ឯកឧត្ដម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដឹកនាំក្រុមការងារជំនាញពិនិត្យការងារកសិកម្មនៅស្រុកគិរីវង់ ខេត្តតាកែវ

ចេញ​ផ្សាយ​ ៥ កុម្ភៈ ២០២៤ 3363

នៅថ្ងៃទី០៥ ខែកុម្ភៈ ឆ្នាំ២០២៤នេះ ឯកឧត្ដម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារជំនាញពិនិត្យការងារកសិកម្មនៅក្នុងស្រុកគិរីវង់ ខេត្តតាកែវ។

ក្នុងដំណើរការពិនិត្យការងារកសិកម្មនោះ ឯកឧត្ដម សុខ វិសាល និងក្រុមការងារជំនាញ រួមមាន លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត តំណាងមន្ទីរធនធានទឹក អភិបាល អភិបាលរងស្រុកគិរីវង់ជាដើម​ បានកត់សម្គាល់ថា ស្ថានភាពទឹកស្រោចស្រពស្រែប្រាំងមានផ្ទៃដីដាំដុះក្នុងស្រុកសរុបចំនួន ១៨ ៥០០ហិកតា។

ក្រៅពីនោះ មានផ្ទៃដីអាចប្រឈមខ្វះទឹកចំនួន ៨៣១ហិកតា ក្នុងឃុំអង្គប្រាសាទ ព្រៃរំដេង គោកព្រេច ដែលអាជ្ញាធរបានចេញវិធានការដោះស្រាយ តាមរយៈខួងអណ្ដូងយកទឹកសម្រួលបានលើស ៥០%។ ដោយឡែក ស្រែបង្ហាញចំនួន ៥ហិកតា នៅភូមិទួលស្វាយ ឃុំអង្គប្រាសាទ ស្រុកគិរីវង់ កំពុងលូតលាស់បានល្អ និងចាប់ផ្ដើមចេញផ្កា។

តាមរយៈបេសកកម្មនេះដែរ ឯកឧត្តម សុខ វិសាល បានជួបសំណេះសំណាលជាមួយបងប្អូនប្រជាកសិករដាំដុះដំណាំដីប្លី ឬម្រេចវែង នៅឃុំកំពែង ស្រុកគិរីវង់ ដែលស្នើសុំជួយរកទីផ្សារ ដើម្បីបង្កើនតម្លៃបន្ថែមទៀត៕