ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហួរ អញ្ជើញពិនិត្យកសិដ្ឋានផលិតពូជដំណាំតំបន់ដីខ្ពស់ចម្ការលើ ដំណាំស្វាយចន្ទី និងសហគ្រាសកែច្នៃគ្រាប់ស្វាយចន្ទីនៅស្រុកចម្ការលើ ខេត្តកំពង់ចាម
ចេញផ្សាយ ១១ មករា ២០២៤ 3634
កាលពីថ្ងៃទី៩ ខែមករា ឆ្នាំ២០២៤ ឯកឧត្តម តូច ប៊ុនហួរ រដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញត្រួតពិនិត្យការងារនៅកសិដ្ឋានផលិតពូជដំណាំតំបន់ដីខ្ពស់ចម្ការលើ ដំណាំស្វាយចន្ទីរបស់កសិករ និងសហគ្រាសកែច្នៃគ្រាប់ស្វាយចន្ទីនៅស្រុកចម្ការលើខេត្តកំពង់ចាម ដោយមានការចូលរួមពី លោក ធីវ វណ្ណធីរ ប្រធាននាយកដ្ឋានដំណាំឧស្សាហកម្ម និងមន្ត្រីបច្ចេកទេសនៃនាយកដ្ឋានដំណាំឧស្សាហកម្ម។
នៅក្នុងដំណើរនេះ ឯកឧត្តមរដ្ឋលេខាធិការនិងក្រុមការងារ បានពិនិត្យកសិដ្ឋានចម្ការលើ ដែលកំពុងបណ្តុះកូនដំឡូងមីគ្មានជំងឺនៅក្នុងរោងប្លាស្ទិក សម្រាប់យកទៅដាំពង្រីកនៅទីវាល ដោយសង្កេតឃើញថាមានដំណើរការល្អ។ ចំណែក ការពិសោធពូជដំឡូងមីធន់នឹងជំងឺម៉ូសាអ៊ិកកំពុងដំណើរការ និងរង់ចាំការប្រមូលផលដើម្បីវាយតម្លៃលើទិន្នផល។ ដោយឡែក ពូជស្វាយចន្ទីវិញ កំពុងចេញផ្កានិងមានក្តិបបណ្តើរៗហើយរំពឹងថា នឹងទទួលបានទិន្នផលល្អប្រសើរជាងឆ្នាំមុន។
ឯកឧត្តម តូច ប៊ុនហ៊ួរ និងក្រុមការងារ ក៏បានអញ្ជើញទៅពិនិត្យទីតាំងដីទំនាបទឹកលិចនៅរដូវវស្សា ដែលអាចសាងសង់ជាកន្លែងស្តុកទឹកទុកសម្រាប់ប្រើប្រាស់នៅក្នុងកសិដ្ឋានបាន បើមានការអភិវឌ្ឍ។
នៅឃុំតាអុង ស្រុកចម្ការលើ ម្ចាស់ចម្ការស្វាយចន្ទី បានជម្រាបជូនឯកឧត្តមរដ្ឋលេខាធិការ និងក្រុមការងារ អំពីស្ថានភាពដំណាំស្វាយចន្ទីឆ្នាំនេះ ដែលកំពុងចេញចេញផ្កា និងមានក្តិបបណ្តើរៗ។ កសិករជាម្ចាស់ចម្ការ សង្ឃឹមថាឆ្នាំនេះ នឹងអាចទទួលបានទិន្នផល ប្រសិនបើមិនមានភ្លៀងកក់ខែច្រើន ធ្វើឱ្យជ្រុះផ្កាទេនោះ។
ជាចុងក្រោយ ឯកឧត្តម តូច ប៊ុនហ៊ួរ ក៏បានអញ្ជើញទស្សនាសហគ្រាសគ្រាប់ស្វាយចន្ទីចម្ការលើ ឡឹង ម៉ានុត ដែលមានសមត្ថភាពកែច្នៃគ្រាប់ស្វាយចន្ទីបាន ៣០០ ទៅ ៤០០តោនក្នុងមួយឆ្នាំ។ បច្ចុប្បន្នសហគ្រាសនៅមានសកម្មភាពបកគ្រាប់ស្វាយចន្ទីនិងកែច្នៃជាប្រចាំ និងនៅមានគ្រាប់ក្នុងស្តុកជិត ១០០តោនទៀត និងផ្គត់ផ្គង់គ្រាប់ស្វាយចន្ទី តែសម្រាប់ទីផ្សារក្នុងស្រុកប៉ុណ្ណោះ៕
