ព័ត៌មានផ្សេងៗទៀត
លោកជំទាវ អ៊ឹម រចនា៖ សហគមន៍នេសាទអេកូទេសចរណ៍ «បឹងរំអិល» នឹងប្រែក្លាយជាតំបន់ទេសចរណ៍ប្រកបដោយសក្ដានុពលមួយ ហើយជួយលើកស្ទួយជីវភាពប្រជាសហគមន៍នេសាទនៅតំបន់នេះ
ចេញផ្សាយ ៣០ ឧសភា ២០២៦ 3920
នារសៀលថ្ងៃទី២៨ ខែឧសភា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យវឌ្ឍនភាពនៃការសាងសង់ស្នាក់ការសហគមន៍នេសាទអេកូទេសចរណ៍ «បឹងរំអិល» ស្ថិតនៅឃុំសំបុក ស្រុកចិត្របុរី ខេត្តក្រចេះ។
នៅក្នុងដំណើរពិនិត្យមើលទីតាំង នៃការសាងសង់ស្នាក់ការសហគមន៍ ដែលសម្រេចបានប្រមាណជា៥០ទៅ៦០ភាគរយ លោកជំទាវ អ៊ឹម រចនា បានលើកឡើងថា ទីតាំងសហគមន៍នេសាទអេកូទេសចរណ៍ «បឹងរំអិល» ជាតំបន់ទេសចរណ៍ប្រកបដោយសក្ដានុពលមួយកន្លែងទៀតក្នុងខេត្តក្រចេះ បន្ទាប់ពីរមណីដ្ឋានទេសចរកាំពី ។ តាមរយៈការចុះបញ្ជីនៅឆ្នាំ២០១១ សហគមន៍នេះមានតំបន់អភិរក្សត្រីមេពូជ មានសត្វស្លាបកម្រ និងមានបរិយាកាសព្រមទាំងទេសភាពល្អៗ ដែលអាចទាក់ទាញភ្ញៀវទេសចរមកទស្សនាកម្សាន្ត និងស្នាក់នៅបាន។
សូបបញ្ជាក់ជូនថា ទីតាំងសហគមន៍នេសាទអេកូទេសចរណ៍ «បឹងរំអិល» រៀបចំធ្វើឡើងដែលមានកិច្ចសហការពីអគ្គនាយកដ្ឋានជលផល ក្រោមជំនួយបច្ចេកទេសពីអង្គការ FAO និងថវិកាឧបត្ថម្ភពីសារធារណរដ្ឋកូរ៉េខាងត្បូង។ ជំនួយសម្រាប់អភិវឌ្ឍសហគមន៍នេះ មានជាអាថិ៍៖ ការសាងសង់ស្នាក់ការសហគមន៍ ភោជនីយដ្ឋាន ផ្ទះស្នាក់ បន្ទប់ទឹក និងទូកសម្រាប់ទេសចរជួលចែវកម្សាន្តមើលទេសភាពជាដើម ដែលនឹងជួយលើកស្ទួយជីវភាពប្រជាសហគមន៍នេសាទ អាចរកចំណូលបន្ថែម និងកាត់បន្ថយការនេសាទក្នុងដែនទឹកធម្មជាតិ៕
