ឯកឧត្តម មាស ពិសិដ្ឋ អនុរដ្ឋលេខាធិការក្រសួងកសិកម្ម បានដឹកនាំមន្ត្រីជំនាញ ជួបពិភាក្សាជាមួយអ្នកឯកទេសផ្នែក​ធនធានធម្មជាតិ និងកសិកម្ម និងជាតំណាងធនាគារអភិវឌ្ឍន៍អាស៊ី ដើម្បីរៀបចំឯកសារទស្សនទានសម្រាប់រៀបចំគម្រោង “ពន្លឿនការកែទម្រង់វិស័យកសិកម្ម”

ចេញ​ផ្សាយ​ ០២ កក្កដា ២០២៤ 815

ឯកឧត្តម មាស ពិសិដ្ឋ អនុរដ្ឋលេខាធិការក្រសួងកសិកម្ម និងជានាយកកម្មវិធី ASPIRE-AT តំណាងដ៏ខ្ពង់ខ្ពស់ពីឯកឧត្តមរដ្ឋមន្ត្រី ឌិត ទីណា បានដឹកនាំក្រុមការងារ និងមន្ត្រីជំនាញ ជួបពិភាក្សាជាមួយ​អ្នក​ឯកទេសផ្នែកធនធានធម្មជាតិ និងកសិកម្ម និងជាតំណាងធនាគារ​អភិវឌ្ឍន៍អាស៊ី (ADB) ដើម្បីរៀបចំឯកសារទស្សនទាន​សម្រាប់រៀបចំ​គម្រោង “ពន្លឿនការកែទម្រង់វិស័យកសិកម្ម” នៅទីស្តីការ​ក្រសួងកសិកម្ម។ កិច្ចពិភាក្សានោះក៏មានការចូលរួមពីមន្ត្រីនៃ​សាជីវកម្មធានាឥណទានកម្ពុជា (CGCC) ផងដែរ។

គម្រោង “ពន្លឿនការកែទម្រង់វិស័យកសិកម្ម” នេះ ត្រូវអនុវត្តន៍​ក្នុងរយៈពេល៦ឆ្នាំ ចាប់ពីឆ្នាំ ២០២៦ តទៅ ដោយប្រើប្រាស់​ហិរញ្ញប្បទាន​សម្បទានពីធនាគារអភិវឌ្ឍន៍អាស៊ីចំនួន ១០០លាន​ដុល្លារអាមេរិក ក្រោមការគ្រប់គ្រង និងអនុវត្តរបស់ក្រសួងកសិកម្ម រុក្ខាប្រមាញ់ និងនេសាទ ដោយសហការជាមួយក្រសួង​និងស្ថាប័នរដ្ឋមួយចំនួនទៀត។

ឯកឧត្តម មាស ពិសិដ្ឋ មានប្រសាសន៍ថា នៅក្នុងអង្គប្រជុំក៏បានយល់​ស្របយកចិត្តទុកដាក់អនុវត្តអនុសាសន៍ដ៏ខ្ពង់ខ្ពស់របស់ឯកឧត្តមរដ្ឋមន្ត្រី ដើម្បីធ្វើឱ្យគម្រោង “ពន្លឿនការកែទម្រង់វិស័យកសិកម្ម” នោះ មានគោលដៅរួមចំណែកធ្វើឱ្យសម្រេចគោលនយោបាយអាទិភាពរបស់រាជរដ្ឋាភិបាលអាណត្តិទី៧ នៃរដ្ឋសភា និងក្រសួង តាមរយៈការចងក្រង និងពង្រឹងសមត្ថភាពរបស់សហគមន៍កសិកម្មទំនើប ទាំងការផលិត ទាំងការតភ្ជាប់ទីផ្សារ ដើម្បីរក្សាបានកំណើនសេដ្ឋកិច្ច និងភាពធន់នឹង​ការប្រែប្រួលអាកាសធាតុ ការរក្សាបានតុល្យភាពរវាងតម្រូវការ​និងការផ្គត់ផ្គង់ ទាំងទីផ្សារក្នុងស្រុក ទីផ្សារនាំចេញ  ការគាំទ្របច្ចេកទេស​និងមធ្យោបាយដល់មន្ត្រីកសិកម្មឃុំ ដែលត្រូវបានជ្រើសរើស​បម្រើសេវាបច្ចេកទេស និងទីផ្សារដល់សហគមន៍ជនបទជាដើម។

បន្ថែមពីនេះ ឯកឧត្តមអនុរដ្ឋលេខាធិការបញ្ជាក់ថា គម្រោងនេះនឹងគ្រោង​អនុវត្តនៅតំបន់ប៉ូលសេដ្ឋកិច្ចទី៤ រួមមានខេត្តពោធិ៍សាត់ បាត់ដំបង ប៉ៃលិន និងខេត្តបន្ទាយមានជ័យ ដោយផ្តោតលើកសិផលដែលមាន​តម្លៃខ្ពស់មួយចំនួនដូចជា អង្ករក្រអូប ស្វាយ មៀនប៉ៃលិន ស្វាយចន្ទី និងជលផលជាដើម ដើម្បីឱ្យស្របនឹងគោលការណ៍របស់ Rice-Fish Economic corridorផងដែរ៕