ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា ទទួលជួបពិភាក្សាជាលើកទី៣ ជាមួយសារព័ត៌មានអេអ៊ឹមអេស (AMS) អំពីកិច្ចសហការផ្សព្វផ្សាយ កម្មវិធីគោលនយោបាយអាទិភាពសហគមន៍កសិកម្មទំនើប
ចេញផ្សាយ ៧ កុម្ភៈ ២០២៥ 3553
នៅព្រឹកថ្ងៃទី០៧ ខែកុម្ភៈ ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយសារព័ត៌មានអេអ៊ឹមអេស (AMS) ធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចពិភាក្សាលើកទី៣នេះ ធ្វើឡើងដើម្បីជជែកពីការរៀបចំបង្កើតមាតិកា ជាអត្ថបទព័ត៌មាន និងវីដេអូព័ត៌មាន ស្ដីពីគន្លឹះកសិកម្ម និងគោលនយោបាយអាទិភាពក្នុងវិស័យកសិកម្ម ដែលមានទម្រង់ខ្លីៗ ងាយយល់ និងងាយអនុវត្ត សម្រាប់ផ្សព្វផ្សាយលើបណ្តាញសង្គមឱ្យបានកាន់តែទូលំទូលាយ។
លោកជំទាវ អ៊ឹម រចនា បានគូសបញ្ជាក់ថា ការផលិតព័ត៌មាន មានខ្លឹមសារគ្រប់ជ្រុងជ្រោយអំពីវិស័យកសិកម្ម មានសារៈសំខាន់ណាស់ក្នុងការលើកស្ទួយជីវភាពប្រជាកសិករឱ្យកាន់តែរីកចម្រើនបន្ថែមទៀត ស្របតាមគោលនយោបាយរបស់ក្រសួងគឺ៖ «មានហូប មានប្រើ មានបាន និងមានរហូត»។ ដើម្បីសម្រេចការងារនេះ លោកជំទាវគូសបញ្ជាក់ថា ក្រសួងកំពុងជំរុញការចងក្រងសហគមន៍កសិកម្មទំនើបសម្រាប់ប្រភេទដំណាំអាទិភាពមួយចំនួន ដូចជា៖ ដំណាំស្រូវ ស្វាយចន្ទី ម្រេច និងបន្លែ។
ជាចុងបញ្ចប់ លោកជំទាវបានថ្លែងអំណរគុណចំពោះសារព័ត៌មាន AMS និងសារព័ត៌មានជាច្រើនទៀត ដែលតែងតែផលិតព័ត៌មានផ្សព្វផ្សាយពីសក្ដានុពលនៃវិស័យកសិកម្មកម្ពុជា។ លោកជំទាវសង្ឃឹមថា ការផ្សព្វផ្សាយនេះ នឹងបន្តទៅមុខទៀតដោយរលូន ដើម្បីផលប្រយោជន៍ប្រជាកសិករ និយាយដោយឡែក និងសម្រាប់វិស័យកសិកម្មកម្ពុជា និយាយជារួម៕
