ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី អនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលនូវែលសេឡង់សម្រាប់ឆ្នាំ២០២៤-២០២៥ ជួបសម្តែងការគួរសម

ចេញ​ផ្សាយ​ ១០ មករា ២០២៤ 3893

នៅព្រឹកថ្ងៃទី១០ ខែមករា ឆ្នាំ២០២៤ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី បានអនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលនូវែលសេឡង់សម្រាប់ឆ្នាំ២០២៤-២០២៥ ចូលជួបសម្តែងការគួរសម នៅទីស្តីការក្រសួងកសិកម្ម រុក្ខាប្រមាញ់ និងនេសសាទ។

ក្នុងជំនួបនេះ ឯកឧត្តមរដ្ឋលេខាធិការ បានសម្តែងនូវការស្វាគមន៍ និងអបអរសាទរចំពោះនិស្សិតជ័យលាភីទាំង៣៦រូប ក្នុងនោះថ្នាក់បណ្ឌិតចំនួន ៤រូប និងបរិញ្ញាបត្រជាន់ខ្ពស់ ៣២រូប ដែលកំពុងត្រៀមខ្លួនទៅបន្តការសិក្សានៅប្រទេសនូវែលសេឡង់ និងបានផ្តល់ប្រសាសន៍ផ្តាំផ្ញើ​ដល់ប្អូនៗនិស្សិតចំនួន ៤ចំណុច គឺចាំបាច់ត្រូវខិតខំរៀនសូត្រយកចំណេះដឹង​ និងបទពិសោធន៍ និងសញ្ញាបត្រត្រឡប់មកវិញ ត្រូវស្វែងយល់ពីប្រពៃណី​ និងទំនៀមទម្លាប់ និងបង្កេតទំនាក់ទំនងល្អជាមួយប្រជាជន​នូវែលសេឡង់ ក៏ដូចជានិស្សិតបរទេស​ ព្រមជាមួយគ្នានេះ​ ធ្វើខ្លួនជាតំណាងកម្ពុជា​ និងផ្សព្វផ្សាយវិជ្ជមានអំពីកម្ពុជាឱ្យបានច្រើន ត្រូវយកចំណេះដឹង​ និងបទពិសោធន៍ល្អៗដែលទទួលបាន​ មកកែច្នៃឱ្យស្របតាមបរិបទជាក់ស្តែងរបស់កម្ពុជា​ និងដំណេីរនៃការអភិវឌ្ឍជាតិមាតុភូមិកម្ពុជា​ ទាំងអ្នកបម្រើការងារនៅក្នុងរដ្ឋបាល​សាធាណ:  វិស័យឯកជន​ និងអង្គការសង្គមស៊ីវិល និងចែករំលែកពេលវេលា​ បទពិសោធន៍​ និងចំណេះដឹង​ ជាមួយយុវជនកម្ពុជាដទៃទៀត​ តាមលទ្ធភាពដែលអាចធ្វើបាន​  ដើម្បីជំរុញទឹកចិត្តយុវជនឱ្យខិតខំប្រឹងប្រែងពង្រឹងសមត្ថភាព​ក្នុងការចូលរួមអភិវឌ្ឍប្រទេស​ជាតិ។

ឯកឧត្តម បានជូនពរប្អូនៗនិស្សិតទាំងអស់ទទួលបានជោគជ័យត្រចះត្រចង់ក្នុងការសិក្សា​ នាពេលខាងមុខ៕