ុន GUUD ដែលបានចំណាយពេលវេលា ដើម្បីចែករំលែកនូវបច្ចេកវិទ្យាល្អៗ និងបទពិសោធន៍របស់ខ្លួនក្នុងការរៀបចំប្រព័ន្ធទាំងនេះ ដែលកន្លងមកក្រុមហ៊ុនក៏បានសហការក្នុងការរៀបចំជូនស្ថាប័នផ្សេងៗ ក្នុងព្រះរាជាណាចក្រកម្ពុជាផងដែរ។

នាឱកាសនេះ ឯកឧត្តមអនុរដ្ឋលេខាធិការ បានឱ្យដឹងថា ប្រព័ន្ធទាំងនេះ នឹងជួយបង្កើនប្រសិទ្ធភាពការងារ ការគ្រប់គ្រង និងប្រមូលផ្តុំរាល់ទិន្នន័យពីគ្រប់អង្គភាពក្រោមឱវាទរបស់ក្រសួង ព្រមទាំងឆ្លើយតបបានយ៉ាងឆាប់រហ័ស ចំពោះធុរកិច្ចជនលើការស្នើសុំសេវាសាធារណៈផ្សេងៗរបស់ក្រសួងជាដើម។

បន្ថែមពីនេះ ឯកឧត្តមបានបញ្ជាក់ផងដែរថា បច្ចុប្បន្ននេះ ក្រសួងបាននិងកំពុងរៀបចំដាក់បញ្ចូលសេវាសាធារណៈរបស់ខ្លួនជាទំរង់អេឡិចត្រូនិក ដែលធុរកិច្ចជនអាចស្នើសុំសេវាទាំងនោះតាមប្រព័ន្ធអនឡាញដើម្បីកាត់បន្ថយនូវភាពស្មុគស្មាញ ពេលវេលា និងមានភាពងាយស្រួលជាងមុន។ ជាក់ស្តែងកន្លងមកនេះ ក្រសួងបានដាក់បញ្ចូលសេវាចំនួន២៤ប្រភេទ សេវាតាមទំរង់អេឡិកត្រូនិក ប្រព័ន្ធបញ្ជរតែមួយជាតិ និងកំពុងរៀបចំដាក់បញ្ចូលសេវាសាធារណៈចំនួន៤១បន្ថែមទៀត ចូលក្នុងប្រព័ន្ធផ្តល់សេវាសាធារណៈតាមប្រព័ន្ធអេឡិចត្រូនិកសម្រាប់ធុរកិច្ចថែមទៀតផង។

ជាទីបញ្ចប់ ឯកឧត្តមអនុរដ្ឋលេធិការ សង្ឃឹមថា នឹងមានឱកាសសហការជាមួយក្រុមហ៊ុន ក្នុងការរៀបចំ និងអភិវឌ្ឍប្រព័ន្ធឌីជីថលផ្សេងៗទៀត ដើម្បីជំរុញការធ្វើបរិវត្តកម្មឌីជីថលរបស់ក្រសួងឱ្យកាន់តែមានប្រសិទ្ធភាព និងប្រសិទ្ធផលខ្ពស់៕