ព័ត៌មានផ្សេងៗទៀត
វេទិកា ”កសិឧស្សាហកម្មសតវត្សទី២១” ក្រោមប្រធានបទ៖ កសិករវ័យឆ្លាត និងអនាគតកម្ពុជា
ចេញផ្សាយ ១៧ តុលា ២០១៩ 21006
នារសៀលថ្ងៃពុធ ៣រោច ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៦ ខែតុលា ឆ្នាំ២០១៩ លោក គង់ ភាជ ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាវាគ្មិន ក្នុងវេទិកា ”កសិឧស្សាហកម្មសតវត្សទី២១” ក្រោមប្រធានបទ៖ កសិករវ័យឆ្លាត និងអនាគតកម្ពុជា ដែលរៀបចំដោយសហភាពសហព័ន្ធយុវជនកម្ពុជា រាជធានីភ្នំពេញ ក្រោមកិច្ចសហប្រតិបត្តិការជាមួយវិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទភ្នំពេញ សាលាជាតិកសិកម្មព្រែកលៀប និងស្ថាប័នសិក្សាស្រាវជ្រាវ និងវិស័យឯកជន ដើម្បីពិភាក្សា និងចែករម្លែកនូវទស្សនទាន និងបទពិសោធជាក់ស្តែងជូនដល់អ្នកចូលរួម ជាពិសេសសហគ្រិនវ័យក្មេង និងប្អូនៗយុវជនបានយល់ដឹងកាន់តែច្បាស់អំពីចក្ខុវិស័យការអភិវឌ្ឍកសិឧស្សាហកម្ម បញ្ហាប្រឈម ការរៀបចំគោលនយោបាយ ការផ្គូរផ្គងតម្រូវការនិងការផ្គត់ផ្គង់ជំនាញក្នុងវិស័យកសិកម្ម និងគំនិតផ្តួចផ្តើមធ្វើសមាហរណកម្មវិទ្យាសាស្ត្រ និងបច្ចេកវិទ្យាក្នុងខ្សែសង្វាក់ផ្គត់ផ្គង់អាហារ។
ក្នុងនោះដែរអង្គពិធីទាំងមូលបានពិភាក្សាផ្លាស់ប្តូរយោបល់នានាទាក់ទិនទស្សនាទានសំខាន់ៗ និងការអនុវត្តជាក់ស្តែង ដែលបានផ្តល់នូវចក្ខុវិស័យ និងធាតុចូលសម្រាប់ជម្រើសគោលនយោបាយជាអាទិភាពមួយចំនួន ដើម្បីចូលរួមជំរុញនាវាកម្ពុជាឆ្ពោះទៅជាប្រទេសសេដ្ឋកិច្ចឌីជីថល ដែលក្នុងនោះបានផ្តោតលើប្រធានបទសំខាន់ៗ រួមមាន (១)សក្តានុពលវិស័យកសិកម្ម និងកសិឧស្សាហកម្ម៖ ការវិវឌ្ឍ បញ្ហាប្រឈម និងឱកាស (២)បរិការណ៍រួមនៃការអភិវឌ្ឍន៍កសិឧស្សាហកម្ម៖ កសិកម្មតាមកិច្ចសន្យា សុវត្ថិភាពម្ហូបអាហារ និងសង្វាក់ផលិតកម្ម (៣)បទពិសោធន៍នៃការផលិតកម្មបសុសត្វនៅកម្ពុជា (៤)សមាហរណកម្មវិទ្យាសាស្ត្រ និងបច្ចេកវិទ្យាក្នុងផលិតភាពម្ហូបអាហារ និងការផ្គត់ផ្គង់។
