ព័ត៌មានផ្សេងៗទៀត
ឯកឧត្តមបណ្ឌិត ហ៊ាន វណ្ណហន អញ្ជើញចូលរួមពិធីសម្ភោធអគារសិក្សានិងសមិទ្ធផលនានា នៅស្រុកអង្គរបូរី ខេត្តតាកែវ
ចេញផ្សាយ ១២ កញ្ញា ២០២៦ 2092
នៅថ្ងៃទី១១ ខែកញ្ញា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមក្នុងពិធីសំណេះសំណាល និងសម្ពោធអគារសិក្សា ១ខ្នង មាន ៥បន្ទប់ នៅវិទ្យាល័យសំរោងពន្លៃ ខ្លោងទ្វារសាលាបឋមសិក្សាសំរោងពន្លៃ និងសមិទ្ធផលនានា នៅស្រុកអង្គរបូរី ខេត្តតាកែវ។
ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកអង្គរបូរី។ ពិធីមានការអញ្ជើញចូលរួមពីព្រះសង្ឃ គណៈអធិបតី ថ្នាក់ដឹកនាំ និងសមាជិកក្រុមការងាររាជរដ្ឋាភិបាល អាជ្ញាធរស្រុក-ឃុំ មន្ត្រីរាជការ កងកម្លាំង លោកគ្រូ អ្នកគ្រូ សិស្សានុសិស្ស យុវជន និងប្រជាពលរដ្ឋក្នុងមូលដ្ឋាន ព្រមទាំង ឯកឧត្តម ហ៊ឺ បាវី ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ សរុបចំនួន ៨២៣ អង្គ/នាក់។
នាឱកាសនោះ ឯកឧត្តមបណ្ឌិត ហ៊ាន វណ្ណហន បានផ្សព្វផ្សាយ និងណែនាំអំពីការត្រៀមអនុវត្ត កម្មវិធីអន្តរាគមន៍សង្គ្រោះបន្ទាន់ ដោយប្រើបច្ចេកទេសកសិកម្មឆ្លាតវៃធន់នឹងអាកាសធាតុ ដើម្បីលើកកម្ពស់ជីវភាពរស់នៅ (CERC) ក្រោម គម្រោងកែលម្អសន្តិសុខទឹកកម្ពុជា (CERC-CaWSIP-MAFF) ដល់រដ្ឋបាលស្រុក មន្ត្រីជំនាញ អាជ្ញាធរមូលដ្ឋាន ក្រុមប្រឹក្សាស្រុក ថ្នាក់ដឹកនាំការិយាល័យជុំវិញស្រុក ក្រុមប្រឹក្សាឃុំទាំង ៦ មន្ត្រីកសិកម្មឃុំទាំង ៦ លោកគ្រូ អ្នកគ្រូ និងប្រជាពលរដ្ឋនៅក្នុងមូលដ្ឋាន។
ឯកឧត្តមបណ្ឌិតបានសង្កត់ធ្ងន់ថា ការរៀបចំ និងត្រៀមលក្ខខណ្ឌចាំបាច់ឱ្យបានគ្រប់ជ្រុងជ្រោយ ទាន់ពេលវេលា និងស្របតាមតម្រូវការជាក់ស្តែង គឺជាមូលដ្ឋានដ៏សំខាន់សម្រាប់ធានាឱ្យការអនុវត្តកម្មវិធី CERC ប្រព្រឹត្តទៅប្រកបដោយប្រសិទ្ធភាព តម្លាភាព និងគណនេយ្យភាព ព្រមទាំងអាចផ្តល់ផលប្រយោជន៍ជាក់ស្តែង និងឆ្លើយតបបានទាន់ពេលវេលាចំពោះតម្រូវការរបស់គ្រួសារអ្នកទទួលផល។
គួរបញ្ជាក់ថា កម្មវិធី CERC ត្រូវបានដាក់ឱ្យដំណើរការជាផ្លូវការ ហើយកិច្ចប្រជុំផ្សព្វផ្សាយអំពីដំណើរការអនុវត្តកម្មវិធី CERC-CaWSIP-MAFF នឹងត្រូវរៀបចំនៅថ្ងៃទី១៦ ខែកញ្ញា ឆ្នាំ២០២៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ក្រោមការដឹកនាំដោយផ្ទាល់របស់ ឯកឧត្តមបណ្ឌិត ហ៊ាន វណ្ណហន៕
