ឯកឧត្តមរដ្ឋលេខាធិការ គឹម សុន អញ្ជើញចុះពិនិត្យស្រែបង្ហាញកសិករគំរូ ការដាំបន្លែនិងការចិញ្ចឹមមាន់ពង ភ្ញាស់កូននៅស្រុកស្វាយជ្រំខេត្តស្វាយរៀង

ចេញ​ផ្សាយ​ ២៨ វិច្ឆិកា ២០២៥ 2052

នៅថ្ងៃទី២៧ ខែវិច្ឆិកា ឆ្នាំ២០២៥ ឯកឧត្តម គឹម សុន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តមអនុរដ្ឋលេខាធិការ ហៃ រស្មី  អមដំណើរដោយលោកស្រី ភិន មុំ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង និងមន្ត្រីជំនាញកសិកម្មខេត្ត ដោយមានការចូលរួមពីអាជ្ញាធរស្រុក ឃុំ និងមន្ត្រីកសិកម្មឃុំ ក្នុងស្រុកស្វាយជ្រំ បានអញ្ជើញចុះពិនិត្យស្រែបង្ហាញកសិករគំរូ ការដាំបន្លែ និងការចិញ្ចឹមមាន់សាច់ មាន់យកពងភ្ញាស់កូននៅស្រុកស្វាយជ្រំខេត្តស្វាយរៀង។
ក្នុងដំណើរនេះ ឯកឧត្តមរដ្ឋលេខាធិការ បានចុះពិនិត្យស្រែបង្ហាញរបស់កសិករឈ្មោះ សៅ សាប៉ុលនៅភូមិទូលខ្ពស់  ឃុំចំបក់ ស្រុកស្វាយជ្រំ ខេត្តស្វាយរៀងដែលបានទទួលការណែនាំ និងអនុវត្តគោលការណ៍ស្រែល្អពីមន្ត្រីកសិកម្មឃុំចំបក់និងជាលទ្ធផលកសិករដែលអនុវត្តតាមការណែនាំមន្ត្រីកសិកម្មឃុំធ្វើស្រែ បង្ហាញបានកាត់បន្ថយចំណាយពី ៣ ២៤០ ០០០រៀល មកនៅត្រឹម ២ ២៥០ ០០០រៀល ក្នុងមួយហិកតា តាមរយៈកាត់បន្ថយចំណាយលើ ពូជ ជី ថ្នាំកសិកម្ម និងសុខភាពស្រូវលូតលាស់ល្អជាងមុន ទិន្នផលក៏បានច្រើនជាងមុន។
ជាមួយគ្នានេះ ក្រុមការងារបានចុះពិនិត្យការដាំបន្លែ របស់កសិករឈ្មោះម៉ុក ពេញ មានជីនាងវង (១គីឡូ៥០០០រៀល)និងម្រះព្រៅ(១គីឡូ ៤០០០រៀល )ក្នុង១ថ្ងៃលក់បាន៣០kg (កាត់វិលជុំ ) និងពិនិត្យលើការចិញ្ចឹមមាន់យកសាច់និងមាន់យកពងសម្រាប់ភ្ញាស់យកកូន នៅកសិដ្ឋានតូច សេង នៅភូមិ តាជៃ ឃុំ កំពង់ចំឡង ស្រុកស្វាយជ្រំដែលបានទទួលការណែនាំនិងគាំទ្រពីមន្រ្តីកសិកម្មឃុំកំពង់ចំឡង។
ក្នុងឱកាសនោះ ឯកឧត្តមរដ្ឋលេខាធិការ ក៏បានណែនាំឱ្យកសិករព្យាយាមបន្តអនុវត្តតាមការណែនាំរបស់មន្រ្តីកសិកម្មឃុំ ដើម្បីឱ្យការងារបង្កបង្កើនផលកាន់តែល្អប្រសើរ៕