ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម និងក្រុមការងារ អញ្ជើញធ្វើទស្សនកិច្ចស្វែងយល់ពីខ្សែច្រវាក់ផលិតកម្មកែច្នៃសំបកកង់យានយន្ត នៅសហគ្រាស General Tire Technology (Cambodia) Co., Ltd នៅតំបន់សេដ្ឋកិច្ចពិសេសក្រុងព្រះសីហនុ

ចេញ​ផ្សាយ​ ១៧ មិថុនា ២០២៤ 2531

នៅថ្ងៃទី១៤ ខែមិថុនា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តម ប៉ុល សុផា អនុរដ្ឋលេខាធិការ លោក ឃុន កក្កដា អគ្គនាយកស្តីទី នៃអគ្គនាយកដ្ឋានកៅស៊ូ និងសហការី បានជួបប្រជុំពិភាក្សាការងារជាមួយសហគ្រាស General Tire Technology (Cambodia) Co., Ltd នៅតំបន់សេដ្ឋកិច្ចពិសេសក្រុងព្រះសីហនុ។

ដំណើរទស្សនកិច្ចនេះ ធ្វើឡើងក្នុងគោលបំណងដើម្បីស្វែងយល់អំពីខ្សែច្រវាក់ផលិតកម្មកែច្នៃសំបកកង់យានយន្ត និងតម្រូវការប្រើប្រាស់កៅស៊ូធម្មជាតិ ក៏ដូចជាបញ្ហាប្រឈមរបស់សហគ្រាស។ បន្ទាប់ពីកិច្ចស្វាគមន៍រួចមក លោកនាយកសហគ្រាសបានជម្រាបជូន អំពីដំណើរការសាងសង់រោងចក្រនិងការផលិតសំបកកង់យានយន្តដែលបានផលិតសាកល្បងចេញជាសំបកកង់ដំបូងពីជ័រកៅស៊ូកម្ពុជា ប្រកបដោយជោគជ័យ និងគុណភាពខ្ពស់ កាលពីថ្ងៃទី១៨ ខែមីនា ឆ្នាំ២០២៣កន្លងទៅនេះ។

តាមការបញ្ជាក់ពីលោកនាយកសហគ្រាស បានឱ្យដឹងទៀតថា ក្រុមហ៊ុនបានបើកសម្ពោធជាផ្លូវការនៅថ្ងៃទី២២ ខែឧសភា ឆ្នាំ២០២៣ ។ ចំពោះតម្រូវការប្រើប្រាស់កៅស៊ូធម្មជាតិមានចាប់ពីប្រមាណ ៩ពាន់តោនក្នុងឆ្នាំ២០២៤ និងកើនឡើងជាបន្តបន្ទាប់រហូតដល់ជិត ៤ម៉ឺនតោនក្នុងឆ្នាំ២០២៨ នៅពេលដែលខ្សែច្រវាក់ផលិតកម្មដំណាក់កាលទី២ បានបញ្ចប់ការសាងសង់ទាំងស្រុងក្នុងខែធ្នូ ឆ្នាំ២០២៤។ សហគ្រាសមានសមត្ថភាពផលិតសំបកកង់ខ្នាតតូចចំនួន ៨៥០ម៉ឺនគ្រាប់ក្នុង១ឆ្នាំ និងខ្នាតធំ ១៦៥ម៉ឺនគ្រាប់ក្នុង១ឆ្នាំ សម្រាប់នាំចេញផលិតផលសំបកកង់ទៅកាន់ទីផ្សារសហរដ្ឋអាមេរិក និងប្រទេសប្រេស៊ីល។

ក្នុងឱកាសនោះដែរ ឯកឧត្តម ប្រាក់ ដាវីដ បានជំរុញសហគ្រាសសូមប្រើប្រាស់ជ័រកៅស៊ូកម្ពុជាឱ្យបានកាន់តែច្រើនឡើង ព្រមទាំងបានឱ្យអគ្គនាយកដា្ឋនកៅស៊ូ រៀបចំជំនួបពិភាក្សារវាងសហគ្រាសផលិតសំបកកង់យានយន្ត ជាមួយនឹងបណ្តាក្រុមហ៊ុនចម្ការកៅស៊ូ និងរោងចក្រកែច្នៃជ័រកៅស៊ូនានា ដើម្បីរិះរកលទ្ធភាពផ្គត់ផ្គង់ជ័រកៅស៊ូដល់សហគ្រាសឱ្យបានគ្រប់តាមបរិមាណ និងគុណភាព ដែលសហគ្រាសត្រូវការ។ ជាមួយគ្នានោះ គណៈប្រតិភូក៏បានធ្វើដំណើរទស្សនកិច្ចសិក្សាស្វែងយល់អំពីខ្សែច្រវាក់ផលិតកម្មសំបកកង់យានយន្តចាប់ផ្តើមពីដំណាក់កាលដំបូង រហូតដំណាក់កាលបញ្ចប់នៃការផលិត៕