ព័ត៌មានផ្សេងៗទៀត
មន្ដ្រីចំនួន១២៩នាក់ត្រូវប្រកាសទ្រព្យសម្បត្តិ និងបំណុល
ចេញផ្សាយ ២២ មករា ២០១៨ 4764
ខណៈនៃការបើកកិច្ចប្រជុំ ផ្សព្វផ្សាយការប្រកាសទ្រព្យសម្បត្ដិ និងបំណុលនោះ ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម បានបញ្ជាក់ថា ក្រសួងកសិកម្ម មានមន្ដ្រីដែលត្រូវប្រកាសទ្រព្យសម្បត្ដិ និងបំណុលចំនួន១២៩នាក់ ។
ឯកឧត្តម ឱម យិនទៀង ទេសរដ្ឋមន្ដ្រី និងជាប្រធានអង្គភាពប្រឆាំងពំពើពុករលួយ កាលពីព្រឹកថ្ងៃទី១៧ ខែមករា បានអញ្ជើញចូលរួមប្រជុំផ្សព្វផ្សាយ ការប្រកាសទ្រព្វសម្បត្ដិ និងបំណុល ។
ក្នុងពិធីនោះ ឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម បានមានប្រសាសន៏ថា ក្រសួងកសិកម្ម រុក្ខាប្រមាញ់ និងនេសាទ មានមន្ដ្រីដែលត្រូវប្រកាសទ្រព្យសម្បត្ដិ និងបំណុលចំនួន១២៩នាក់ ក្នុងនោះមានមន្ដ្រី ដែលត្រូវបានតែងតាំងដោយអនុក្រឹត ជាសមាជិកក្រុមប្រឹក្សាភិបាលប្រចាំគ្រឹះស្ថានសាធារណៈ រដ្ឋបាលនៃក្រសួងកសិកម្ម រួមមានសាកលវិទ្យាល័យភូមិន្ទកសិកម្ម វិទ្យាស្ថានស្រាវជ្រាវនិងអភិវឌ្ឍន៏កសិកម្មកម្ពុជា វិទ្យាស្ថានស្រាវជ្រាវកៅស៊ូកម្ពុជា សាលាជាតិកសិកម្មព្រែកលាប ។
ឯកឧត្ដមបានថ្លែងអំណរគុណ ចំពោះឯកឧត្តមទេសរដ្ឋមន្ដ្រី ឱម យិនទៀង ដែលបានចំណាយពេលវេលា ដ៏មានតម្លៃមកផ្សព្វផ្សាយដោយផ្ទាល់ នៅក្រសួងដ៏ធំមួយនេះ ។ ឯកឧត្ដមបានសំណូមពរ ដល់ឯកឧត្តមទេសរដ្ឋមន្ដ្រី ប្រធានអង្គភាពប្រឆាំងអំពើពុករលួយផងដែរ ឱ្យជួយបណ្ដុះបណ្ដាលគ្រូបង្គោលមួយក្រុម សម្រាប់ក្រសួង ដើម្បីឱ្យក្រុមគ្រូបង្គោលនេះ ចុះជួយផ្សព្វផ្សាយនៅមន្ទីរកសិកម្មទូទាំងប្រទេសថែមទៀត ។
ឯកឧត្ដម បានមានប្រសាសន៏ទៅកាន់មន្ដ្រី ដែលចូលរួមទាំងអស់ថា មន្ដ្រីដែលមានឈ្មោះ ត្រូវប្រកាសទ្រព្យសម្បតិ្ដ និងបំណុលត្រូវប្រញាប់បំពេញទម្រង់ប្រកាសទ្រព្យសម្បត្ដិ និងបំណុល ដូចបានបានចែកជូន ឱ្យបានទាន់ពេល ដើម្បីក្រសួងបញ្ជូនទៅអង្គភាពប្រឆាំងអំពើពុករលួយ នៅក្នុងអំឡុងសប្ដាហ៏ទី៣ ខែកុម្ភៈឆ្នាំ២០១១ ។
ដូចនេះមន្ដ្រី ដែលមានឈ្មោះត្រូវប្រកាសទ្រព្យសម្បត្ដិ និងបំណុល ត្រូវផ្ញើរទម្រង់ប្រកាសទ្រព្យសម្បត្ដិ និងបំណុលដែលបានបំពេញរួចមកក្រសួងកសិកម្ម ឱ្យបានមុនថ្ងៃទី១៤ ខែកុម្ភៈ ឆ្នាំ ២០១១ ៕
