ឯកឧត្តមរដ្ឋមន្ត្រី ឌិត ទីណា អញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តបន្ទាយមានជ័យ

ចេញ​ផ្សាយ​ ២០ ធ្នូ ២០២៣ 18840

នៅរសៀលថ្ងៃទី២០ ខែធ្នូ ឆ្នាំ២០២៣ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ និង ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តបន្ទាយមានជ័យ នៅសាលាខេត្តបន្ទាយមានជ័យ។

ក្នុងពិធីបិទសន្និបាតនេះ ឯកឧត្តមរដ្ឋមន្ត្រី បានពាំនាំនូវការសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី​ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាអាណត្តិទី៧នេះ។ ជាមួយគ្នានេះដែរ ឯកឧត្តមរដ្ឋមន្ត្រី បានសម្តែងនូវការសាទរ និងវាយតម្លៃខ្ពស់ចំពោះលទ្ធផលដែលខេត្តសម្រេចបាន ព្រមទាំងបានបង្កើតក្រុមការងារ និងរៀបចំកិច្ចពិភាក្សាលើប្រធានបទសំខាន់ៗ ដែលពាក់ព័ន្ធនឹងតម្រូវការជាក់ស្តែង។

ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ឯកឧត្តមរដ្ឋមន្ត្រី បានគូសបញ្ជាក់អំពីយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ដោយក្នុងនោះ ឯកឧត្តមរដ្ឋមន្ត្រី បានរំឭកអំពីបាវចនាទាំង៥ គឺកំណើន ការងារ សមធម៌ ប្រសិទ្ធភាព និងចិរភាព ព្រមទាំងអាទិភាពទាំង៥ នៃគោលនយោបាយមានដូចជាមនុស្ស ផ្លូវ ទឹក ភ្លើង និងបច្ចេកវិទ្យា ដែលការងារទាំងនេះ ថ្នាក់ដឹកនាំត្រូវយល់ឱ្យបានច្បាស់ ដើម្បីអនុវត្តស្របតាមទិសដៅគោលនយោបាយ និងមានប្រសិទ្ធភាព។

បើតាម ឯកឧត្តមរដ្ឋមន្ត្រី កម្មវិធីនយោបាយអាទិភាព ៦ចំណុចរបស់រាជរដ្ឋាភិបាលសម្រាប់ចាប់ផ្តើមអនុវត្តភ្លាមក្នុងឆ្នាំ២០២៣ រួមមាន ទី១គឺការផ្តល់សេវាសុខភាពឆ្ពោះទៅកម្មវិធីគ្របដណ្តប់សុខភាពជាសាកល ទី២ ការបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងងាយរងគ្រោះ ទី៣ ការធ្វើស្ថាបនូបនីយកម្មកម្មវិធីជាតិជំនួយសង្គមសម្រាប់គ្រួសារក្រីក្រ និងគ្រួសារងាយរងហានិភ័យប្រកបដោយសមធម៌ ទី៤ អភិវឌ្ឍសេដ្ឋកិច្ចក្រៅប្រព័ន្ធឱ្យមានលទ្ធភាពចូលក្នុងសេដ្ឋកិច្ចក្នុងប្រព័ន្ធ និងអាចទទួលបានអត្ថប្រយោជន៍ពីប្រព័ន្ធគាំពារសង្គមផ្លូវការ ទី៥ ការដាក់ចេញនូវយន្តការសម្របសម្រួលនិងកម្មវិធីហិរញ្ញប្បទាន សំដៅលើកស្ទួយផលិតកម្ម ទីផ្សារ និងរក្សាស្ថិរភាពតម្លៃ និងទី៦ ការដាក់ពង្រាយមន្ត្រីផ្សព្វផ្សាយកសិកម្ម និងការកសាងសហគមន៍កសិកម្មទំនើប។

