ប្រជាកសិករស្រុកវ៉ារិន សាទរចំពោះការទទួលបានគម្រោង EMPOWER ដែលជួយលើក​កម្ពស់ជីវភាព តាមរយៈការបង្កើតមុខរបរកសិកម្ម

ចេញ​ផ្សាយ​ ២១ សីហា ២០២៦ 2577

នៅថ្ងៃទី២១ ខែសីហា ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្ត​គម្រោង EMPOWER ប្រចាំស្រុកវ៉ារិន ខេត្តសៀមរាប បានដឹកនាំក្រុមការងារ ចុះប្រកាសលទ្ធផល និងជូនដំណឹងដល់ប្រជាកសិករដែលទទួលបាន​ការគាំទ្រ​ពីគម្រោង នៅសាលាស្រុកវ៉ារិន។
កម្មវិធីក៏មានការចូលរួមពី លោក ប៉ែន ប៊ុនធឿន អនុប្រធានមន្ទីរកសិកម្ម រុក្ខា​ប្រមាញ់ និងនេសាទ លោកប្រធានក្រុមប្រឹក្សាស្រុកវ៉ារិន លោក និនធី វិធូ អភិ​បាលស្រុកវ៉ារិន ព្រមទាំងអាជ្ញាធរមូលដ្ឋាន មន្ត្រីកសិកម្មឃុំ និងប្រជាកសិករ សរុបប្រមាណ៤០០នាក់។
នាជំនួបជាមួយប្រជាកសិករ ឯកឧត្តម ឃុន សាវឿន បានគូសបញ្ជាក់ថា គម្រោង EMPOWER គឺជាគម្រោងរបស់រាជរដ្ឋាភិបាលកម្ពុជា ដែលអនុវត្ត​ដោយ​ក្រសួងកសិកម្ម រុក្ខាប្រមាញ់ និងនេសាទ ក្នុងគោលដៅជួយគាំទ្រដល់​គ្រួសារកសិករក្រីក្រ ឱ្យមានមុខរបរកសិកម្មសមស្របទៅនឹងសក្តានុពល​ក្នុង​មូលដ្ឋាន ពង្រឹងសមត្ថភាពផលិតកម្ម បង្កើនប្រាក់ចំណូល និងធានាបាននូវសន្តិ​សុខ​ស្បៀងសម្រាប់គ្រួសារ។
សម្រាប់ប្រជាកសិករដែលទទួលបានការគាំទ្រ គម្រោងបានផ្តល់​ជម្រើស​មុខរបរកសិកម្មជាច្រើនមានដូចជា៖ ការដាំបន្លែក្នុងផ្ទះសំណាញ់ ការដាំ​ផ្សិត ការចិញ្ចឹមមាន់ស្រែ ការចិញ្ចឹមចង្រិត និងការចិញ្ចឹមឃ្មុំ។ ឯកឧត្តម​រដ្ឋលេខា​ធិការ បានបញ្ជាក់បន្ថែមថា ក្រសួងកសិកម្ម នឹងផ្តល់ការគាំទ្រដល់អ្នកទទួលផល តាមរយៈការបណ្តុះបណ្តាលបច្ចេកទេសកសិកម្ម ការតភ្ជាប់ទីផ្សារជូននៅពេល​ប្រមូលផល តាមរយៈការចងក្រងក្រុមអ្នកទទួលផលទាំងអស់ទៅជាសហគមន៍​កសិកម្មទំនើប ព្រមទាំងទទួលបានការឧបត្ថម្ភសម្ភារៈផលិតកម្មកសិកម្ម ក្នុងនោះរួមមាន៖ កូនមាន់ ពូជ និងចំណី ពូជបន្លែ មេផ្សិត ជីផងដែរ។
ជាមួយគ្នានោះដែរ តំណាងប្រជាកសិករ បានសម្តែងនូវក្តីរីករាយ និងថ្លែងអំណរ​គុណ​ចំពោះរាជរដ្ឋាភិបាល និងក្រសួងកសិកម្ម ដែលបានយកចិត្តទុកដាក់ និង​បន្ត​ដាក់ចេញនូវកម្មវិធី និងគម្រោងនានា ដើម្បី​ជួយដល់គ្រួសារកសិករ​ក្រីក្រ។ ពួកគាត់បានបង្ហាញពីការប្តេជ្ញា​ចិត្តប្រើប្រាស់​ជំនួយ និងចំណេះដឹង​ដែល​ទទួល​បាន ដើម្បីអភិវឌ្ឍមុខរបរកសិកម្ម បង្កើន​ផលិត​ភាព និងប្រាក់​ចំណូល​សម្រាប់គ្រួសារ ព្រមទាំងធានាបាននូវស្បៀង​អាហារ​សម្រាប់ការរស់​នៅប្រចាំថ្ងៃផងដែរ៕