ឯកឧត្តមរដ្ឋលេខាធិការ ហ៊ាន វណ្ណហន អញ្ជើញចូលរួមជាអធិបតីក្នុងសិក្ខាសាលាបើកដំណើរការគម្រោង ស្ដីពីការបង្កើនកាលានុវត្ដភាពសម្រាប់អភិវឌ្ឍវិស័យសាកវប្បកម្មនៅកម្ពុជា (Growing Transformative Horticulture ហៅកាត់ថា GROWTH)

ចេញ​ផ្សាយ​ ៥ កុម្ភៈ ២០២៦ 1075

នៅព្រឹកថ្ងៃទី៥ ខែកុម្ភៈ ឆ្នាំ២០២៦ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការ តំណាងដ៏ខ្ពង់ខ្ពស់ឯកឧត្ដម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ បានធ្វើជាអធិបតីក្នុងសិក្ខាសាលាបើកដំណើរការគម្រោង GROWTH​ នៅសណ្ឋាគារ Sun & Moon រាជធានីភ្នំពេញ។ 
ក្នុងសិក្ខាសាលា មានការអញ្ជើញចូលរួមពី ឯកឧត្តម Jonathan Kings ឯកអគ្គរដ្ឋទូតនៃប្រទេសនូវែលសេឡង់ លោកស្រី Heather Campbell នាយិកាអង្គការ Save the Children New Zealand នាយកអង្គការ Save the Children ប្រចាំកម្ពុជា នាយកអង្គការ iDE ប្រចាំកម្ពុជា តំណាងគណៈប្រតិភូស្ថានទូតនូវែលសេឡង់​ លោក លោកស្រី ពីអង្គការ Save the Children, អង្គការ iDE, ដៃគូអភិវឌ្ឍន៍ វិស័យឯកជន តំណាងមន្ទីរកសិកម្មខេត្ត មន្ទីរពាក់ព័ន្ធ និងតំណាងកសិករពីខេត្ដគោលដៅគម្រោង។ 
គម្រោង GROWTH ទទួលបានការគាំទ្រថវិកាពីក្រសួងការបរទេស និងពាណិជ្ជកម្មនៃប្រទេសនូវែលសេឡង់ អនុវត្តដោយអង្គការសង្គ្រោះកុមារ (Save the Children) ប្រចាំកម្ពុជា ក្រោមកិច្ចសហការជាមួយអង្គការ iDE កម្ពុជា ថវិកាសរុប ១២លានដុល្លានូវែលសេឡង់ (MFAT: ១១លានដុល្លានូវែលសេឡង់ និង SCNZ: ១លានដុល្លានូវែលសេឡង់) មានរយៈពេល ៥ឆ្នាំ (មករា ២០២៦ - ធ្នូ ២០៣០) នៅខេត្តគោលដៅចំនួន ៤ រួមមានខេត្ដកោះកុង សៀមរាប និងបន្ទាយមានជ័យ ដែលបន្តអនុវត្តលើតំបន់នៃគម្រោងមុនរបស់អង្គការ Save the Children និងអង្គការ iDE ហើយខេត្ដកំពតជាខេត្ដគោលដៅថ្មី។ គម្រោងនឹងធ្វើឱ្យប្រសើរឡើងនូវសន្តិសុខសេដ្ឋកិច្ច និងជីវភាពរស់នៅរបស់គ្រួសារកសិករចំនួន ៨,០០០ គ្រួសារ (៤០ ០០០ នាក់) និង៧០០ ស្ថាប័ន/សហគ្រាស និងអ្នកទទួលផលដោយប្រយោលចំនួន ១៦៥ ០០០នាក់ និងអាជីករជាង ២០០នាក់។ 
ថ្លែងក្នុងអង្គសិក្ខាសាលា ឯកឧត្ដមបណ្ឌិត បានមានប្រសាសន៍ថា គោលដៅរបស់យើងគឺការធ្វើទំនើបកម្មវិស័យកសិកម្ម ធានាបានទាំងការបង្កើតនូវបរិយាកាសសុវត្ថិភាព និងប្រកបដោយបរិយាបន្ន។ តាមរយៈការធ្វើការរួមគ្នាដើម្បីពង្រីកបច្ចេកវិទ្យាកសិកម្មវៃឆ្លាតនឹងអាកាសធាតុ ពង្រឹងការតភ្ជាប់ទីផ្សារ និងរៀបចំខ្សែច្រវាក់តម្លៃឱ្យមានលក្ខណៈផ្លូវការ យើងអាចធានាថា កសិករខ្នាតតូចនៅកម្ពុជានឹងទទួលបានអត្ថប្រយោជន៍ពីអាជីវកម្មកសិកម្មរបស់ពួកគេ និងបន្តក្លាយជាឆ្អឹងខ្នងនៃភាពធន់នៃសេដ្ឋកិច្ចរបស់យើង។ 
បន្ថែមពីនេះទៀត ឯកឧត្ដមបណ្ឌិត បានបញ្ជាក់ជូនអង្គសិក្ខាសាលានូវសកម្មភាពអាទិភាពបន្ថែមដែលទទួលបានកិច្ចអន្តរាគមន៍ពិសេសពីរាជរដ្ឋាភិបាលលើមុខដំណាំពោត បន្លែ និងដំឡូងមី  និងការជំរុញបង្កើនផលិតកម្មសាកវប្បកម្ម ជាគោលដៅអាទិភាពរបស់ក្រសួងកសិកម្ម ក្នុងការធ្វើពិពិធកម្មកសិកម្ម បង្វែរពីដំណាំស្រូវទៅប្រភេទមុខដំណាំផ្សេង ផ្តល់ផលចំណេញច្រើនជាងមុន។
ជាងនេះទៅទៀត ឯកឧត្ដមបណ្ឌិត ក៏ណែនាំឱ្យគម្រោងត្រូវសហការណ៍ជាមួយមន្ទីរកសិកម្មខេត្ដគោលដៅ និងផ្នែកពាក់ព័ន្ធ ឆ្លើយតបទៅនឹងវិសាលភាពគម្រោង ក្នុងនោះចាប់តាំងពីអាហាររូបត្ថម្ភ សន្ដិសុខស្បៀង និងទីផ្សារកសិផលពិសេសលើផលិតផលបន្លែផងដែរ៕