ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម អញ្ជើញជាអធិបតី បិទកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅឆ្នាំ២០២៤ របស់មន្ទីរកសិកម្ម ខេត្តរតនគិរី

ចេញ​ផ្សាយ​ ២០ មករា ២០២៤ 3827

នៅថ្ងៃទី១៩ ខែមករា ឆ្នាំ២០២៤ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកមន្ទីរកសិកម្មខេត្ដរតនគិរី រួមជាមួយ ឯកឧត្តម ម៉ា វិចិត្រ  អភិបាលស្តីទី នៃគណៈអភិបាលខេត្តរតនគិរី បានធ្វើជាអធិបតីក្នុងពិធីបិទកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងទិសដៅការងារឆ្នាំ២០២៤ របស់មន្ទីរកសិកម្ម រុក្ខាប្រមាញ់ និងនេសាទខេត្តរតនគិរី។

កិច្ចប្រជុំនេះ មានការអញ្ជើញចូលរួមពីតំណាងអភិបាលក្រុង-ស្រុក តំណាងមន្ទីរខេត្ដ កងកម្លាំងប្រដាប់អាវុធ ប្រធាន អនុប្រធាន និងមន្រ្ដីនៃខណ្ឌរដ្ឋបាល និងការិយាល័យក្រោមឱវាទ មន្ទីរកសិកម្ម រុក្ខាប្រមាញ់ និងនេសាទខេត្ដរតនគិរី សរុបចំនួន ៩៥នាក់។

បន្ទាប់ពីបានស្ដាប់លោកបណ្ឌិត សយ សូណា ប្រធានមន្ទីរកសិកម្ម រុក្ខាប្រមាញ់ និងនេសាទ ខេតរតនគិរី បង្ហាញរបាយការណ៍លទ្ធផលការងារសម្រេចបានក្នុងឆ្នាំ២០២៣រួច ឯកឧត្តម ហ៊ាន វណ្ណហន បានកោតសរសើរដល់ថ្នាក់ដឹកនាំមន្ទីរ ប្រធាន អនុប្រធាន និងមន្រ្ដី នៃខណ្ឌរដ្ឋបាល និងការិយាល័យជំនាញក្រោមឱវាទ ដោយថា លទ្ធផលផ្លែផ្កាទាំងអស់នេះ កើតចេញពីឆន្ទ: និងការខិតខំប្រឹងប្រែងបម្រើជាតិមាតុភូមិ។

បន្ថែមពីនេះ ឯកឧត្តម ក៏បានផ្តល់អនុសាសន៍ ដល់ថ្នាក់ដឹកនាំមន្ទីរនិងមន្ត្រីក្រោមឱវាទ ត្រូវពង្រឹងសាមគ្គីភាពផ្ទៃក្នុង រវាងថ្នាក់ដឹកនាំមន្ទីរ  និងការិយាល័យខណ្ឌរដ្ឋបាល ដើម្បីបង្កើនភាពស្អិតរមួត និងប្រសិទ្ធផលការងារ ដោយប្រើកម្លាំងរួម ដើម្បីដោះស្រាយរាល់បញ្ហាបន្ទាន់ និងត្រូវគិតគូរលើផលិតភាពផលិតកម្មជាគោល គឺផ្ដោតលើប្រាក់ចំនេញ (ថ្លៃដើមផលិតទាប បង្កើនប្រាក់ចំណេញ) ដោយមិនត្រូវផ្ដោតលើតែបរិមាណផលិតផលទទួលបាននោះទេ។

មិនត្រឹមតែប៉ុណ្ណោះ ឯកឧត្តម ហ៊ាន វណ្ណហន លើកទឹកចិត្តដល់ថ្នាក់ដឹកនាំមន្ទីរ ត្រូវបន្ដជំរុញបង្កើនផលិតកម្មកសិកម្ម ស្របតាមតម្រូវការទីផ្សារ និងសក្ដានុពលគាំទ្រ (បញ្ជៀសការជន់លិចនៅរដូវវស្សា ខ្វះទឹកនៅរដូវប្រាំង) និងបន្ដកិច្ចសហការណ៍យ៉ាងស្អិតរមួតជាមួយដៃគូរអភិវឌ្ឍន៍ មន្ទីរពាក់ព័ន្ធជុំវិញខេត្ដ និងត្រូវចាត់ចែកផ្សព្វផ្សាយអំពីគោលនយោបាយអតិភាពក្រសួងកសិកម្មដែលកំពុងជំរុញ ពិសេសគឺគោលនយោបាយចងក្រងបង្កើតកសិកម្មទំនើប ដែលមានផែនការផលិតទ្រង់ទ្រាយធំ រួមទាំងស្នើទៅដៃគូរអភិវឌ្ឍ វិស័យឯកជន ដែលកំពុងបំពេញការងារក្នុងទឹកដីខេត្តរតនគិរី ចូលរួមសហការណ៍ គាំទ្រ លើសកម្មភាពអនុវត្តទស្សនទានឆ្នាំ២០២៤ របស់មន្ទីរ។

ចំណែក ថ្នាក់ដឹកនាំមន្ទីរ នាយខណ្ឌរដ្ឋបាល និងការិយាល័យជំនាញក្រោមឱវាទមន្ទីរត្រូវបង្កើនប្រសិទ្ធភាព សេវាគាំទ្រ និងបញ្ជៀសរាល់សកម្មភាព ដែលបង្កផលប៉ះពាល់ដល់អ្នកទទួលសេវា៕