ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ឃី វិបុលបុត្រា អញ្ជើញដឹកនាំក្រុមការងារចុះពិនិត្យស្ថានភាពដំណាំដែលរងផលប៉ះពាល់ដោយសារគ្រោះទឹកជំនន់ទន្លេមេគង្គ នៅខេត្តក្រចេះ
ចេញផ្សាយ ៧ សីហា ២០២៥ 674
នៅថ្ងៃទី៦ ខែសីហា ឆ្នាំ២០២៥ ឯកឧត្តម ឃី វិបុលបុត្រា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានលេខាធិការដ្ឋានគ្រប់គ្រងគ្រោះមហន្តរាយប្រចាំក្រសួង អមដំណើរដោយ លោក គង់ សំអឿន អនុប្រធាននាយកដ្ឋានដំណាំស្រូវ និងមន្ត្រីជំនាញ តំណាងមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ និងអាជ្ញាធរមូលដ្ឋានបានចុះពិនិត្យស្ថានភាពដំណាំ ដែលរងផលប៉ះពាល់ដោយសារគ្រោះទឹកជំនន់ទន្លេមេគង្គ ស្ថិតនៅក្រុងក្រចេះ និងស្រុកចិត្របុរី ក្នុងខេត្តក្រចេះ។
តាមការពិនិត្យ ស្ថានភាពដំណាំស្រូវដែលមានផ្ទៃដីប៉ះពាល់និងខូចខាតដោយជំនន់ទឹកទន្លេមេគង្គ ដែលបានហក់ឡើងកាលពីថ្ងៃទី២៨ ខែកក្កដា សម្រាប់ក្រុងក្រចេះមានចំនួន ១១៦ហិកតា ក្នុងនោះសង្កាត់អូរឫស្សីមានចំនួន ៦៨ហិកតា សង្កាត់រការកណ្តាលមាន ២៣ហិកតា និងសង្កាត់ក្រគរមាន ៣០ហិកតា ចំណែកស្រុកចិត្របុរីចំនួន ១០៤២ហិកតា ក្នុងនោះឃុំថ្មគ្រែមានចំនួន ១៥៩ហិកតា។
ទន្ទឹមនឹងនោះ បើពិនិត្យលើស្ថានភាពទឹកនាពេលបច្ចុប្បន្នបានចាប់ផ្តើមស្រកជាបណ្តើរៗដែរហើយ ជាក់ស្តែងដំណាំស្រូវដែលទឹកជន់លិចគឺខូចខាតទាំងស្រុង ប៉ុន្តែតំបន់ខ្លះម្ចាស់ស្រែប្រមូលផលស្រូវបានមួយចំនួនរួចហើយដែរ។ ជាមួយគ្នានោះម្ចាស់ស្រែកំពុងរង់ចាំស្តារឡើងវិញ ដោយតំបន់ខ្លះលើកទី៣ និងខ្លះទៀតលើកទី២។ កសិករលើកឡើងថា រៀងរាល់ឆ្នាំទឹកឡើងនៅចុងខែសីហា ឬដើមខែកញ្ញា គាប់ជួនពួកគាត់បានប្រមូលផលរួចរាល់ហើយ។ ផ្ទុយមកវិញសម្រាប់ឆ្នាំនេះ គ្រោះមហន្តរាយបានមកបំផ្លាញស្រូវពួកគាត់ខ្លះកំពុងធ្វើខ្លួន ផើម និងខ្លះទៀតកំពុងដាក់គ្រាប់បណ្តាលឱ្យរងការខូចខាត។
សូមជម្រាបថា មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ បានសហការជាមួយអាជ្ញាធរមូលដ្ឋាន បន្តចុះពិនិត្យលើប្រភពទឹក និងផ្ទៃដីដែលមានលទ្ធភាពស្តារឡើងវិញ និងកំពុងរៀបចំ ផែនការឱ្យបានច្បាស់លាស់អំពីសំណើសុំគ្រាប់ពូជរបស់ប្រជាកសិករនៅតំបន់ដែលរងផលប៉ះពាល់ដោយសារគ្រោះទឹកជំនន់ទន្លេមេគង្គនេះ៕
