ឯកឧត្តមបណ្ឌិត យ៉ង សាំងកុមារ៖ ក្រសួងកសិកម្ម តាមដាននិងវិភាគការវិវត្តន៍ថ្លៃស្រូវ និងថ្លៃផលិតស្រូវ ដើម្បីត្រៀមជួយកសិករឲ្យទទួលបានប្រាក់ចំណេញ

ចេញ​ផ្សាយ​ ២២ កុម្ភៈ ២០២៤ 3804

នៅថ្ងៃទី២២ ខែកុម្ភៈ ឆ្នាំ២០២៤នេះ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្រុមការងារជំនាញ បាននិងកំពុងតាមដាន ព្រមទាំងវិភាគការវិវត្តន៍ថ្លៃស្រូវ និងថ្លៃផលិតស្រូវ ដើម្បីត្រៀមជួយរក្សាលំនឹងថ្លៃស្រូវ ក្នុងកម្រិតសមរម្យ និងជួយកសិករឱ្យទទួលបានប្រាក់ចំណេញ។

ឯកឧត្តមបណ្ឌិតបន្តថា ជាមធ្យមនៅក្នុងសប្តាហ៍នេះ ស្រូវ OM៥៤៥១ លក់បានថ្លៃ៩៨០រៀលក្នុងមួយគីឡូក្រាម ដែលតម្លៃនេះ ទាបជាងតម្លៃក្នុងខែកុម្ភៈ ឆ្នាំ២០២៣ ចំនួន១០រៀល ក្នុងមួយគីឡូក្រាម តែខ្ពស់ជាងតម្លៃខែកុម្ភៈ ឆ្នាំ២០២២ ចំនួន១៥៥រៀលក្នុងមួយគីឡូក្រាម។ ជាទូទៅថ្លៃដើមផលិតស្រូវ OM៥៤៥១ ត្រូវចំណាយចន្លោះពី៥០០ ទៅ ៧០០រៀលក្នុងមួយគីឡូក្រាម។ ករណីនេះ ឯកឧត្តមបញ្ជាក់ថា ក្រុមការងារជំនាញនឹងបន្តតាមដាន វិភាគការវិវត្តន៍ថ្លៃស្រូវ និងថ្លៃដើមផលិតស្រូវ ដើម្បីត្រៀមអន្តរាគមន៍សមស្របណាមួយក្នុងការរក្សាលំនឹងថ្លៃស្រូវក្នុងកម្រិតសមរម្យដែលការពារមិនឲ្យកសិករខាតបង់ និងនៅអាចបន្តទទួលបានប្រាក់ចំណេញក្នុងកម្រិតសមរម្យ៕