ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារ ចូលរួមចុះពិនិត្យ និងវាយតម្លៃតំបន់គោលដៅអនុគ្រោងទី៣ ក្នុងវិសាលភាពទំនប់៣០កញ្ញា សម្រាប់អនុវត្តគម្រោងកែលម្អសន្តិសុខទឹកកម្ពុជា (CWSIP) នៅក្នុងខេត្តកំពង់ធំ

ចេញ​ផ្សាយ​ ១ ឧសភា ២០២៥ 2345

នៅថ្ងៃទី៣០ ខែមេសា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CWSIP-MAFF បានអញ្ជើញដឹកនាំក្រុមការងារចូលរួមការចុះពិនិត្យ និងវាយតម្លៃតំបន់គោលដៅអនុវត្ដគម្រោងទី៣ ក្នុងវិសាលភាពទំបន់៣០កញ្ញា សម្រាប់អនុវត្តគម្រោងកែលម្អសន្តិសុខទឹកកម្ពុជា (CWSIP) នៅក្នុងខេត្តកំពង់ធំ។ 
បេសកកម្មនេះ ដឹកនាំដោយឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ និងជានាយកអង្គភាពគ្រប់គ្រងគម្រោងក្រោមហិរញ្ញប្បទានពីធនាគារពិភពលោក នៃក្រសួងធនធានទឹក និងឧតុនិយម និងមានការចូលរួមពីក្រុមការងារធនាគារពិភពលោក ក៏ដូចជាក្រុមការងារអនុវត្ដគម្រោងនៃក្រសួងទាំង២ផងដែរ។ 
នាឱកាសនេះ ក្រុមការងារបានជួបប្រជុំពិភាក្សាជាមួយមន្ទីរកសិកម្ម រុក្ខាប្រមាញ់ និងនេសាទ និងមន្ទីរធនធានទឹក និងឧតុនិយមខេត្តកំពង់ធំ ដើម្បីសិក្សាសក្តានុពលនៃវិស័យទាំង២ ដែលអាចប្រើជាមូលដ្ឋានក្នុងការកំណត់សកម្មភាពគន្លឹះសម្រាប់គាំទ្រដោយគម្រោង។ ចំពោះវិស័យកសិកម្មក្នុងវិសាលភាពនៃគម្រោងមានចំណុចខ្លាំងដូចជា សហគមន៍កសិកម្មកំពុងដំណើរការលើមុខរបរផលិតពូជស្រូវ ក្នុងនោះដែរធ្វើការផលិតបន្លែសម្រាប់ផ្គត់ផ្គង់ដល់សាលាគាំទ្រដល់គម្រោងស្បៀងអាហារតាមសាលារៀន និងកំពុងពង្រីងផលិតកម្មបន្លែបន្ថែម ដោយទិញដីសម្រាប់សាងសង់ផ្ទះសំណាញ់បន្ថែមសំដៅបង្កើនការផ្គត់ផ្គង់ដល់តម្រូវការក្នុងមូលដ្ឋាន។ 

បើតាមឯកឧត្តមរដ្ឋលេខាធិការ ប្រជាកសិករជួបប្រទះកង្វះទឹកនៅរដូវប្រាំង ដែលបណ្តាលឱ្យដំណាំស្រូវខូចខាត និងផលថយចុះ ក៏ដូចជាកង្វះទឹកស្រោចស្រពដំណាំបន្លែ និងដំណាំរួមផ្សំផ្សេងៗទៀត ហើយយន្តការសម្រាប់ចែកចាយទឹកក្នុងតំបន់ពុំទាន់សមស្របនៅឡើយ។ ជាដំណោះស្រាយចំពោះមុខ ថ្នាក់ដឹកនាំមន្ទីរកសិកម្ម បានស្នើសុំការស្តារបឹង  និងជីកអណ្តូងដែលអាចបង្កើនសមត្ថភាពស្តុកទឹកសម្រាប់បម្រើដល់ការដាំដុះ ស្របពេលដែលគម្រោងកំពុងដំណើរសាងសង់ និងស្តារទំបន់៣០កញ្ញានេះ។
ទន្ទឹមនឹងនេះដែរ ឯកឧត្តមរដ្ឋលេខាធិការ និងក្រុមការងារបានចុះជួបពិភាក្សាជាមួយប្រជាកសិករ និងសហគមន៍កសិកម្មដែលស្ថិតក្នុងវិសាលភាពទំនប់៣០កញ្ញា ដើម្បីស្វែងយល់ពីស្ថានភាពជាក់ស្ដែងលើការប្រើប្រាស់ និងការប្រកបរបរកសិកម្មនៅក្នុងតំបន់នោះផងដែរ។  ឯកឧត្តមរដ្ឋលេខាធិការ បានបង្ហាញពីការប្ដេជ្ញាចិត្តអនុវត្តសកម្មភាពដោយបង្កើតកិច្ចសហការយ៉ាងជិតស្និទ្ធរវាងក្រសួងជំនាញទាំង២ និងស្ថាប័នពាក់ព័ន្ធ ដើម្បីធានាការផ្គត់ផ្គង់ទឹក និងផ្ដល់បច្ចេកទេសកសិកម្មព្រមគ្នាឱ្យកាន់តែមានប្រសិទ្ធភាព ស្របតាមទិសដៅគម្រោង។

ជាមួយគ្នានេះ ឯកឧត្តមរដ្ឋលេខាធិកា បានស្នើដល់អាជ្ញាធរគ្រប់លំដាប់ថ្នាក់ដែលពាក់ព័ន្ធជួយសម្របសម្រួលដល់ការចុះសិក្សានិងវាយតម្លៃលម្អិតបន្ថែមទៀត ដើម្បីឱ្យការរៀបចំផែនការសកម្មភាព និងថវិកាសម្រាប់គាំទ្រក្នុងអនុគម្រោងទី៣នេះ កាន់តែល្អប្រសើរ៕