ឯកឧត្ដមរដ្ឋមន្ត្រី វេង សាខុន បានជួបប្រជុំពិភាក្សាការងារជាមួយលោក Pierre AMILHAT អគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប

ចេញ​ផ្សាយ​ ២១ កុម្ភៈ ២០១៨ 4381

នៅព្រឹកថ្ងៃទី១៨ ខែមករា ឆ្នាំ២០១៧ ឯកឧត្ដម វេង សាខុនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងសហការីបានជួបប្រជុំពិភាក្សាការងារជាមួយលោក Pierre AMILHAT អគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប នៅទីក្រុងប្រូសសែល ដើម្បីពិនិត្យមើលលើបណ្តាគម្រោងមួយចំនួនដែលត្រូវផ្តល់ហិរញ្ញប្បទានឥតសំណងសម្រាប់បណ្តាឆ្នាំខាងមុខ ។

សូមបញ្ចាក់ថា ឯកសារគម្រោងកម្មវិធីនេះត្រូវបានព្រាងរៀបចំឡើងដោយមន្រ្តីជំនាញរបស់សភាពអឺរ៉ុប និងមន្រ្តីពាក់ព័ន្ធនៃក្រសួងកសិកម្ម រុក្ខាប្រមាញ់និងនេសាទកន្លងមក ។ គម្រោងទាំងនោះរួមមាន៖

1) ការពង្រឹងសមត្ថភាពដោយដល់រដ្ឋបាលជលផល លើការអភិវឌ្ឍ និងការកែលម្អរតួនាទីរបស់រដ្ឋបាលជលផល ក្នុងការប្រើប្រាស់ និងគ្រប់គ្រងធនធានជលផលប្រកបដោយនិរន្តរភាព

2) ការផ្តល់គាំទ្រដល់សហគមន៍នេសាទ ក្នុងការទទួលបាននូវបទបញ្ញាតិ្តនានានិងការគ្រប់គ្រងនិងការប្រព្រឹត្តទៅនៅក្នុងដែនសហគមរបស់ខ្លួនប្រកបដោយប្រសិទ្ធភាព

3) ការត្រួតពិនិត្យនិងវាយតម្លៃសកម្មភាពនៃការគ្រប់គ្រង និងអភិវឌ្ឍសហគមន៍នេសាទ

4) ការធ្វើអោយប្រសើរឡើងលើការគ្រប់គ្រងនិងតំបន់អភិរក្ស ដែលនៅបឹងទន្លេសាប នៅមេគង្គនិងនៅសមុទ្រ ក្នុងការជួបពិភាក្សានេះលោកអគ្គនាយកបាន៖

1) ធ្វើការវាយតម្លៃខ្ពស់ចំពោះការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការជំរុញកំណើនសេដ្ឋកិច្ចបានល្អប្រសើរ

2) កោតសរសើរចំពោះប្រមុខរាជរដ្ឋាភិបាលកម្ពុជាយើងថាបានចាត់វិធានការបានល្អប្រសើរក្នុងរយៈពេលថ្មីៗនេះ លើការបង្រា្កបបទល្មើសនេសាទ ជាពិសេសនៅបឹងទន្លេសាប

3) បានទទួលស្គាល់ស្តីពីការខិតខំប្រឹងប្រែងរបស់ក្រសួងកសិកម្ម និងនេសាទមួយរយៈកន្លងមក និងបានកំពុងសហការបានល្អជាមួយ គម្រោងកម្មវិធីរបស់សភាពអឺរ៉ុប

4) ក្នុងនាមជាអគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប នឹងខិតខំប្រឹងប្រែងធ្វើយ៉ាងណាឲ្យគម្រោងកម្មវិធីខាងលើនេះឈានទៅដល់ការចុះហត្ថលេខាក្នុងត្រីមាសទីមួយនេះឲ្យបាន លើទឹកប្រាក់ប្រមាណជា ជាង ៣០ លានអឺរ៉ូ ។ ហើយនឹងបន្តផ្តល់ជំនួយបច្ចេកទេសខាងផ្លូវច្បាប់ដល់ភាគីកម្ពុជាក្នុងការចូលរួមចំណែករបស់កម្ពុជាលើការការប្រយុទ្ធប្រឆាំងការនេសាទខុសច្បាប់នៅដែននេសាទសមុទ្រ អន្តរជាតិ ដែលមិនមានរបាយការណ៍ និងមិនគោរពច្បាប់ ។