ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារ ចុះពិនិត្យការប្រមូលផលមៀនប៉ៃលិន និងស្វាយកែវល្មៀត នៅក្រុងប៉ៃលិន ខេត្តប៉ៃលិន
ចេញផ្សាយ ៤ មីនា ២០២៦ 1570
នៅថ្ងៃទី៤ ខែមីនា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារបច្ចេកទេស ដែលមានការចូលរួមពី ឯកឧត្តម សុខ វិសាល អនុរដ្ឋលេខាធិការ លោក យិន ច័ន្ទសុធី អគ្គនាយករងនៃអគ្គនាយកដ្ឋានកសិកម្ម និងលោក សាយ សុផាត ប្រធានមន្ទីរកសិកម្មខេត្តប៉ៃលិន ចុះពិនិត្យផ្ទាល់នូវការប្រមូលផល និងការកែច្នៃកសិផលក្នុងក្រុងប៉ៃលិន ខេត្តប៉ៃលិន។
ក្នុងបេសកកម្មនេះ ឯកឧត្តមរដ្ឋលេខាធិការ និងក្រុមការងារបានជួបម្ចាស់ចម្ការមៀន និងពិនិត្យសង្វាក់ផលិតកម្មមៀនក្រៀម ក្នុងសង្កាត់ទួលល្វា និងសង្កាត់ប៉ៃលិន និងបន្តជួបជាមួយអាជីវករប្រមូលទិញស្វាយកែវល្មៀត ក្នុងសង្កាត់អូរតាវ៉ៅ ដើម្បីសាកសួរពីស្ថានភាពតម្លៃ និងខ្សែសង្វាក់នៃការនាំចេញ។
ឯកឧត្តម តូច ប៊ុនហួរ បានផ្ដាំផ្ញើដល់មន្ត្រីជំនាញឱ្យបន្តតាមដាន និងជួយដោះស្រាយបញ្ហាប្រឈមរបស់កសិករឱ្យទាន់ពេលវេលា។ ជាពិសេស ត្រូវជំរុញការផ្លាស់ប្តូរទម្លាប់ពី «កសិកម្មបែបធម្មតា» ទៅជា «កសិកម្មពាណិជ្ជកម្ម» ដើម្បីបង្កើនប្រាក់ចំណូល និងលើកកម្ពស់ជីវភាពពលរដ្ឋឱ្យកាន់តែប្រសើរឡើង៕
