ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំកិច្ចប្រជុំបូកសរុបការងារប្រចាំត្រីមាស ឆ្នាំ២០២៥ និងលើកទិសដៅបន្ដលើវិស័យកសិកម្មខេត្ដរតនគិរី

ចេញ​ផ្សាយ​ ២៥ មេសា ២០២៥ 2253

នៅថ្ងៃទី២៥ ខែមេសា ឆ្នាំ២០២៥ នៅមន្ទីរកសិកម្មខេត្ដរតនគិរី ឯកឧត្ដម ហ៊ាន វណ្ណហន រដ្ឋលេខាធិការទទួលបន្ទុកការងារកសិកម្ម រុក្ខាប្រមាញ់ និងនេសាទ ខេត្ដរតនគិរី បានអញ្ជើញដឹកនាំកិច្ចប្រជុំបូកសរុបការងារប្រចាំត្រីមាសទី១ ឆ្នាំ២០២៥ និងលើកទិសដៅបន្ដ លើវិស័យកសិកម្មខេត្ដរតនគិរី ដោយមានការអញ្ជើញចូលរួមពីឯកឧត្ដមអនុរដ្ឋលេខាធិការ ឃី វិបុត្រា លោក លោកស្រី ថ្នាក់ដឹកនាំមន្ទីរ ប្រធាន អនុប្រធាន និងមន្រ្ដី នៃការិយាល័យ ព្រមទាំងខណ្ឌរដ្ឋបាលទាំងអស់ក្រោមឱវាទមន្ទីរ។

ក្នុងកិច្ចប្រជុំនេះ លោកបណ្ឌិត សយ សូណា ប្រធានមន្ទីរកសិកម្ម រុក្ខាប្រមាញ់ និងនេសាទ បានសង្ខេបពីលទ្ធផលសម្រេចបានរយៈពេល៣ខែ ដើមឆ្នាំ២០២៥ របស់មន្ទីរកសិកម្មខេត្ដរតនគិរី ជូនអង្គប្រជុំ និងបន្តដោយកិច្ចពិភាក្សាដោយមានការចូលរួម យោបល់ និងលើកបញ្ហាប្រឈមនានា ពីលោក លោកស្រី ជាប្រធាន អនុប្រធាន ការិយាល័យ និងខណ្ឌរដ្ឋបាលរបស់មន្ទីរកសិកម្ម រុក្ខាប្រមាញ់ និងនេសាទ។ 
ក្រោយពីស្តាប់ការសង្ខេបលទ្ធផលសម្រេចបានរយៈពេល៣ខែ ឯកឧត្ដមរដ្ឋលេខាធិការ បានកោតសសើរចំពោះលទ្ធផលការងាររបស់មន្ទីរ ព្រមទាំងបូកសរុបកិច្ចប្រជុំ និងផ្ដល់ជាអនុសាសន៍ណែនាំដល់មន្ទីរ ត្រូវបន្តពង្រឹងសមត្ថិភាពមន្រ្ដី និងលៃលកប្រើប្រាស់កម្លាំងរួមក្នុងការងារអាទិភាពចាំបាច់ បន្ទាន់ ក្នុងស្ថានភាពខ្វះខាតមន្ត្រីនៅតាមការិយាល័យមួយចំនួន និងអនុវត្ដផែនការសកម្មភាព ប្រើប្រាស់ថវិកា ត្រូវពិនិត្យឱ្យបានច្បាស់លាស់ ឆ្លើយតបនឹងសូចនាកររបស់មន្ទីរដាក់ចេញ។ ទន្ទឹមនឹងនេះ មន្ទីរត្រូវធ្វើការសហការណ៍ជាមួយមន្ទីរជុំវិញខេត្ដ លើការតាមដានអាកាសធាតុ ដោយជូនដំណឹងដល់អ្នកពាក់ព័ន្ធ ពិសេសប្រជាកសិករ ឱ្យបានទាន់ពេលវេលា ដើម្បីបញ្ចៀស ឬកាត់បន្ថយផលប៉ះពាល់ដល់ផលដំណាំ និងត្រៀមមធ្យោបាយដោះស្រាយឱ្យបានទាន់ពេលវេលា។ 

ឯកឧត្ដមបានបន្ថែមថា  ការចុះពិនិត្យ និងពង្រឹងសហគមន៍ស្វាយចន្ទី ដែលបានចូលរួមទស្សនទានជំរុញផលិតកម្មចន្ទី ត្រូវតែធ្វើជាប្រចាំ និងបង្ហាញលទ្ធផលកំណើនទិន្នផល និងចំណេញផលសេដ្ឋកិច្ចទទួលបានក្នុងការចូលរួមអនុវត្ដនេះ ដល់សហគមន៍ស្វាយចន្ទី និងកសិករដាំចន្ទីឱ្យបានទូលំទូលាយ។ ទន្ទឹមនឹងនោះដែរ ដោយខេត្តរតនគិរីជាតំបន់ខ្ពង់រាប ដែលមានការដាំដំឡូងមីច្រើននោះ មន្ទីរក៏ត្រូវរៀបចំដាំដុះបង្ហាញដំណាំកម្របដី  ដែលជាការចូលរួមស្ដា និងបង្កើនគុណភាពដីឡើងវិញ។

ជាងនេះទៅទៀត ការចុះពិនិត្យវាស់វែង និងធ្វើបច្ចុប្បន្នដីរដ្ឋ មន្ទីរត្រូវធ្វើយ៉ាងតិច២លើក ក្នុង១ឆ្នាំ លើការផ្ទេដី និងកាត់ឆ្វៀលដីរដ្ឋទៅឱ្យក្រោមការគ្រប់គ្រងពីស្ថាប័ននានា ពិសេសត្រួតពិនិត្យលើផលប៉ះពាល់ក្នុងអន្ដរកាលនៃការការផ្ទេ ឬកាត់ឆ្វៀលនេះ ដែលជាឱកាសលើការបំពានណាមួយ ដែលត្រូវកំណត់ឱ្យបានច្បាស់លាស់។ ក្នុងនោះដែរ ត្រូវរៀបចំរក្សាទុកនូវឯកសារទាំងអស់ឱ្យបានត្រឹមត្រូវ ងាយស្រួលស្វែងរក ទាំងឯកសារជាក្រដាស និង Soft copyជាដើម។

ជាចុងបញ្ចប់ ឯកឧត្ដម បានគូសបញ្ជាក់ថា ខេត្ដរតនគីរី ជាខេត្ដស្ថិតនៅក្នុងតំបន់មេគង្គលើ ដែលត្រូវគ្រោងរៀបចំកិច្ចប្រជុំលើកទី១ ដ៏ខ្លីខាងមុខ ដោយមន្ទីរត្រូវត្រៀមលក្ខណៈចូលរួមប្រជុំ ជាមួយក្រុមការងារពិនិត្យ តាមដានការអនុវត្តអន្ដរកម្មវិធីប្រចាំតំបន់មេគង្គលើ ដែលដឹកនាំដោយរដ្ឋលខាធិការជាប្រធាន និងឯកឧត្ដម ចាន់ សារុទ្ធ ជាអនុប្រធាន៕