ឯកឧត្តម បណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងសិក្ខាសាលា ផ្សព្វផ្សាយអំពីផែនការសកម្មភាព និងថវិកា ឆ្នាំ២០២៦ និងរៀបចំផែនការសកម្មភាព និងថវិកាសម្រាប់គាំទ្រសហគមន៍កសិកម្មទំនើប នៃកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) និងគម្រោងការបង្កើតភាពធន់នឹងអាកាសធាតុក្នុងខ្សែច្រវាក់តម្លៃកសិកម្មនៅកម្ពុជា (CREA)

ចេញ​ផ្សាយ​ ២២ កុម្ភៈ ២០២៦ 2417

នាថ្ងៃទី២០ ខែកុម្ភៈ ឆ្នាំ២០២៦ លេខាធិការដ្ឋានកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) នៃក្រសួងកសិកម្ម រុក្ខាប្រមាញ់ និងនេសាទ បានរៀបចំសិក្ខាសាលាអំពី «ការផ្សព្វផ្សាយផែនការសកម្មភាព និងថវិកា (AWPB) ឆ្នាំ២០២៦ និងការរៀបចំផែនការសម្រាប់គាំទ្រសហគមន៍កសិកម្មទំនើប (Modern Agricultural Communities – MACs)ក្រោមអធិបតីភាពដ៏ខ្ពង់ខ្ពស់របស់ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ឯកឧត្តម សាយ សុភភោគា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកស្រី គិត វិសិដ្ឋកញ្ញា អគ្គនាយិការងនៃអគ្គនាយកដ្ឋានកសិកម្មនិងប្រធានគ្រប់គ្រងសមាសភាគរង២.២ លោក ស៊ន វិចិត្រ ប្រធាននាយកដ្ឋានរដ្ឋបាល ផែនការ គណនេយ្យ និងសហប្រតិបត្តិការអន្តរជាតិ និងជាប្រធានក្រុមគាំទ្រលេខាធិការដ្ឋានកម្មវិធី ASPIRE-AT លោក សេង ទុយ ប្រធាននាយកដ្ឋានវិស្វកម្មកសិកម្ម និងជាប្រធានគម្រោងការបង្កើនភាពធន់នឹងអាកាសធាតុ ក្នុងខ្សែច្រវាក់តម្លៃកសិកម្មនៅកម្ពុជា និងលោក ជា សាំងដូណា ប្រធាននាយកដ្ឋានសហគមន៍កសិកម្ម នៅសណ្ឋាគារ SUNWAY ។
សិក្ខាសាលានេះមានការចូលរួមពីថ្នាក់ដឹកនាំ និងមន្ត្រីជំនាញមកពីអគ្គនាយកដ្ឋានកសិកម្ម (GDA) តំណាង ក្រសួងសាធារណការ និងដឹកជញ្ជូន(MPWT) ធនាគារអភិវឌ្ឍន៍ជនបទ និងកសិកម្ម (ARDB) ធនាគារសហគ្រាសធនតូច និងមធ្យម កម្ពុជា ម.