ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញជាអធិបតីបើកសិក្ខាសាលា ស្តីពី «ការកសាងបណ្តាញនិងពង្រឹងភាពជាដៃគូនៅតំបន់ឆ្នេរនិងសមុទ្រ» នៅខេត្តកំពត
ចេញផ្សាយ ២៦ មីនា ២០២៦ 3574
នៅថ្ងៃទី២៦ ខែមីនា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីបើកសិក្ខាសាលាស្តីពី «ការកសាងបណ្តាញ និងពង្រឹងភាពជាដៃគូនៅតំបន់ឆ្នេរ និងសមុទ្រ» ដែលកម្មវិធីប្រព្រឹត្តទៅនៅសណ្ឋាគារខេមរា ក្នុងខេត្តកំពត។
សិក្ខាសាលារៀបចំដោយនាយកដ្ឋានអភិរក្សជលផល នៃអគ្គនាយកដ្ឋានជលផល សហការជាមួយអង្គការ WEA, Aid and Action និង NGO Forum និងមានការចូលរួមពីលោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល និងមន្រ្តីជំនាញនៃអគ្គនាយកដ្ឋានជលផល លោក ស សូរិន នាយខណ្ឌជលផលកំពត លោក ទុយ សេរីវឌ្ឍនា នាយកកម្មវិធីអង្គការសម្ព័ន្ធភាពសត្វព្រៃ រួមជាមួយបណ្តាញអង្គការមិនមែនរដ្ឋាភិបាលជាដៃគូជាច្រើន វិស័យឯកជន បណ្តាញសហគមន៍ និងអ្នកពាក់ព័ន្ធផ្សេងៗសរុបអ្នកចូលរួមប្រមាណ៥០នាក់។
ថ្លែងក្នុងឱកាសបើកកម្មវិធី លោកជំទាវ អ៊ឹម រចនា បានគូសបញ្ជាក់ថា អង្គសិក្ខាសាលានាពេលនេះ រៀបចំឡើងក្នុងគោលដៅកសាងទំនាក់ទំនងល្អ និងភាពជាដៃគូរវាងរដ្ឋាភិបាល ជាពិសេសក្រសួងកសិកម្ម ដែលមានអគ្គនាយកដ្ឋានជលផលជាសេនាធិការផ្ទាល់ ខណ្ឌរដ្ឋបាលជលផល អាជ្ញាធរមូលដ្ឋាន ជាមួយអង្គការមិនមែនរដ្ឋាភិបាល វិស័យឯកជន បណ្តាញសហគមន៍ ដែលបាននឹងកំពុងគាំទ្រដល់កិច្ចការគ្រប់គ្រង ការពារ ស្រាវជ្រាវជីវចម្រុះ អភិរក្ស និងអភិវឌ្ឍធនធានជលផលសមុទ្រ រួមទាំងលើកម្ពស់ជីវភាពសហគមន៍ប្រកបដោយនិរន្តរភាព។
តាមរយៈសិក្ខាសាលានេះ លោកជំទាវ អ៊ឹម រចនា សង្ឃឹមថា អ្នកចូលរួមទាំងអស់អាចស្គាល់គ្នាកាន់តែច្បាស់ ជាពិសេសអំពីការងារនិងបេសកកម្មនៃអង្គការរបស់ខ្លួន។ ការស្គាល់គ្នា រៀនសូត្រពីគ្នា និងពិភាក្សាផ្លាស់ប្ដូរយោបល់រវាងគ្នានាថ្ងៃនេះ គឺជាជំហានដំបូង ដើម្បីឈានទៅបង្កើតបណ្ដាញនិងពង្រឹងភាពជាដៃគូនៅតំបន់ឆ្នេរនិងសមុទ្រ ក្នុងទិសដៅតែមួយ គឺ៖ គ្រប់គ្រង ការពារ អភិរក្ស និងអភិវឌ្ឍធនធានជលផលសមុទ្រ នៅកម្ពុជាប្រកបដោយប្រសិទ្ធភាពនិងប្រសិទ្ធផលខ្ពស់ ស្របទៅតាមគោលនយោបាយរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា៕
