ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដឹកនាំកិច្ចប្រជុំលើកទី២ នៃគណៈកម្មការតម្រង់ទិសគម្រោងជលផលសមុទ្រនិងតំបន់ឆ្នេរប្រកបដោយចីរភាព

ចេញ​ផ្សាយ​ ១២ សីហា ២០២៤ 1710

នាព្រឹកថ្ងៃទី០៦ ខែសីហា ឆ្នាំ២០២៤ នៅសណ្ឋាគារសាន់អេនមូន រីវើសាយ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសហប្រធានគណៈកម្មការតម្រង់ទិស បានដឹកនាំកិច្ចប្រជុំលើកទី២ របស់គណៈកម្មការតម្រង់ទិសនៃគម្រោងជលផលសមុទ្រនិងតំបន់ឆ្នេរប្រកបដោយចីរភាព ក្រោមក្របខណ្ឌហិរញ្ញប្បទានរបស់ធនាគារអភិវឌ្ឍន៍អាស៊ី (ADB) និងទីភ្នាក់ងារបារាំងសម្រាប់ការអភិវឌ្ឍ (AFD)។​

កិច្ចប្រជុំនេះ មានការអញ្ជើញចូលរួមពីសមាជិក-សមាជិកា ជាតំណាងក្រសួងស្ថាប័នពាក់ព័ន្ធថ្នាក់ជាតិ និងថ្នាក់ខេត្ត រួមមាន៖ រដ្ឋបាលជលផល ក្រសួងបរិស្ថាន សហគ្រិនខ្មែរ ក្រសួងសាធារណការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ ក្រសួងឧស្សាហកម្ម វិទ្យសាស្ត្រ បច្ចេកវិទ្យា និងនវានុវត្តន៍ ក្រសួងពាណិជ្ជកម្ម អភិបាលរងនៃខេត្តតំបន់ឆ្នេរទាំង៤ និងក្រុមការងារអនុវត្តគម្រោង។ គោលបំណងនៃកិច្ចប្រជុំគឺដើម្បីពិនិត្យវឌ្ឍនភាពនៃការអនុវត្តគម្រោងមកទល់ត្រីមាសទី២ និងផែនការសម្រាប់ត្រីមាសទី៣និងទី៤ ឆ្នាំ២០២៤ និងសម្របសម្រួលតម្រង់ទិសគម្រោងលើការវិនិយោគដែលពាក់ព័ន្ធជាមួយគម្រោងអភិវឌ្ឍន៍ផ្សេងទៀតនៅតំបន់ឆ្នេរ។

ជាលទ្ធផល គណៈកម្មការបានពិនិត្យឃើញថា ក្រុមការងារបានពន្លឿនការងារអនុវត្តគម្រោងនិងការងារលទ្ធកម្មក្នុងអំឡុងត្រីមាសទី១ និងទី២ ដោយទទួលបានលទ្ធផលល្អប្រសើរ។ ក្នុងនោះ គម្រោងបានចាប់ផ្តើមដំណើរការសាងសង់អគារការិយាល័យនៃខណ្ឌរដ្ឋបាលជលផលចំនួន២ នៅខេត្តកែប និងខេត្តកំពត ព្រមទាំងអគារប្រតិបត្តិការប្រព័ន្ធតាមដាននាវាចំនួន១ នៅខេត្តព្រះសីហនុ។​

បន្ថែមពីលើនេះ ក្រុមការងារក៏បានសិក្សាកំណត់ទីតាំង និងរៀបចំប្លង់រចនាសម្រាប់អភិវឌ្ឍផែនេសាទចំនួន៥ (២នៅខេត្តកែប ១នៅខេត្តកំពត និង២នៅខេត្តកោះកុង) និងបានសិក្សាកំណត់ទីតាំងសម្រាប់ដាក់ពង្រាយសំណង់ជម្រកត្រីសិប្បនិម្មិតនៅតំបន់ក្បែរឆ្នេរ។

គណៈកម្មការតម្រង់ទិសក៏បានលើកយកផែនការមេនៃការអភិវឌ្ឍតំបន់សេដ្ឋកិច្ចពិសេសនៃខេត្តតំបន់ឆ្នេរទាំង៤ មកពិនិត្យផ្គូរផ្គងជាមួយផែនការគម្រោង ដើម្បីសម្របសម្រួលការអនុវត្តគម្រោងជៀសវាងនូវផលប៉ះពាល់នានា៕