ក (SME Bank) សាជីវកម្មធានាឥណទានកម្ពុជា (CGCC) ថ្នាក់ដឹកនាំ ទីប្រឹក្សា និងអ្នកសម្របសម្រួលគម្រោងការបង្កើតភាពធន់នឹងអាកាសធាតុក្នុងខ្សែច្រវាក់តម្លៃកសិកម្មនៅកម្ពុជា (CREA) ក្រុមហ៊ុន International Institute of Rural Reconstruction (IIRR) និងសមាគមបណ្តាញកសិករ និងធម្មជាតិ(FNN) ក្រុមហ៊ុន SBK Research and Development Co., Ltd ក្រុមហ៊ុន Nuppun Research and Consulting Co., Ltd ក្រុមហ៊ុនទីប្រឹក្សាផ្នែកពង្រឹងសមត្ថភាពសហគមន៍កសិកម្មទាំងបីតំបន់ (SP1-1, SP1-2, SP1-3) មន្ទីរកសិកម្ម រុក្ខាប្រមាញ់ និងនេសាទខេត្ត ទាំង ២១ ខេត្តគោលដៅ ព្រមទាំងទីប្រឹក្សានិងដៃគូពាក់ព័ន្ធសរុបចំនួន ១២២ នាក់ (ក្នុងនោះមានស្ត្រី ២៣ នាក់) ។
សិក្ខាសាលានេះ ផ្តោតលើចំណុចសំខាន់ៗ រួមមាន៖
១) បង្ហាញពីសមិទ្ធផលដែលសម្រេចបានក្នុងឆ្នាំ ២០២៥។
២) ផ្សព្វផ្សាយអំពីផែនការ សកម្មភាព និងថវិកាឆ្នាំ២០២៦ ដែលទទួលបានការអនុម័តពីក្រសួងសេដ្ឋកិច្ច និងហិរញ្ញវត្ថុ និងមូលនិធិ IFAD  និងកំណត់សកម្មភាព និងអ្នកទទួលខុសត្រូវ ដើម្បីធានាការអនុវត្តប្រកបដោយប្រសិទ្ធភាព និងទាន់ពេល។
៣) ការគាំទ្រសហគមន៍កសិកម្មទំនើប (MAC)៖ ផ្តោតលើការរៀបចំផែនការ និងប្រើប្រាស់មូលនិធិបន្ថែមសម្រាប់គាំទ្រដល់សហគមន៍កសិកម្មទំនើប។
៤) ការគាំទ្របច្ចេកទេសនិងថវិកាពី South-South Triangular Cooperation (SSTC) សម្រាប់កិច្ចការនាំចេញកសិផលទៅប្រទេសចិន។
៥) ជំរុញការនាំចេញ៖ ពិធីសារស្តីពីលក្ខខ័ណ្ឌតម្រូវភូតគាមអនាម័យសម្រាប់ការនាំចេញផ្លែទុរេនស្រស់ទៅកាន់ប្រទេសចិន និងបន្តការរៀបចំពិធីសារស្តីពីលក្ខខ័ណ្ឌតម្រូវភូតគាមអនាម័យសម្រាប់ការនាំចេញផ្លែខ្នុរ និងម្នាស់។
៦) ការអភិវឌ្ឍហេដ្ឋារចនាសម្ព័ន្ធអំណោយផលដល់ទីផ្សារកសិផល៖ សិក្សាលទ្ធភាពសាងសង់ឃ្លាំងស្តុក ផ្សារកសិផល ផ្លូវ ស្ពាន និងប្រព័ន្ធស្រោចស្រព ដើម្បីគាំទ្រដល់ចរន្តផលិតកម្ម។
៧) ការគាំទ្រ MSMEs ចំនួន ៤០ ផ្នែកអភិវឌ្ឍន៍អាជីវកម្ម និងតភ្ជាប់ទៅទីផ្សារក្រៅស្រុក ។
៨) ផែនការពង្រឹងសមត្ថភាពសហគមន៍កសិកម្មចំនួន ៦២៣ ឱ្យក្លាយជាសហគ្រាសសេដ្ឋកិច្ចជនបទ។
៩) ផែនការគាំទ្រសហគមន៍កសិកម្មឱ្យមានលទ្ធភាពប្រើប្រាស់បច្ចេកវិទ្យាសមស្របនឹងអាកាសធាតុ សម្រាប់បង្កើនផលិតកម្ម។