ឯកឧត្តមរដ្ឋមន្ត្រី បានបញ្ជាក់បន្ថែមថា កំណែទម្រង់ថ្មី ក្នុងគោលដៅប្រើដីរួម គឺសំខាន់ត្រូវគៀងគរពលរដ្ឋចូលរួម និងរួមគ្នាផលិតទ្រង់ទ្រាយធំ ឱ្យមានគុណភាព បំពេញតម្រូវការទីផ្សារ ទទួលបានតម្លៃបន្ថែមខ្ពស់ និងផ្តល់ចំណូលច្រើនជាងមុនដល់កសិករ។ ជាយន្តការ គឺត្រូវជ្រើសរើសមន្ត្រីផ្សព្វផ្សាយកសិកម្មឃុំជាជំហាន ដោយក្នុងនោះឆ្នាំ២០២៣ ចំនួន ២៥០នាក់ ដែលទើបបញ្ចប់ការប្រឡងជ្រើសរើស ឆ្នាំ២០២៤ ចំនួន ៨០០នាក់ និងឆ្នាំ២០២៥ ចំនួន៦៥០នាក់ សរុបចំនួន ១.៦០០នាក់ ដើម្បីជួយដល់កសិករទូទាំងប្រទេស។

ឯកឧត្តមរដ្ឋមន្ត្រី បានផ្តល់នូវអនុសាសន៍គន្លឹះមួយចំនួនដល់អង្គសន្និបាត គឺចាំបាច់ត្រូវរក្សានិងការពារសន្តិភាព ទប់ស្កាត់បញ្ហាអសកម្ម និងការផ្សព្វផ្សាយព័ត៌មានមិនពិត ការធ្វើបដិវត្តន៍ពណ៌ និងការធ្វើឱ្យមនុស្សស្អប់គ្នា ដែលជាកត្តារារាំងនៃការអភិវឌ្ឍ។ ទន្ទឹមនឹងនោះដែរ ត្រូវអនុវត្តគោលនយោបាយភូមិឃុំមានសុវត្ថិភាព ឱ្យបាននិងមានប្រសិទ្ធភាពបំផុត ផ្តើមចេញពីសាមគ្គីភាព ឯកភាពផ្ទៃក្នុង ដោយត្រូវពិនិត្យលទ្ធភាពឱ្យមានរបបប្រជុំទៀងទាត់ ដោយគិតប្រយោជន៍ជាតិជាធំ ត្រូវមានការសន្ទនា យកបញ្ហាដាក់លើតុ និងចូលរួមពិភាក្សា ដោះស្រាយជាមួយគ្នាអនុលោមតាមច្បាប់ គោលនយោបាយ និងមានភាពប្រាកដនិយម។

សូមជម្រាបជូនថា ខេត្តបន្ទាយមានជ័យគឺជាខេត្តមួយក្នុងចំណោមខេត្តក្នុងប៉ូលសេដ្ឋកិច្ចទី៤ ដែលមានខេត្តពោធិ៍សាត់ បាត់ដំបង បន្ទាយមានជ័យ និងប៉ៃលិន។ ខេត្តបន្ទាយមានជ័យមានប្រជាពលរដ្ឋប្រមាណ ៦៥%ប្រកបរបរកសិកម្ម និង៣៥%ទៀតជាអាជីវករ ពាណិជ្ជករ។ ចំពោះសន្និបាតបូកសរុបការងារឆ្នាំ២០២៣ បានប្រព្រឹត្តទៅរយៈពេល ២ថ្ងៃ ដោយបានពិភាក្សាលើប្រធានបទចំនួន៥ គឺទី១ ប្រសិទ្ធភាពនៃការផ្តល់សេវានៅរដ្ឋបាលថ្នាក់ក្រោមជាតិ និងយន្តការច្រកចេញចូលតែមួយនៅរដ្ឋបាលឃុំសង្កាត់ ទី២ ការទប់ស្កាត់ការធ្វើចំណាកស្រុកខុសច្បាប់ ទី៣ ការទប់ស្កាត់ការជួញដូរមនុស្ស និងការជួយដូរគ្រឿងញៀន ទី៤ ការឆ្លើយតបបន្ទាន់នឹងគ្រោះមហន្តរាយ និងទី៥ ការដោះស្រាយវិវាទក្រៅប្រព័ន្ធតុលាការ៕