ព័ត៌មានផ្សេងៗទៀត
ឯកឧត្ដមរដ្ឋលេខាធិការ ឱម គឹមស៊ា អញ្ជើញដឹកនាំក្រុមការងារ ប្រជុំពិភាក្សាពីការរៀបចំពិព័រណ៍ផលិតផលកសិកម្ម ក្នុងព្រះរាជពិធីច្រត់ព្រះនង្គ័ល ឆ្នាំ២០២៦ នៅខេត្តព្រៃវែង
ចេញផ្សាយ ២៤ មីនា ២០២៦ 2472
នៅរសៀលថ្ងៃទី២៤ ខែមីនា ឆ្នាំ២០២៦ ឯកឧត្ដម ឱម គឹមស៊ា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងារក្រសួងកសិកម្ម ប្រជុំពិភាក្សាការងាររៀបចំពិធីតាំងពិព័រណ៍ផលិតផលកសិកម្ម នៅក្នុងព្រះរាជពិធីច្រត់ព្រះនង្គ័ល ឆ្នាំ២០២៦ ដែលនឹងធ្វើឡើងនៅខេត្តព្រៃវែង។
កិច្ចប្រជុំមានការអញ្ជើញចូលរួមពីឯកឧត្តម លោកជំទាវ ថ្នាក់ដឹកនាំ លោកប្រធាន អនុប្រធាន សមាជិកអចិន្ត្រៃយ៍ សមាជិក សមាជិកានៃក្រុមការងាររៀបចំពិព័រណ៍ផលិតផលកសិកម្ម សរុបអ្នកចូលជាង២០រូប ធ្វើឡើងនៅទីស្តីការក្រសួងកសិកម្ម។
នាឱកាសនៃកិច្ចពិភាក្សា ឯកឧត្ដម ឱម គឹមស៊ា បានគូសបញ្ជាក់ថា ដើម្បីឱ្យការរៀបចំបានល្អប្រសើរ ការបែងចែកភារកិច្ច ការទទួលខុសត្រូវ របស់អគ្គលេខាធិការ អគ្គនាយកនៃអគ្គនាយកដ្ឋានពាក់ព័ន្ធ អគ្គាធិការ ប្រធានគ្រប់អង្គភាពពាក់ព័ន្ធក្រោមឱវាទក្រសួងកសិកម្ម ប្រធានមន្ទីរកសិកម្មខេត្តពាក់ព័ន្ធ ដែលចូលរួមរៀបចំទាក់ទងការរៀបចំស្តង់ពិព័រណ៍ ការផលិតវីដេអូផ្សព្វផ្សាយ ពិនិត្យសិក្សាឱ្យបានច្បាស់លាស់ ពីការសម្រេចយកផលិតផលកសិកម្មសំខាន់អ្វីខ្លះៗ តាមផ្នែកអនុវិស័យនីមួយៗ យកទៅដាក់តាំងបង្ហាញនាព្រឹត្តការណ៍នោះ។ ឯកឧត្តមបានសង្កត់ធ្ងន់ថាធ្វើយ៉ាងណាផ្តោតទៅលើ ផលិតផលខ្មែរសុទ្ធ១០០ភាគរយ ដើម្បីលើកកម្ពស់ការផលិតរបស់ខ្មែរយើង។
សូមជម្រាបជូនថា តាមរយៈកិច្ចពិភាក្សាក្រុមការងារនៃការរៀបចំ បានជជែកនឹងចុះទៅពិនិត្យដល់ទីតាំង នៃការរៀបចំផ្ទាល់ មុនព្រះរាជពិធី ដែលនឹងប្រព្រឹត្តទៅក្នុងក្រុងព្រៃវែង ខេត្តព្រៃវែង នាថ្ងៃទី៥ ខែឧសភា ខាងមុខនេះ ក្រោមព្រះរាជាធិបតីភាព ព្រះករុណាព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត នឹងយាងចូលរួមក្នុងព្រះរាជពិធីច្រត់ព្រះនង្គ័លនេះ៕