នាឱកាសនោះ ឯកឧត្តម បណ្ឌិត មាស ពិសិដ្ឋ បានពាំនាំនូវអនុសាសន៍ដ៏ខ្ពង់ខ្ពស់របស់ ឯកឧត្តមរដ្ឋមន្ត្រីក្រសួងកសិកម្ម ដោយសង្កត់ធ្ងន់លើការលើកកម្ពស់សមត្ថភាពការគ្រប់គ្រង សហគមន៍កសិកម្មទំនើប(MAC) ការផលិតឱ្យត្រូវតាមតម្រូវការទីផ្សារទាំងបរិមាណ និងគុណភាព និងការបង្ហាញនូវភាពឆ្នើមនៃជំនាញរបស់មន្ត្រី និងទីប្រឹក្សា ដើម្បីដោះស្រាយបញ្ហាប្រឈមជូនកសិករ និងសហគមន៍កសិកម្ម ឱ្យទាន់សភាពការណ៍។ 
តាមរយៈផែនការឆ្នាំ២០២៦ នេះ កម្មវិធី ASPIRE-AT និងគម្រោង CREA នឹងបន្តដើរតួនាទីយ៉ាងសំខាន់ក្នុងការតភ្ជាប់ទីផ្សារ ផ្តល់ហិរញ្ញប្បទាន និងពង្រឹងភាពធន់នឹងការប្រែប្រួលអាកាសធាតុ ដើម្បីបង្កើតកំណើនសេដ្ឋកិច្ចជនបទប្រកបដោយចីរភាពនៅកម្ពុជា។
យើងមានមោទនភាពយ៉ាងខ្លាំង ដែលកម្មវិធី ASPIRE-AT ទទួលបានការវាយតម្លៃខ្ពស់ពី IFAD ដែលបានផ្តល់ថវិកាបន្ថែម សម្រាប់ជួយគាំទ្រដល់សហគមន៍កសិកម្មទំនើប(MAC) ដើម្បីដោះស្រាយបញ្ហាមួយចំនួនក្នុងវិស័យកសិកម្ម និងដៃគូអភិវឌ្ឍន៍សំខាន់ៗមួយចំនួនទៀតដូចជា SSTC និង CIDCA ដែលបានផ្តល់ថវិកាបន្ថែមដើម្បីពង្រឹងក្នុងការបន្ថែមតម្លៃកសិផលក្រោយពេលប្រមូលផល និងគាំទ្រលើការនាំចេញកសិផលពីប្រទេសកម្ពុជាទៅកាន់ប្រទេសចិនឱ្យកាន់តែមានភាពទូលំទូលាយជាងមុន។ ការទទួលបានទំនុកចិត្តពី IFAD ក៏ដូចជា SSTC និង CIDCA គឺជាការទទួលស្គាល់នូវគុណតម្លៃនៃកិច្ចខិតខំប្រឹងប្រែងរបស់អ្នកពាក់ព័ន្ធទាំងអស់គ្នា។
ជាចុងក្រោយ ឯកឧត្តម បណ្ឌិត មាស ពិសិដ្ឋ បានផ្តល់អនុវត្តសាសន៍ដ៏ថ្លៃថ្លាចំពោះអង្គសិក្ខាសាលាទាំងមូល ដោយបានសង្កត់ធ្ងន់លើចំណុចសំខាន់ៗ ក្នុងការលើកកម្ពស់ស្មារតីជាម្ចាស់ការ និងភាពឆ្នើមនៃជំនាញរបស់មន្ត្រីគ្រប់លំដាប់ថ្នាក់ ទីប្រឹក្សានៃគម្រោង ក្នុងការដោះស្រាយបញ្ហាប្រឈមជូនកសិករឱ្យទាន់សភាពការណ៍ ដើម្បីបំប្លែងផែនការសកម្មភាពឆ្នាំ២០២៦ ឱ្យទៅជាសមិទ្ធផលជាក់ស្តែង ប្រកបដោយចីរភាពសម្រាប់កសិករ និងសហគមន៍កសិកម្មក្នុងខេត្តគោលដៅ ។
ឯកឧត្តមនាយក បានផ្តល់ជាការណែនាំឱ្យមានការពិគ្រោះពិភាក្សាក្នុងករណីដែលមានបញ្ហារាំងស្ទះ  ឬជួបនូវបញ្ហាដែលត្រូវការដោះស្រាយបបន្ទាន់ ទាំងថ្នាក់ខេត្ត ទីប្រឹក្សា និងអ្នកពាក់ព័ន្ធ ត្រូវជូនដំណឹងមក ទីប្រឹក្សាតាមផ្នែក ឬថ្នាក់ដឹកនាំកម្មវិធី ដើម្បីចាត់វិធានការសម្របសម្របដើម្បីដោយស្រាយឱ្យបានលឿន។