ឯកឧត្តមរដ្ឋមន្រ្តី វេង សាខុន រួមជាមួយឯកឧត្តមអភិបាលរងខេត្ត ឯកឧត្តមរដ្ឋលេខាធិការទទួលបន្ទុកអគ្គនាយកដ្ឋានកសិកម្ម ឯកឧត្តមអនុរដ្ឋលេខាធិការ ឯកឧត្តមប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម លោកអភិបាលស្រុក និងសហការី បានអញ្ជើញមកចូលរួមពិធីចែកប័ណ្ណកម្មសិទ្ធិក្បាលដីជូនមន្ត្រីរាជការ និវត្តន៍ជន និងប្រជាពលរដ្ឋ នៅកសិដ្ឋានផលិតពូជស្រូវទួលសំរោង ខេត្តបាត់ដំបង

ចេញ​ផ្សាយ​ ១៧ កញ្ញា ២០២២ 6625

នៅព្រឹកថ្ងៃព្រហស្បត្តិ៍ ៥រោច ខែភទ្របទ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៥ ខែកញ្ញា ឆ្នាំ២០២២ ឯកឧត្តមរដ្ឋមន្រ្តី វេង សាខុន រួមជាមួយឯកឧត្តមអភិបាលរងខេត្ត ឯកឧត្តមរដ្ឋលេខាធិការទទួលបន្ទុកអគ្គនាយកដ្ឋានកសិកម្ម ឯកឧត្តមអនុរដ្ឋលេខាធិការ ឯកឧត្តមប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម លោកអភិបាលស្រុក និងសហការី បានអញ្ជើញមកចូលរួមពិធីចែកប័ណ្ណកម្មសិទ្ធិក្បាលដីជូនមន្ត្រីរាជការ និវត្តន៍ជន និងប្រជាពលរដ្ឋ នៅកសិដ្ឋានផលិតពូជស្រូវទួលសំរោង ខេត្តបាត់ដំបង យោងតាមអនុក្រឹត្យលេខ ១៣៣អនក្រ.បក ចុះ​ថ្ងៃ​ទី១០ ខែសីហា ឆ្នាំ២០២១ ស្តីពី "ការធ្វើអនុប្បយោគដើម្បីកាត់ដីទំហំ ៣៦ ៧៨៣ម៉ែត្រការ៉េ សម្រាប់ធ្វើ​ប្រទាន​​​កម្មជូនមន្ត្រីរាជការ និវត្តន៍ជន និងប្រជាពលរដ្ឋចំនួន ៤៤គ្រួសារ" ដែលជាអតីតមន្រ្តីបម្រើការងារ និងស្នាក់នៅ ក្នុងបរិវេនមជ្ឈមណ្ឌលជាច្រើនឆ្នាំមកហើយ។ មានមតិសំណេះសំណាលជាមួយបងប្អូននាព្រឹកនេះ ឯកឧត្តមរដ្ឋមន្ដ្រីបានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសម្តេចតេជោ ហ៊ុន សែន នាយករដ្ឋមន្រ្តី សម្តេចកិត្តិព្រឹទ្ធបណ្ឌិតមកជូនបងប្អូន ហើយសម្តេចបានថ្លែងអំណរគុណចំពោះបងប្អូនមន្រ្តី បុគ្គលិក កម្មករទាំងអស់ដែលបានលះបងកំលាំងកាយ ចិត្ត ចំណេះដឹង និងបទពិសោធន៍ល្អៗខិតខំផលិតពូជស្រូវសម្រាប់ផ្គត់ផ្គង់ឲ្យប្រជាកសិករនៅទូទាំងប្រទេស និងបានជួយមើលថែរក្សា ការពារ និងអភិវឌ្ឍន៍កសិដ្ឋានដែលជាសម្បត្តិរបស់រដ្ឋបានគង់វង្ស រីកចម្រើន ជាងនេះទៅទៀតបងប្អូននៅតែបន្តចិញ្ចឹមចិត្តគាំទ្រសម្តេចតេជោរហូតតរៀងមក។ ក្រៅពីសារជូនពរ ប័ណ្ណកម្មសិទ្ធិក្បាលដីនេះគឺជាអំណោយដ៏ថ្លៃថ្លារ និងជារង្វាន់លើកទឹកចិត្ត បញ្ជាក់ពីគុណបំណាច់របស់បងប្អូនដែលសម្តេចតេជោបានប្រគល់ជូន និងជូនពរឲ្យមន្រ្តីរាជការ និវត្តន៍ជន និងប្រជាពលរដ្ឋទាំង ៤២គ្រួសារជួបតែពុទ្ធិពរទាំង ៤ប្រការ។ ឯកឧត្តមរដ្ឋមន្ដ្រីបានថ្លែងអំណរគុណយ៉ាងជ្រាលជ្រៅបំផុតជូនសម្តេចតេជោ ដែលសម្តេចបានឆ្វេងយល់អំពីបញ្ហារបស់បងប្អូន និងបានផ្តល់អនុសាសន៍ដ៏ខ្ពង់ខ្ពស់ជូនក្រសួងកសិកម្ម រុក្ខាប្រមាញ់ និងនេសាទធ្វើការដោះស្រាយបញ្ហាជូនមន្រ្តីរាជការ និវត្តន៍ជន និងប្រជាពលរដ្ឋបានទាន់ពេលវេលា និងមានប្រសិទ្ធភាពខ្ពស់ ជាក់ស្តែងគឺប័ណ្ណកម្មសិទ្ធិក្បាលដីដែលនឹងចែកជូន នាពេលនេះ។ ឯកឧត្តមរដ្ឋមន្ដ្រីបានថ្លែងអំណរគុណជូនក្រសួងសេដ្ឋកិច្ច និងហិរញ្ញវត្ថុ អាជ្ញាធរខេត្ត ស្រុក ដែលបានសហការ និងផ្តល់ធាតុចូលសំខាន់ៗជាគន្លឹះដោះស្រាយវិវាទក្នុងកសិដ្ឋានកន្លងមក សម្រេចទទួលបានលទ្ធផលល្អប្រសើរនាថ្ងៃនេះ។ លទ្ធផលនេះក៏មិនអាចកាត់ផ្តាច់បានពីការខិតខំប្រឹងប្រែង យកអស់ស្មារតីទទួលខុសត្រូវរបស់ឯកឧត្តមថ្នាក់ដឹកនាំអគ្គនាយកដ្ឋានកសិកម្ម អង្គភាពពាក់ព័ន្ធ និងលោកប្រធានកសិដ្ឋានតាំងពីឆ្នាំ២០១៧ ដែលបានគិតគូ ដោះស្រាយបញ្ហាជូនបងប្អូនឲ្យទៅតាំងទីលំនៅថ្មីក្រៅកសិដ្ឋាន ដើម្បីយកទីតាំងនេះធ្វើការអភិវឌ្ឍហេដ្ឋារចនាសម្ព័ន្ធ រោងសម្ងួត និងឃ្លាំងស្តុកពូជស្រូវ ក្នុងបំណងពង្រីកសក្តានុពលផលិតពូជស្រូវទាំងបរិមាណ និងគុណភាព សមស្របតាមសេចក្តីត្រូវការពូជស្រូវនាពេលបច្ចុប្បន្ន។ ឯកឧត្តមរដ្ឋមន្ដ្រី រួមជាមួយសហការីបានចូលរួមអបអរសាទរ និងបានផ្តាំផ្ញើឲ្យបងប្អូនខិតខំកសាងជីវភាពលើដីដែលជាកម្មសិទ្ធិរបស់ខ្លួនឲ្យបានចម្រុងចម្រើន ហើយចំពោះបងប្អូនដែលមិនទាន់ចូលនិវត្តន៍ក៏ត្រូវបន្តខិតខំបម្រើការងារឲ្យអស់ពីសមត្ថភាព ដើម្បីចូលរួមអភិវឌ្ឍន៍កសិដ្ឋានបន្តទៀត។ សំខាន់ជាងនេះ បងប្អូនមិនគួរលក់ ដោះដូរដីជាកម្មសិទ្ធិរបស់បងប្អូន ហើយឈប់ជឿ ស្តាប់ការបំភ្លៃ បំភាន់ព័ត៌មាន និងញុះញុង ទាក់ទងនឹងការចែកប័ណ្ណកម្មសិទ្ធិនេះឡើយ។