ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះត្រួតពិនិត្យកន្លែងអភិរក្សជលផលកំពង់ប្រាក់ ក្នុងខេត្តពោធិ៍សាត់

ចេញ​ផ្សាយ​ ១៧ មីនា ២០២៥ 3096

នៅថ្ងៃទី១៦ ខែមីនា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក ភុំ វិមល នាយខណ្ឌរដ្ឋបាលជលផលពោធិ៍សាត់ មានលោកនាយរងខណ្ឌ លោកនាយផ្នែក-នាយរងផ្នែកក្រគរ បានអញ្ជើញចុះត្រួតពិនិត្យស្ថានភាពទូទៅ និងចុះត្រួតពិនិត្យកន្លែងអភិរក្សជលផលកំពង់ប្រាក់ ដែលមានទំហំ២៧០០ហិចតា ដោយបានបោះបង្គោលជ្រុំ និងសម្រស់ កន្លងមក បាន២០០កន្លែងសម្រាប់ជាជម្រកត្រី ស្ថិតនៅភូមិកំពង់ប្រាក់ ឃុំស្នាអន្សា ស្រុកក្រគរ ខេត្តពោធិ៍សាត់។

ដំណើរនេះ ឯកឧត្តមអនុរដ្ឋលេខាធិការ ក៏បានប្រជុំនៅស្នាក់ការផ្នែករដ្ឋបាលជលផលក្រគរ ដោយធ្វើការកោតសរសើរដល់ក្រុមការងារចម្រុះ រួមមានផ្នែកសង្កាត់ដែលឈរជើង ហើយបានសហការជាមួយក្រុមការងារកងយោធពលខេមរភូមិន្ទ ទទួលបន្ទុកការងារទប់ស្កាត់និងបង្ក្រាបបទល្មើសធនធានធម្មជាតិក្នុងបឹងទន្លេសាប       ខេត្ដពោធិ៍សាត់ ក្នុងការខិតខំ ប្រឹងប្រែង ការពារ ទប់ស្កាត់ កន្លងមកបានយ៉ាងល្អប្រសើ។

ទន្ទឹមនឹងនេះឯកឧត្តអនុរដ្ឋលេខាធិការ បានផ្ដល់មតិណែនាំដល់ក្រុមការងារឱ្យពង្រឹងបន្ថែមទៀត លើបទល្មើសនេសាទឆក់ បទល្មើសចល័ត និងជាពិសេសការពារកន្លែងអភិរក្សជលផលត្រូវចេញល្បាតទាំងយប់-ថ្ងៃ ដើម្បីជួយទប់ស្កាត់បទល្មើស និងអភិរក្សធនធានជលផលក្នុងបឹងទន្លេសាប ដែលជាធនធានដ៏មានតម្លៃមិនអាចប្រៀបថ្លៃបាន ហើយក្រុមការងារជំនាញនឹងចូលរួមសហការក្នុងប្រតិបត្តិការនេះឱ្យកាន់តែមានប្រសិទ្ធិភាព ប្រកបដោយផ្លែផ្កា៕