ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ស្រី វុឌ្ឍី អញ្ជេីញជាអធិបតីភាពក្នុងកម្មវិធីវេទិកាសាធារណៈ នៅខេត្តបន្ទាយមានជ័យ
ចេញផ្សាយ ១១ កក្កដា ២០២៥ 525
នៅថ្ងៃទី១១ ខែកក្កដា ឆ្នាំ២០២៥ ឯកឧត្តម ស្រី វុឌ្ឍី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររដ្ឋាភិបាលចុះមូលដ្ឋានស្រុកមង្គលបុរី អញ្ជេីញជាអធិបតីភាពក្នុងកម្មវិធីវេទិកាសាធារណៈ នៅស្រុកមង្គលបូរី ខេត្តបន្ទាយមានជ័យ។ កម្មវិធីនេះមានការចូលរួមពី លោក យៅ វេន ប្រធានមជ្ឈមណ្ឌលព័ត៌មាន និងឯកសារកសិកម្ម និងជាប្រធានក្រុមការងាររដ្ឋាភិបាលចុះមូលដ្ឋានឃុំសំបួរ លោក ឡៅ សំពរ អនុប្រធានមន្ទីរព័ត៌មាន ព្រមទាំងមានការចូលរួមក្រុមប្រឹក្សាស្រុក គណៈអភិបាលស្រុក នាយក នាយករងរដ្ឋបាល និងប្រជាពលរដ្ឋសរុបប្រមាណ ២១០នាក់។
ជាកិច្ចចាប់ផ្តើម លោក យៅ វេន ប្រធានក្រុមការងាររដ្ឋាភិបាលចុះមូលដ្ឋានឃុំសំបួរ បានរាយការណ៍សង្ខេបវឌ្ឍនភាពនៃការដោះស្រាយសំណើ សំណូមពររបស់ប្រជាពលរដ្ឋនៅក្នុងឃុំដែលបានអនុវត្តកន្លងមក និងការងារបង្កបង្កើនផលរបស់ប្រជាកសិករក្នុងឆ្នាំ២០២៥នេះផងដែរ។
ជាមួយគ្នានេះ ឯកឧត្តម ស្រី វុឌ្ឍី បានទទួលស្តាប់ពីបញ្ហាប្រឈម កង្វល់ និងសំណូមពរផ្សេងៗរបស់ប្រជាពលរដ្ឋ និងបានពន្យល់បកស្រាយនូវរាល់សំណេីដែលបានលេីកឡេីងចំគោលដៅ និងតម្រូវការរបស់ប្រជាពលរដ្ឋ ជាពិសេសបានដោះស្រាយបញ្ហាប្រឈមនានាក្នុងកិច្ចពិភាក្សាខាងលេីនេះផងដែរ។
ជាទីបញ្ចប់ វេទិកាសាធារណៈនេះទទួលបានលទ្ធផលផ្លែផ្កាដោយ ថ្នាក់ដឹកនាំ និងក្រុមការងារពាក់ព័ន្ធទាំងអស់ បានបកស្រាយ និងដោះស្រាយជូនតាមសំណូមពររួចរាល់ សម្រាប់ករណីនៅសេសសល់ត្រូវស្នើរាយការណ៍បន្តដល់ថ្នាក់ស្រុកដើម្បីមានដំណោះស្រាយបន្ទាប់។
សូមជម្រាបជូនថា ការរៀបចំវេទិកានេះ មានគោលបំណងផ្សារភ្ជាប់ទំនាក់ទំនងរវាងប្រជាពលរដ្ឋនៅមូលដ្ឋានជាមួយរាជរដ្ឋាភិបាលដើម្បីស្វែងយល់ពីជីវភាពរស់នៅ និងទទួលស្ដាប់នូវសំណើ សំណូមពរ និងបញ្ហាប្រឈមនានា ផ្សព្វផ្សាយអំពីកម្មវិធីគោលនយោបាយ យុទ្ធសាស្ត្របញ្ចកោណ និងសមិទ្ធផលនានា របស់រាជរដ្ឋាភិបាលដេីម្បីជូនជ្រាប សំដៅស្វែងរកការគាំទ្រ និងការចូលរួមអនុវត្ត ជាពិសេសជួយដោះស្រាយ និងបូកសរុបសំណើ សំណូមពរ បញ្ហាប្រឈមនានា ដើម្បីកំណត់អំពីវិធានការដោះស្រាយឆ្លើយតបនឹងតម្រូវការរបស់ប្រជាពលរដ្ឋ៕
