ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ខាត់ សុធី អញ្ជើញដឹកនាំសម្របសម្រួលវគ្គបណ្តុះបណ្តាល ស្តីពីវិធានការចម្រុះការពារដំណាំ (IPM) និងការរៀបចំក្រុមដាំដុះបន្លែផ្សារភ្ជាប់ទីផ្សារ ដល់មន្រ្តីកសិកម្មឃុំ នៅខេត្តចំនួន៥
ចេញផ្សាយ ២៦ កញ្ញា ២០២៤ 1295
ចាប់ពីថ្ងៃទី១៩ ដល់ថ្ងៃ២៧ ខែកញ្ញា ឆ្នាំ២០២៤ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំសម្របសម្រួលវគ្គបណ្តុះបណ្តាល ស្តីពីវិធានការចម្រុះការពារដំណាំ (IPM) និងការរៀបចំក្រុមដាំដុះបន្លែផ្សារភ្ជាប់ទីផ្សារ ដល់មន្រ្តីកសិកម្មឃុំ នៅខេត្តចំនួន៥ រួមមាន៖ ខេត្តតាកែវ កំពត កណ្តាល កំពង់ស្ពឺ និងខេត្តកំពង់ឆ្នាំង ដោយមានការចូលរួមពីលោក យឹម សារុំ លោក វង្ស កែវសុធន ទីប្រឹក្សាក្រសួងកសិកម្ម និងតំណាងនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ និងមន្រ្តីកសិកម្មឃុំទាំង៥ខេត្ត ដែលវគ្គបណ្តុះបណ្តាលគាំទ្រដោយគម្រោងបន្លែគុណភាពកម្ពុជា។
វគ្គបណ្តុះបណ្តាលរៀបចំឡើងក្នុងគោលបំណងផ្ដល់ចំណេះដឹងដល់មន្ដ្រីកសិកម្មឃុំអំពីរបៀបនៃការចុះត្រួតពិនិត្យក្នុងចម្ការ មើលសត្វល្អិតដែលកើតមានក្នុងចម្ការ ទាំងសត្វល្អិតមានប្រយោជន៍ និងសត្វចង្រៃ របៀបនៃការគូសសម្គាល់ដំណាំដែលរងការបំផ្លាញពីសត្វល្អិត យល់ដឹងពីពេលវេលានៃការបាញ់ថ្នាំឱ្យមានប្រសិទ្ធិភាពលើដំណាំ ប្រភេទថ្នាំកសិកម្មដែលអាចប្រើប្រាស់បានទៅតាមអាយុកាលដំណាំ និងកត្តាចង្រៃផ្សេងៗ ដែលអាចកើតមានឡើងលើដំណាំប្រភេទផ្សេងៗគ្នា ដូចជា៖ ក្រុមស្ពៃ ក្រុមតាសក់ ក្រុមម្ទេស ប៉េងប៉ោះជាដើម។ល។
ឯកឧត្តម ខាត់ សុធី បានរំឭកពីតួនាទីភារកិច្ចរបស់មន្ត្រីកសិកម្មឃុំ ដែលត្រូវបម្រើកសិករឱ្យបានល្អ សិក្សាពីផលិតកម្មកសិកម្មដែលមានសក្តានុពល និងក្តាប់ទិន្នន័យកសិកម្មនៅឃុំគោលដៅរបស់ខ្លួនឱ្យបានច្បាស់លាស់។ ឯកឧត្តមអនុរដ្ឋលេខាធិការ ក៏បានណែនាំដល់មន្ត្រីកសិកម្មឃុំ ជ្រើសរើសរកឃុំណាដែលមានសក្តានុពលបន្លែ ដើម្បីសហការរៀបចំផែនការផលិត សម្របសម្រួលជាមួយគម្រោងផ្សារភ្ជាប់មកទីផ្សារ និងការរៀបចំក្រុមសមកាលកម្ម ដើម្បីឈានទៅកសាងសហគមន៍កសិកម្មទំនើបបានជោគជ័យ៕
