ឯកឧត្តមអនុរដ្ឋលេខាធិការ ខាត់ សុធី អញ្ជើញចុះត្រួតពិនិត្យ និងណែនាំដល់មន្ត្រីកសិកម្មឃុំ និងសហគមន៍ដាំបន្លែ នៅក្នុងខេត្តចំនួន៤

ចេញ​ផ្សាយ​ ៣១ មករា ២០២៥ 2304

នៅថ្ងៃទី២៩ ដល់ថ្ងៃទី៣១ ខែមករា ឆ្នាំ២០២៥ ឯកឧត្តម ខាត់ សុធី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក យឹម សារុំ ទីប្រឹក្សា ក្រសួងកសិកម្ម បានអញ្ជើញចុះត្រួតពិនិត្យ និងណែនាំដល់មន្ត្រីកសិកម្មឃុំ និងសហគមន៍ដាំបន្លែ នៅក្នុងខេត្តតាកែវ ខេត្តកំពត ខេត្តកំពង់ស្ពឺ និងខេត្តកំពង់ឆ្នាំង។

នាឱកាសនេះ ឯកឧត្តមអនុរដ្ឋលេខាធិការ បានធ្វើការណែនាំដល់មន្ត្រីកសិកម្ម និងកសិករអ្នកផលិតបន្លែ ឱ្យធ្វើការកត់ត្រាពីចំណូល និងចំណាយលើផលិតកម្មដំណាំបន្លែនេះ ដើម្បីងាយស្រួលក្នុងការវិភាគសេដ្ឋកិច្ច ព្រមទាំងជំរុញកសិករឱ្យចងក្រងគ្នាជាក្រុមផលិតងាយស្រួលផ្សារភ្ជាប់ទៅកាន់ទីផ្សារ ពិសេសលើការធានាបានស្ថិរភាពនៃការផ្គត់ផ្គង់ និងតម្លៃ។ បន្ថែមលើនេះឯកឧត្តមក៏បានណែនាំឱ្យកសិករ ត្រូវដាំដំណាំចម្រុះគ្នា ដើម្បីរក្សាជីជាតិដី និងតម្រូវការទីផ្សារ។

ទន្ទឹមនឹងនេះ ឯកឧត្តមអនុរដ្ឋលេខាធិការ បានណែនាំឱ្យមន្ត្រីកសិកម្ម ត្រូវជំរុញដល់កសិករ ប្រើប្រាស់ជីធម្មជាតិ ឬជីសរីរាង្គដើម្បីកាត់បន្ថយការចំណាយ និងធានាបាននូវសុខភាព សុវត្ថិភាព និរន្តរភាពសង្គម និងបរិស្ថានទាំងមូលផងដែរ៕