ឯកឧត្តមរដ្ឋមន្រ្តី វេង សាខុន បានអញ្ជើញជួប លោកស្រី Polly Dunford ប្រធានក្រុមបេសកកម្មរបស់ជំនួយ USAID

ចេញ​ផ្សាយ​ ២៧ កុម្ភៈ ២០១៨ 2666

កាលពីវេលាម៉ោង ៣រសៀល ថ្ងៃទី២៨ ខែមិថុនា ឆ្នាំ២០១៧ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានទទួលជួប លោកស្រី Polly Dunford ប្រធានក្រុមបេសកកម្មរបស់ជំនួយ USAID នៅទីស្តីការក្រសួងកសិកម្ម រុក្ខាប្រមាញ់ និងនេសាទ ដើម្បីពិភាក្សាអំពីយុទ្ធសាស្រ្តសន្តិសុខស្បៀងអាហារពិភពលោករបស់រដ្ឋាភិបាលសហរដ្ឋអាមេរិក និងគម្រោង Harvest II។

លោកស្រី Polly Dunford បានថ្លែងអំណរគុណដល់ ឯកឧត្តមរដ្ឋមន្រ្តី ដែលបានអនុញ្ញាតអោយលោកស្រី និងសហការី ចូលជួបពិភាក្សាការងារ។ លោកស្រីបានបញ្ជាក់ថា សហរដ្ឋអាមេរិក កំពុងរៀបចំគម្រោងសន្តិសុខស្បៀងអាហារសម្រាប់ជំហានដំបូងចំនួន ១២ប្រទេស ហើយលោកស្រីសង្ឃឹមថា កម្ពុជានឹងត្រូវបានបញ្ជូលសម្រាប់ជំហានទី២។

ឆ្លៀតពេលនោះ លោកស្រីក៏បានអញ្ជើញ ឯកឧត្តមរដ្ឋមន្រ្តី រួមដំណើរទស្សនកិច្ចនៅខេត្តបាត់ដំបង នៅដើមខែសីហា ឆ្នាំ២០១៧ខាងមុខ ជាមួយអភិបាលខេត្តបាត់ដំបង ដើម្បីសម្ពោធគម្រោង Harvest II និងដើម្បីពិនិត្យមើលនូវបច្ចេកវិទ្យាកសិកម្មថ្មីៗដែលត្រូវបំពាក់ក្នុងគម្រោង នៅឯខេត្តបាត់ដំបង។ ឯកឧត្តមរដ្ឋមន្រ្តី បានថ្លែងអំណរគុណចំពោះរដ្ឋាភិបាលសហរដ្ឋអាមេរិកដែលបានផ្តល់ការគាំទ្រ ដល់វិស័យកសិកម្មនៅកម្ពុជា។ ឯកឧត្តមរដ្ឋមន្រ្តី បានមានប្រសាសន៍ថា កម្ពុជាកំពុងប្រែក្លាយពីប្រទេសមានចំណូលមធ្យមកម្រិតទាប ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ ដែលជាក្តីបារម្ភរបស់ក្រសួងកសិកម្មចំពោះកសិករខ្នាតតូចដែលមានផ្ទៃដីដាំដុះតិចជាង ១ហិកតា ដោយកម្រិតចំណូលរបស់កសិករមានកម្រិតទាប ធៀបនឹងវិស័យដទៃ។

ដូច្នេះក្រសួងកសិកម្ម បាននិងកំពុងសហការជាមួយគម្រោងដៃគូ ក្នុងការគាំទ្រកសិករខ្នាតតូច ដើម្បីជំរុញអោយមានការច្នៃប្រឌិតក្នុងការដាំដុះ ដោយបញ្ជូលការផ្សព្វផ្សាយពីការដាំដុះដំណាំរួមផ្សំ និងការប្រើប្រាស់ប្រព័ន្ធបច្ចេកវិទ្យាថ្មីៗ ដែលសម្រួលដល់កំលាំងពលកម្ម និងចំណាយថ្លៃដើម។ ដោយឡែកចំពោះបញ្ហាទីផ្សារ កម្ពុជាបាននិងកំពុងផលិតបាននូវកសិផលជាច្រើន ដែលពុំទាន់បានធ្វើការនាំចេញបានទូលំទូលាយ ដោយសាររនាំងនៃតម្រូវការអនាម័យ និងភូតគាមអនាម័យរបស់ប្រទេសគោលដៅនីមួយៗ ទន្ទឹមនឹងហេដ្ឋារចនាសម័ន្ធដឹកជញ្ជូនក៏នៅពុំទាន់អាចធ្វើការប្រកួតប្រជែងជាមួយប្រទេសក្នុងតំបន់បាននៅឡើយ។ ឯកឧត្តមរដ្ឋមន្រ្តី ក៏បានស្នើអោយ USAID ពិចារណាក្នុងការគាំទ្រការរៀបចំប្រព័ន្ធត្រួតពិនិត្យអនាម័យ និងភូតគាមអនាម័យនៅកម្ពុជាអោយមានបទដ្ឋានច្បាស់លាស់ដើម្បីជំរុញការនាំចេញកសិផលកម្ពុជាទៅកាន់ទីផ្សារអន្តរជាតិមានភាពប្រសើរឡើង។